Author name: Tharindu Withanage

මඩකලපුව කොට්ඨාස අපරාධ විමර්ශන කාර්යංශය අනාවරණය කරගත් තොරතුරක් මත නාවික හමුදාවේද සහය ඇතිව 2021.09.07 වන දින මත අත්අඩංගුවට ගෙන වැඩිදුර විමර්ශන සඳහා පොලිස් මත්ද්‍රව්‍ය කාර්යංශය වෙත භාර දෙන ලද කිලෝග්‍රෑම් 170 ක පමණ දළ බර ප්‍රමාණයකින් යුතු මත්ද්‍රව්‍ය තොගයක නඩු කටයුතු අවසන් වූ බැවින් අධිකරණයෙන් ලැබූ නියෝග ප්‍රකාරව විනාශ කිරීම සඳහා එම තොගය 2026.01.02 වන අද දින උදෑසන  වනාතවිල්ලුව ප්‍රදේශයේ ස්ථාපිත කර ඇති දහන උඳුන වෙත ගෙන යන ලදී. වැඩිදුර පරීක්ෂණ මගින් අනාවරණය වූ පරදි එම තොගයේ ශුද්ධ බර හෙරොයින් කිලෝග්‍රෑම් 106 ග්‍රෑම් 248 ක් හා අබිං මත්ද්‍රව්‍ය ග්‍රෑම් 90.5 ක් වන අතර පොලිස් මත්ද්‍රව්‍ය කාර්යංශය විසින් 2026.01.02 වන අද දින උදෑසන 06.00 ට පමණ කොළඹ ගරු මහේස්ත්‍රාත් අධිකරණයෙන් මත්ද්‍රව්‍ය තොගය භාරගෙන පොලිස් විශේෂ කාර්ය බලකාය ඇතුලුව විශේෂ පොලිස් ආරක්ෂාව යටතේ ප්‍රවාහනය සිදුකරන ලදී. මත්ද්‍රව්‍ය තොගය භාර ගැනීමේ අවස්ථාව අධීක්ෂණය සඳහා පොලිස් මත්ද්‍රව්‍ය කාර්යංශ දිසාව භාර නියෝජ්‍ය පොලිස්පති අශෝක ධර්මසේන මහතා, අන්තරායකර ඖෂධ පාලක ජාතික මණ්ඩලයේ නිිලධාරීන්, රස පරීක්ෂක කාර්යාලය සහ අධිකරණ කාර්ය මණ්ඩලයේ නිලධාරීන් සහභාගී වූහ.

පොලිස්පති නීතිඥ ප්‍රියන්ත වීරසූරිය මහතා ප්‍රධානව පොලිස් මූලස්ථානයේ නිලධරයන් උදාවූ 2026 නව වසරේ රාජකාරි ආරම්භ කිරීම සඳහා ජනවාරි පළමුදින උදෑසන පොලිස් මූලස්ථානය ඉදිරිපිටදී රැස්ව ගෞරවනීය රාජ්‍ය සේවයක් වෙනුවෙන් වූ රාජ්‍ය සේවා ප්‍රතිඥාව/දිවුරුම ලබාදීම සිදුකළහ. පොලිස්පතිතුමන් එහිදී මාර්ගගත(Online) ක්‍රමය ඔස්සේ දිවයිනේ සියලු පොලිස් කොට්ඨාස ආමන්ත්‍රණය කරමින් රාජ්‍ය නිලධාරීන් ලෙස වඩාත් මහජන මිත්‍රශීලී සේවාවක් ඉුටුකිරීමට කැපවන ලෙසත්, නීතිය සාමය ආරක්ෂාකරමින් වඩාත් සාමකාමී පරිසරයක් පරිසරයක් පවත්වාගැනීමට ප්‍රසංශනීය කාර්ය භාරයක් ඉටුකිරීමට කැපවන ලෙසත්  දැනුම්දෙන ලදී. මව්බිමේ වෙනුවෙන් දිවි පිදූ සියලු නිලධාරීන්, රණවිරුවන් සිහිපත්කිරීමෙන්අනතුරුව සම්ප්‍රදානුකූලව කිරිබත් කැවිලි සහිත තේ මේසය සියලු නිලධාරීන් උදෙසා පිළිගන්වනු ලැබූ අතර පොලිස්පතිතුමන් විසින් ඉදිරියේදී සියලු නිලධාරීන්ගේ සුභසිද්ධිය වෙනුවෙන් ආයතනික වශයෙන් ඉටුවන කාර්යභාරය පිළිබඳව පැහැදිලි කරමින් නව වසරට සුභාසිංශන එක්කරන ලදී. පරිපාලනය භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතා, බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතා ඇතුලු ශ්‍රී ලංකා පොලිසියේ ඉහළ නායකත්වය හොබවන නිලධාරීන් මෙන්ම කණිෂ්ඨ, සිවිල් නිලධාරීන් මෙහිදී පොලිස්පතිතුමන් වෙත සුභපැතුම් එක්කළහ.

