Tharindu Withanage – Page 4 – ශ්‍රී ලංකා පොලිසිය

Author name: Tharindu Withanage

Special Events - SI

ඌව පළාතෙන් ගංජා සහ නීති විරෝධී මත්පැන් තුරන් කිරීමේ විශේෂ මෙහෙයුමක් ඇරඹෙයි

/

ඌව පළාත තුළ ව්‍යාප්ත වී ඇති ගංජා ඇතුළු විෂ මත්ද්‍රව්‍ය සහ නීති විරෝධී මත්පැන් උදුරා දැමීම ඉලක්ක කරගත් විශේෂ මෙහෙයුම් වැඩසටහනක සමාරම්භක උත්සවය 2026 පෙබරවාරි 14 වන දින පැවැත්විණි. පොලිස්පති නීතිඥ ප්‍රියන්ත වීරසූරිය මහතාගේ ප්‍රධානත්වයෙන් මෙම සමාරම්භක උත්සවය මොණරාගල කොට්ඨාසයට අයත් තණමල්විල පොලිස් ස්ථානයේදී පවත්වනු ලැබීය. මෙම අවස්ථාව සඳහා ඌව පළාත් භාර ජ්‍යෙෂ්ඨ නියෝජ්‍ය පොලිස්පති මහේෂ් සේනාරත්න මහතා, බදුල්ල දිසාව භාර නියෝජ්‍ය පොලිස්පති ජී.ඒ.එන්. ලක්සිරි මහතා, මොණරාගල දිසාව භාර නියෝජ්‍ය පොලිස්පති නිහාල් තල්දූව මහතා, මොණරාගල හා බදුල්ල කොට්ඨාස භාර නිලධාරින්, තණමල්විල ප්‍රාදේශීය ලේකම්තුමා, දිසා වෛද්‍ය නිලධාරී තුමිය හා මොණරාගල ප්‍රදේශයේ පාසල්වල විදුහල්පතිවරු ඇතුළු ප්‍රජා කමිටු සමාජිකයින් සහභාගි විය.  මෙම මෙහෙයුම හරහා ඌව පළාතේ තරුණ පරපුර මත්ද්‍රව්‍ය උවදුරෙන් බේරා ගැනීම සහ නීති විරෝධී මත්පැන් ජාවාරම් මුළුමනින්ම මර්දනය කිරීම ශ්‍රි ලංකා පොලිසියේ අපේක්ෂාවයි.

