Author name: Tharindu Withanage

අධික වර්ෂා සහිත තත්වය පහව ගියත් ගංවතුර තත්වය හා නාය යෑමේ අවධානමෙන් මෙරට කඳුකර ප්‍රදේශ මිදී නොමැති බැවින් නායයාමේ රතු නිවේදන නිකුත් කර ඇති ප්‍රදේශ වල ජීවත්වන ජනතාව දැඩි අවධානමින් පසුවිය යුතුය. නැවත පදිංචිය සඳහා යාම බලධාරීන්ගේ උපදෙස් පරිදි සිදුකළ යුතුය. අපදාව උග්‍රලෙස පැවතුනු පසුදින කිහිපයේදී වගකීම් විරහිත ලෙස බියට පත්වී සිටි ආපදාවට පත්වූවන් තවත් අනවශ්‍ය කළබලයකට හා බියකට පත්කරමින්, මහජන සාමය කඩවන ආකාරයෙන් අසත්‍ය ප්‍රචාරයන් කිහිපයක් සමාජමාධ්‍ය තුල සංසරණය වන බව නිරීක්ෂණය විය. අවධානම් සහිත මෙම කාලය තුලදී මෙන්ම පසුකාලයේදී මහජන සාමය කඩවන ආකාරයේ තොරතුරක් නිසි තහවුරු කරගැනීමකින් ‌තොරව හෝ කූඨ අරමුණක් සහිතව ප්‍රචාර කිරීමෙන් වළකින ලෙස අප ඔබෙන් ඉල්ලා සිටින්නෙමු. 2025.11.29 දිනැති අංක 2464/32 දරන ශ්‍රී ලංකා ප්‍රජාතාන්ත්‍රික සමාජවාදී ජනරජයේ අති විශේෂ ගැසට් පත්‍රය මඟින් 2025 අංක 01 දරණ හදිසි අවස්ථා (විශේෂ විධිවිධාන හා බලතල) නියෝග ප්‍රකාශයට පත් කර ඇති මෙම කාල සීමාවේ ගැසට් නිවේදනයේ 20 හා 21 වගන්ති ප්‍රකාරව හදිසි ආපදා තත්ත්වය පිළිබඳ මහජනයා බියගැන්විය හැකි හෝ කැළඹිය හැකි ආකාරයේ කිසිදු කටකතාවක් හෝ අසත්‍ය ප්‍රකාශයක් කට වචනයෙන්, තොරතුරු හා සන්නිවේදන තාක්ෂණය, ස්වංක්‍රීය පද්ධතිය හෝ කෘත්‍රීම බුද්ධිය ඇතුළු ස්වංක්‍රීය පද්ධතියන්ගෙන් යම් ලිඛිත, විද්‍යුත්, ඩිජිටල් හෝ වෙනත් යම් ආකාරයක මාධ්‍යයක් හරහා සන්නිවේදනය කිරීම, පළ කිරීම, නිර්මාණය කිරීම හෝ පැතිරවීම සම්බන්ධව නීතිය ක්‍රියාත්මක කළ හැකි බව සඳහන් කර ඇත. ඉහත වැරදි සම්බන්ධව විමර්ශනය කිරීමට පොලිස් නිලධාරියෙකුට හෝ ත්‍රිවිධ හමුදා සාමාජිකයෙකුට මෙම ගැසට් පත්‍රය මඟින් බලය ලබාදී ඇති අතර ත්‍රිවිධ හමුදා සාමාජිකයෙකු මෙම වැරදි සඳහා යම් අයෙකු අත්අඩංගුවට ගතහොත් එම සැකකරු පැය විසි හතරක් ඇතුළත පොලිස් ස්ථානයකට භාර දිය යුතුය. පොලිස් නිලධාරියෙකු විසින් අත්අඩංගුවට ගැනීමක් සිදු කළහොත් කොට්ඨාසයේ පොලිස් අධිකාරිවරයා වෙත වාර්තා කළ යුතු අතර, ත්‍රිවිධ හමුදා සාමාජිකයෙකු විසින් අත්අඩංගුවට ගැනීමක් සිදු කළහොත් ප්‍රදේශයේ අණදෙන නිලධාරිවරයා වෙත ඒ පිළිබඳව වාර්තා කළ යුතුය. එමෙන්ම දත්ත වැරදි ලෙස ප්‍රචාරය කිරීමෙන් ජනතාවට සහන සැලසීමේදී බාධාවක් ඇතිවීමට ඉඩ ඇති බැවින් නිවැරදි දත්ත පමණක් සමාජ ගතකිරීමට සැලකිලිමත් විය යුතුය. press conference (Video)