2025.12.30 වන දින පොලිස් මූලස්ථානයේ පවත්වන ලද සර්වරාත්‍රික පිරිත් සජ්ඣායනා පිංකමට සමගාමීව පසු දින උදෑසන පොලිස්පති නීතිඥ ප්‍රියන්ත වීරසූරිය මහතා ප්‍රමුඛව ජ්‍යෙෂ්ඨ නිලධාරීන්, විසි පස් නමක් වෙනුවෙන් හීල් දානය පූජා කිරීම සඳහා ගංගාරාම විහාරස්ථානය වෙත පැමිණියහ.  එහිදී හුණුපිටිය ගංගාරාම විහාරාධිපති පූජ්‍ය කිරින්දේ අස්සජි ස්වාමීන් වහන්සේ ප්‍රධාන මහා සංඝරත්නය විසින් පොලිස්පතිතුමා ඇතුලු ශ්‍රී ලංකා පොලිසියේ සමස්ථ නිලධරයන් හට මෙන්ම විශ්‍රාමික නිලධාරීන් හට  2025 වසර වෙනුවෙන් සුවසෙත, ආශිර්වාද ප්‍රාර්ථනා කළ සේක.

එළඹෙන 2026 නව වසර නිමිතිකර, ශ්‍රී ලංකා පොලිසිය යටතේ සේවයේ නියුතු නිලධරයන් වෙනුවෙන් මෙන්ම සමස්ථ මහජනතාව වන ඔබගේ යහපත ප්‍රාර්ථනා කරමින් 2025.12.30 වන දින පොලිස් මූලස්ථානයේදී සර්වරාත්‍රීක පිරිත් සජ්ඣායනාවක් පවත්වන ලදී. ලේක් හවුස් වටරවුම අසලින් ආරම්භ වූ, හස්තීන් දෙදෙනෙකුගෙන් හා පොලිස් සංස්කෘතික කොට්ඨාසයේ නිලධරයන්ගෙන් සැදුම්ලත් නර්තන කණ්ඩායම් සපිරි අලංකාර පෙරහැරක් පෙරදැරිව පූජනීය සදාතුක කරඩුන් වහන්සේ, පිරුවානා පොත් වහන්සේ සහ ගෞරවනීය ඇරයුම පිළිගෙන පිරිත් දේශනය සඳහා වැඩමවා වදාළ හුණුපිටිය ගංගාරාම විහාරාධිපති පූජ්‍ය කිරින්දේ අස්සජි ස්වාමීන් වහන්සේ ප්‍රධාන සංඝරත්නය පිරිත් මණ්ඩපය වෙත වැඩම කරවීම සිදුවිය.  පොලිස්පති නීතිඥ ප්‍රියන්ත වීරසූරිය මහතාගේ ප්‍රධානත්වයෙන් සහ ශ්‍රී ලංකා පොලිසිය බෞද්ධ සංගමයේ සංවිධානයෙන් මෙම සියලු කටයතු සිදු වූ අතර මෙම පුණ්‍යකර්මට ආරාධනාව පිළිගෙන ගරු මහජන ආරක්ෂක හා පාර්ලිමේන්තු කටයුතු නියෝජ්‍ය අමාත්‍ය සුනිල් වටගල මහතාගේ සහ මහජන ආරක්ෂක අමාත්‍යංශ ලේකම් රවී සෙනෙවිරත්න මහතාගේ සහභාගීත්වය, පරිපාලනය භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතා ඇතුලුව ජ්‍යෙෂ්ඨ පොලිස් නිලධාරීන්ගේ මෙන්ම පොලිස් මූලස්ථානයේ රාජ්‍ය නිලධාරීන් ඇතුලු පාර්ශව රැසක සහයෝගය හිමිවිය.  “දිට්වා” සුලි කුණාටුව හේතුවෙන් ඇතිවූ ආපදා තත්වයන්ට ගොදුරුවී දිවි අහිමි වූ පොලිස් නිලධරයන් සිහිපත් කරමින් එම පවුල්වල සාමාජිකයින්ටද මෙම අවස්ථාව සඳහා සහභාගී වීමට අවශ්‍ය පහසුව පොලිස් මූලස්ථානය විසින් සලසා තිබුනි.