Special Events - SI

78 වන ජාතික නිදහස් දින සැමරුම් පෙළපාලිය – ශ්‍රී ලංකා පොලිසිය

/

ශ්‍රී ලංකා ප්‍රජාතාන්ත්‍රික සමාජවාදී ජනරජයේ 78 වන ජාතික නිදහස් දින සැමරුම් උත්සවය ගරු ජනාධිපති අනුර කුමාර දිසානායක මැතිතුමාගේ ප්‍රධානත්වයෙන් 2026.02.04 වන දින කොළඹ නිදහස් චතුරස්‍රය පරිශ්‍රයේ පැවැත්වුනි.  1949 වසරේ පළමු නිදහස් දින සැමරුම් උත්සවයේදී පටන් මේ දක්වා පැවැත්වූ සෑම නිදහස් දින සැමරුම් උත්සවයකදීම මෙන්ම මෙවර නිදහස් දින උත්සවයේද ආරක්ෂාව තහවුරු කරමින් ශ්‍රී ලංකා පොලිසිය, පොලිස්පති නීතිඥ ප්‍රියන්ත වීරසුරිය මහතාගේ නායකත්වය යටතේ ඉමහත් අභිමානයෙන් යුතුව නිදහස් දින පෙළපාලිය සඳහා එක්විය. පොලිස් යතුරුපැදි පෙරටු කරගනිමින් අභිමානවත්ව පැමිණි අතිගරු ජනාධිපතිතුමන් ජාතික ධජය එසවීමත් සමඟ නිදහස් දින සැමරුම් උළලේ කටයුුතු ආරම්භ විය. ජනපතිතුමන්ගේ ආමන්ත්‍රණයෙන් අනතුරුව 78 වන නිදහස් දින සැමරුම් උළලේ ත්‍රිවිධ හමුදාව, පොලිසිය, සිවිල් ආරක්ෂක බලකාය, ජාතික ශිෂ්‍ය භට බලකාය ඇතුලත් සම්මාන පෙළපාලිය ආරම්භ විය. 1866 සැප්තැම්බර් 03 වන දින පිහිටුවන ලද මෙරට නීතිය සාමය සුරක්ෂිත කිරීමේ ප්‍රමුඛතම රාජ්‍ය ආයතනය වන ශ්‍රී ලංකා පොලීසියේ සමස්ථ සම්මාන පෙළපාලිය සඳහා අණ ලබාදෙමින් පෙරටුව Henk නම් අසුපිට ගමන් කරන ලද්දේ ජ්‍යෙෂ්ඨ පොලිස් අධිකාරි නිශාන්ත චන්ද්‍රසේකර මහතාය. දෙපසින් පරිවාර අශ්වයින් පිට මත නැගී අසිපත් සහිතව  පොලිස් අධිකාරි ලසිත් අබේවික්‍රම මහතා, පොලිස් අධිකාරි ඉසුරු නිශාන්ත මහතා සහ සහකාර පොලිස් අධිකාරි රුචිර කරුණානායක මහතා ගමන් කරන ලදී. ඉන්පසුව, වසර 158 ක ප්‍රෟඩ ඉතිහාසයකට උරුමකම් කියන ශ්‍රී ලංකා පොලිසිය ධම්මෝ හවේ රක්ඛති ධම්මචාරී යන ආදර්ශ පාඨය හා ශක්තිය පිළිබිඹු වන හස්තියාගේ රුව නිර්මිත පොලිස් ධජය රැගෙන පෙරටුව ගමන් කරන ලද්දේ සහකාර පොලිස් අධිකාරි චාමර හේරත් මහතාය. දෙපසින් අසිපත් සහිතව උප පොලිස් පරීක්ෂකවරුන් දෙදෙනෙක් ගමන් කළහ.  ඉන් අනතුරුව 1873 වර්ෂයේදී ස්ථාපිත කරන ලද ශ්‍රී ලංකාවේ පැරණිතම ආරක්ෂක අංශ තූර්ය වාදක කණ්ඩායම මෙන්ම ප්‍රථම නිදහස් සැමරුම් උත්සවයේ ජාතික ගීය අභිමානයෙන් යුතුව වාදනය කළ පොලිස් තූර්යවාදක කණ්ඩායම ඩ්‍රම් මේජර් පොලිස් කොස්තාපල් පියුමාල් තිලකරත්න නිලධාරියාගේ මෙහෙයවීම යටතේ වාදනයෙන් එක්වෙමින් සහකාර පොලිස් අධිකාරි සමීර රාජපක්ෂ මහතා විසින් අණ දෙනු ලැබූ ශ්‍රී ලංකා පොලිස් බලඇණිය ඉදිරියට රැගෙන යන ලදී. පසුපසින් ප්‍රධාන සරඹ උපදේශක මහ සැරයන් පියසිරි විජේසුන්දර නිලධාරියා ගමන් කළේය. ඉන් අනතුරුව කාන්තා සහකාර පොලිස් අධිකාරි ඉනෝකා ලියනගේ මහත්මිය විසින් අණ ලබා දුන් කාන්තා පොලිස් බළඇණිය ගමන් කරන ලදී. ( ආරම්භය – 1952 ජනවාරි 01) 1983 වර්ෂයේ පිහිටුවන ලද දකුණු ආසියාවේ විශිෂ්ඨතම අතුරු හමුදාව ලෙස විරුදාවලිය ලත් පොලිස් විශේෂ කාර්ය බලකාය අභිමානයෙන් යුතුව සම්මාන පෙළපාලියට එක්ව ජනාධිපතිතුමන් වෙත උත්තමාචාර පළ කල අවස්ථාව උදාවූයේ ඉන් අනතුරුවය. නියතයි ජය ආදර්ශ පාඨය කරගත් පොලිස් විශේෂ කාර්ය බලකා ධජය ප්‍රධාන පොලිස් පරීක්ෂක චන්දන පියසේන විසින් රැගෙන යන ලදී. ඩ්‍රම් මේජර් පොලිස් කොස්තාපල් සුනෙත් පෙරේරා විසින් මෙහෙයවන ලද පොලිස් විශේෂ කාර්ය බලකා තුර්ය වාදක කණ්ඩායම පෙරටු කර ගනිමින් සහකාර පොලිස් අධිකාරී ගයාන් සංජීව විසින් අණදුන් පොලිස් විශේෂ කාර්ය බලකා ඇණිය, සම්මාන පෙළපාලියේ අභිමානය විහිදා දක්වන ලදී. ඇණිය පසුපසින් පොලිස් විශේෂ කාර්ය බලකායේ ප්‍රධාන සරඹ උපදේශක ලෙස පොලිස් සැරයන් චමින්ද හේරත් ගමන් කළේය. පොලිස් සම්මාන පෙළපාලියේ වර්ණවත්ම අවස්ථාව වන පොලිස් අධිකාරි මිනුර සෙනරත් මහතාගේ අණ පෙරටුකරගත් පොලිස් අශ්වාරෝහකයින් පෙළපාලියට එක්වූයේ ඉන් අනතුරුවය. 1921 වර්ෂයේදි බ්‍රිතාන්‍ය ජාතික පොලිස් නිලධාරීන් 08 දෙනෙකුගෙන් ආරම්භකළ පොලිස් අශ්වාරෝහක රාජකාරිය පොලිස් රාජකාරිය සඳහා අශ්වාරෝහකයින් යොදා ගන්නා ලද ලෝකයේ දෙවන අවස්ථාව ලෙස ඉතිහාසගතව ඇත. මෙවර ශ්‍රී ලංකා පොලිසියේ නිදහස් දින පෙළපාලි පුහුණුව ජ්‍යෙෂ්ඨ නියෝජ්‍ය පොලිස්පති පුහුණු හා උසස් පුහුණු සම්පත් ලියනගේ මහතාගේ අධීක්ෂණය යටතේ සිදුකෙරුනු අතර පොලිස් සම්මාන පෙළපාලියේ විස්තර කථන පිටපත සැකසීම හා නිවේදනය පොලිස් මාධ්‍ය කොට්ඨාසයේ උප පොලිස් පරීක්ෂක නිමල් අබේසිංහ මහතා විසින් සිදුකරන ලදී.