ශ්‍රී ලංකාව හා සහයෝගය ප්‍රවර්ධනය කිරීම සඳහා වන චීන කවුන්සලය විසින් ශ්‍රී ලංකා පොලිසිය විසින් සිදුකරන සහනාධාර බෙදාදීමේ වැඩසටහන් වෙනුවෙන් අතවශ්‍ය භාණ්ඩ හා ඖෂධ තොගයක්, මුදලින් රුපියල් මිලියන 02 ක් පරිත්‍යාග කරන ලදී. පරිත්‍යාග භාරගැනීමේ අවස්ථාව 2025.12.03 වන දින උදෑසන පොලිස් විශේෂ කාර්ය බලකා මූලස්ථානයේදී එම කවුන්සලයේ සභාපති Mr. Zhang Xudong මහතාගේ ප්‍රධානත්වයෙන් පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් පැවැත්වුනි. චීන කවුන්සල නිලධාරීන් හා විශේෂ කාර්ය බලකායේ අණදෙන නිලධාරී නියෝජ්‍ය පොලිස්පති ඩී.ජී.සමන්ත ද සිල්වා මහතා ඇතුලු ජ්‍යෙෂ්ඨ පොලිස් නිලධරයන් මෙම අවස්ථාව සඳහා සහභාගී විය.

අයහපත් කාලගුණික තත්ත්වය හේතුවෙන් ආපදාවට ලක්වූ ජනතාවට සහනාධාර බෙදාදීමේ විශේෂ වැඩසටහනක් ශ්‍රී ලංකා පොලිසිය මගින් අද (2025 දෙසැම්බර් 02) දින ආරම්භ කරන ලදී. මෙම වැඩසටහන ආරම්භ කරමින්, තෙල්දෙණිය ප්‍රදේශයේ අයහපත් කාලගුණයෙන් අවතැන් වූ සහ පීඩාවට පත් වූ ජනතාවට සහන සැලසීම සදහා බෙදාහැරිමේ කටයුතු පොලිස් මූලස්ථානයේදී සාර්ථකව සිදු කෙරිණි. මෙම මානුෂීය මෙහෙයුම ගරු පොලිස්පති නීතීඥ ප්‍රියන්ත වීරසූරිය මහතාගේ සහ පරිපාලන භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතාගේ ප්‍රධානත්වයෙන් සිදු විය. ද්‍රව්‍ය: • වියළි ආහාර ද්‍රව්‍ය• ඇඳුම් පැළඳුම්• පානීය ජල බෝතල් අයහපත් කාලගුණික තත්ත්වයන් හේතුවෙන් අවතැන් වූ සහ ආපදාවට ලක් වූ ජනතාවගේ පීඩාව අවම කිරීම, ශ්‍රි ලංකා පොලිසියේ ප්‍රධාන අරමුණ විය.

පොලිස්පති නීතීඥ ප්‍රියන්ත වීරසූරිය මහතා 2025.12.01 දින ග්‍රෑන්ඩ්පාස් ශාන්ත ජෝශප් දේවස්ථානයේදී අතිඋතුම් මැල්කම් කාදිනල් රංජිත් හිමිපාණන් හමුවූ අතර එහිදී ගංවතුරෙන් අවතැන්වූ අපේම සහෝදර ජනතාව වෙනුවෙන් සහන සැලසීම සම්බන්ධව සාකච්ඡා කරන ලදී. අනතුරුව පොලිස්පතිතුමා ජල ගැලීමෙන් විපතට පත් ග්‍රෑන්ඩ්පාස් පොලිස් වසමේ  පදිංචි ජනතාව රදවා සිටින ශාන්ත ජෝශප් දේවස්ථානයේ ස්ථාපිත සුරක්ෂා කදවුරේ සිටින අපේම සහෘද ජනතාව හමුවූ අතර ඔවුන් වෙනුවෙන් පොලිස් රෝහලේ වෛද්‍යවරුන් ඇතුළු හෙද කාර්ය මණ්ඩලය විසින් පවත්වන ලද වෛද්‍ය සායනය සදහාද සහභාගි විය.  ඒ සදහා බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සජීව මැදවත්ත, ජ්‍යෙෂ්ඨ නියෝජ්‍ය පොලිස්පති සහයක සේවා රාජිත ශ්‍රී දමින්ද, කොළඹ දිසාව භාර නියෝජ්‍ය පොලිස්පති, නිශාන්ත ද සොයිසා යන මහත්වරුන් ඇතුළු පිරිසක් සහභාගි වන ලදී.