Special Events - SI

ජාතික නිදහස් දිනය වෙනුවෙන් රුක් පැළ 25,000 ක් මාතෘ භූමියට

/

පොලිස්පති නීතිඥ ප්‍රියන්ත වීරසූරිය මහතාගේ යෝජනාවක් අනුව 2026.02.04 වන දිනට යෙදෙන 78 වන ජාතික නිදහස් දිනයට සමගාමීව පරිසර පොලිස් සතියක් ප්‍රකාශයට පත්කර ඇත. ඒ් අනුව ප්‍රජා පොලිස් හා පරිසර ආරක්ෂණ දිසාවේ මූලිකත්වයෙන් දිවයින පුරා රුක් රෝපණ වැඩසටහනක් ක්‍රියාත්මක වන අතර කරඳ, මී, කොස් හා පළතුරු වැනි වටිනා ශාක පැළ 25000 ක් පමණ දිවයින පුරා පොලිස් ස්ථාන වෙත බෙදාදීමට නියමිතය.  මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජයපාල මහතාගේ ප්‍රධානත්වයෙන් හා පොලිස්පතිතුමාගේ සහභාගීත්වයෙන් 2026.02.02 වන දින උදෑසන පැළ බෙදාදීමේ නිල සමාරම්භක උත්සවය පොලිස් ක්ෂේත්‍ර බලකා මූලස්ථානයේ පවත්වමින් සංකේතාත්මකව බස්නාහිර පළාතේ පොලිස් ස්ථාන 126 ක් වෙත පැළ 2500 ක් පමණ බෙදාදෙන ලදී. වන සංරක්ෂණ දෙපාර්තමේන්තුවේ අධීක්ෂණය යටතේ නිවැරදිව රෝපණය කිරීමට අවශ්‍ය උපදෙස් සමඟ දිවයිනේ සියලු පොලිස් ස්ථාන වෙත ඉදිරි දින කිහිපය තුල පැළ ප්‍රවාහණයට නියමිත අතර රෝපණය කළ පැළ සම්බන්ධව පසු විපරමක්ද ප්‍රජා පොලිස් හා පරිසර ආරක්ෂණ දිසාව විසින් සිදුකිරීමට නියමිතය ඒ් අනුව පරිසර පොලිස් නිලධාරීන්ගේ හා සමස්ථ පොලිස් බලකායේ කැපවීමෙන් සැලකිය යුතු ශාක ඝනත්වයක් පරිසරයට එක්වනු ඇත. සොභාසුන්දරත්වය රැකගනිමින් වක්‍රාකාරයෙන් පරිසරයට යහපත් ප්‍රතිඵල එක්කිරීමේ ව්‍යාපෘතියේ ප්‍රධාන අරමුණ මුදුන්පත්කර ගැනීමට හැකිවනු ඇත. සමාරම්භක උත්සව අවස්ථාවට ජනාධිපති ජ්‍යෙෂ්ඨ අතිරේක ලේකම් (මූල්‍ය හා ආර්ථික කටයුතු) ජී.එම්.ආර්.ඩී. අපොන්සු මහතා, Clean Sri Lanka ලේකම් කාර්යාලය වෙනුවෙන් ජනාධිපති අතිරේක ලේඛම් ඉංජිනේරු එස්.පී.සී සුගීෂ්වර මහතා, මහජන ආරක්ෂක අමාත්‍යංශ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහතා, ප්‍රජා පොලිස් සහ පරිසර ආරක්ෂණ දිසාව භාර නියෝජ්‍ය පොලිස්පති ආර්.ඒ්.ආර්.එන් රාජපක්ෂ මහතා, ප්‍රජා පොලිස් කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ඩි.කේ ප්‍රියන්ත මහතා, පරිසර ආරක්ෂණ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ඩි.කේ මනෝජ් පෙරේරා මහතා ඇතුලුව රාජ්‍ය නිලධාරීන් ජ්‍යෙෂ්ඨ පොලිස් නිලධාරීන් රැසක් සහභාගී විය.