දිවයිනට බලපා තිබෙන හදිසි අයහපත් කාලගුණික තත්ත්වය හේතුවෙන් ශ්‍රී ලංකාවට සංචාරය සඳහා පැමිණ සිටින ඇතැම් විදේශීය සංචාරකයින්ද අපහසුතාවයට පත්ව සිටින බවට නිරීක්ෂණය වේ.   පවතින ආපදා තතත්වය මත යම් විදේශිකයෙකු හෝ කණ්ඩායමක් විපතට පත්ව ඇති විටකදී හෝ ගුවන්තොටුපල වෙත පැමිණීමට නොහැකිව සිටී නම් ඔවුන් පිළිබඳව සොයා බලා ඔවුන්ට උපරිම ආරක්ෂාව සහ සහාය ලබා දීම ශ්‍රී ලංකා පොලිසිය විසින් සිදු කරනු ලබයි.    ඒ අනුව, පහත තොරතුරු හා දුරකථන අංක මගින් පොලිසිය දැනුවත් කළ හැකි බව දන්වා සිටිමි.   *අධ්‍යක්ෂ, පොලිස් සංචාරක කොට්ඨාසය   ජංගම දුරකථන අංකය – 071 – 8591894   *ස්ථානාධිපති, පොලිස් සංචාරක කොට්ඨාසය   ස්ථාවර දුරකථන අංකය – 011 – 2421070 ජංගම දුරකථන අංකය – 071 – 8591895   *ස්ථානාධිපති, ගුවන්තොටුපල පොලිසිය   ස්ථාවර දුරකථන අංකය – 011 – 2251475 ජංගම දුරකථන අංකය – 071 – 8591640   *ස්ථානාධිපති, ගුවන්තොටුපල සංචාරක පොලිසිය   ජංගම දුරකථන අංකය – 071 – 8596057    

දිවයිනට බලපා ඇති හදිසි අයහපත් කාලගුණික තත්වය හේතුවෙන් බොහෝ ප්‍රදේශවල  අධික වැසි, ගංවතුර, තද සුළං හා නායයෑම් තත්ත්වයන් ඇති වී ඇති අතර, ඇතැම් ප්‍රදේශ වලින් මහජනතාවට ඉවත්වීමේ නිවේදන ද නිකුත් කිරීමට මේ වන විට කටයුතු කර ඇත.   උද්ගතවී ඇති මෙම හදිසි තත්ත්වය පිළිබද නිසි සම්බන්ධීකරණයක් පවත්වා ගැනීම සදහා සහ අවශ්‍ය සහන සැලසීමට පොලිස්පතිතුමාගේ අධික්ෂණය යටතේ පොලිස්පති විශේෂ මෙහෙයුම් මැදිරියක් පොලිස් මූලස්ථානයේ  ස්ථාපිත කිරීමට කටයුතු කර ඇත.     දුරකථන අංක Whatsapp අංක Email ලිපිනය 011 – 2013051 011 – 2027148 011 – 2027149 011 – 2472757 011 – 2430912 071 – 8595880071 – 8595881071 – 8595882071 – 8595883071 – 8595884   igp.opsroom@police.gov.lk   එසේම සියලු පොලිස් බල ප්‍රදේශයන් හී ඇති වන අපදා තත්ත්වයන් වලට මුහුණදීම සදහා පොලිස් නිලධාරීන් කණ්ඩායම් වශයෙන් පොලිස් ස්ථාන වල සුදානම් කර ඇති අතර, කෙටි දැනුම් දීමකදී ක්‍රියා කිරීමට හැකිවන පරිදි බෝට්ටු, කිමිදුම්කරුවන් ඇතුළු ආපදා උපකරණ ද සූදානම් කර ඇත. එසේම මෙම අපදා තත්ත්වයන් වලට මුහුණ දීමට මෙන්ම මහජන අවශ්‍යතාවයන් සපුරාලීම සදහා අපදාකළමණාකරණ මධ්‍යස්ථානය, ත්‍රිවිධ හමුදා ඇතුළු අනෙකුත් අදාළ ආයතන වල බලධාරීන් සම්බන්ධකර ගැනීම සිදු කර ඇත. පොලිසිය විසින් අවතැන් වූ තැනැත්තන්ගේ නිවාස හා දේපළ ආරක්ෂා කිරීමට සුදුසු වැඩපිළිවලක්ද සෑම පොලිස් වසමකම ක්‍රියාත්මක කර ඇති අතර, ආරක්ෂිත ස්ථානවල රැදී සිටින අවතැන් වූ පිරිස් වෙත අවශ්‍ය ආරක්ෂාව හා සුබසාධන පහසුකම් සැලසීමටද කටයුතු යොදා ඇත.   ශ්‍රී ලංකා පොලීසිය ත්‍රිවිධ හමුදාව ආපදා කළමණාකරන මධ්‍යස්ථාන නිලධාරීන් සමග ආපදාවන්ට ලක්වුවන් බේරා ගැනීම, සහන සැලසීම, එම ප්‍රදේශ වල ආරක්ෂාව සැලසීම ආදී කටයුතු කලමණාකරනය කර සිදු කර ගැනිමට ආවශ්‍ය සහාය ලබා දෙන මෙන් ශ්‍රි ලංකා පොලිසීය මහජනතාවගෙන් ඉල්ලා සිටින අතර, අවදානම් ස්ථාන වලට යාම, ආපදා ස්ථාන නැරඹීමට යාම, ජලයෙන් යට වී ඇති මාර්ග ඔස්සේ අනාරක්ෂිත ලෙස වාහන ධාවනය කිරීම ඇතුළු අපරික්ෂාකාරී කටයුතු වල නොයෙලෙන ලෙසටත් ශ්‍රී ලංකා පොලිසීය තවදුරටත් මහජනතාව දැනුවත් කර සිටී press conference (Video)