Notable Services - SI

Gov pay මගින් රථවාහන දඩ ගෙවීමේ පහසුව නුවරළිය හා හැටන් කොට්ඨාසයන්ට

/

ඩිජිටල් ආර්ථික අමාත්‍යංශය, ICTA ආයතනය සහ Lanka pay ආයතනය එක්ව එළිදැක්වූ Gov pay මාර්ගගත ගෙවීමේ ක්‍රමය භාවිතා කරමින් නුවරඑළිය හා හැටන් කොට්ඨාසයන් තුළදී රථ වාහන දඩ මුදල් ගෙවීමේ හැකියාව ලබාදී තිබේ.  සමාරම්භය සඳහා පැවති දැනුවත් කිරීමේ හමුව නුවරඑළිය දිසාව භාර නියෝජ්‍ය පොලිස්පති ප්‍රියන්ත චන්ද්‍රසිරි මහතාගේ සහ රථවාහන හා මාර්ග ආරක්ෂන දිසාව නියෝජ්‍ය පොලිස්පති සේනාධීර මහතාගේ ප්‍රධානත්වයෙන් 2026.02.02 වන දින උදෑසන නුවරඑළිය දිස්ත්‍රික් ලේකම් කාර්යාලයට අයත් ආශ්චර්යා උත්සව ශාලාවේදී පැවැත්වුනි.  මාර්ගගත (Online) දඩ ගෙවීමේ ක්‍රමය භාවිතා කිරීමට මෙන්ම ජනතාව දැනුවත් කිරීමට අවශ්‍ය තාක්ෂණික දැනුම නිලධාරීන් වෙත ලබාදීම සඳහා ICTA ආයතනය නියෝජනය කරමින් ව්‍යාපෘති කළමණාකාර උදාරි විතානගේ මහත්මිය, තාක්ෂනික නිලධාරී ඉනුක මායාකඩුව මෙන්ම Lanka Pay ආයතනයේ ව්‍යාපෘති කළමනාකරු අමිල ඒ්කනායක මහතා මෙම අවස්ථාව සහභාගී වූ අතර ප්‍රධාන දේශනය රථවාහන හා මාර්ග ආරක්ෂාව භාර නියෝජ්‍ය පොලිස්පති ඩබ්ලිව්.පී.ජේ. සේනාධීර මහතා විසින් පවත්වන ලදී. වැඩසටහන අතරතුර මාර්ගගත (Online) දඩ ගෙවීමේ ක්‍රමය භාවිතා කිරීම සඳහා සංකේතාත්මකව නවීන ජංගම දුරකථන නිලධාරීන් වෙත ලබාදීමද සිදුකෙරුණි. මින් ඉදිරියට ඔබට Gov Pay ගෙවීම් ක්‍රමය මගින් මධ්‍යම පළාත තුල රථ වාහන දඩ ගෙවීම සඳහා පොලිස් නිලධාරින්ගෙන් උපදෙස් ඉල්ලා සිටි හැක. දඩ මුදල Online (මාර්ගගතව) ගෙවූ පසු එම අවස්ථාවේදීම ඔබේ රියදුරු බලපත්‍රය ලබාගත හැකිය. අවශ්‍යනම් පසුව අවස්ථාවක ගෙවීම සඳහා https://govpay.lk/si/spot-fine උපදෙස් පරිශීලනය කරමින් කටයුතු කළ හැකි බවත් දැනුම්දෙන්නෙමු.

Notable Services - SI

Gov pay මගින් රථවාහන දඩ ගෙවීමේ පහසුව මහනුවර, මාතලේ,ගම්පොල,තෙල්දෙණිය කොට්ඨාසයන්ට

/

ඩිජිටල් ආර්ථික අමාත්‍යංශය, ICTA ආයතනය සහ Lanka pay ආයතනය එක්ව එළිදැක්වූ Gov pay මාර්ගගත ගෙවීමේ ක්‍රමය භාවිතා කරමින් මධ්‍යම පළාත තුළ රථ වාහන දඩ මුදල් ගෙවීමේ හැකියාව ලබාදී තිබේ.  Gov pay භාවිතා කිරීමේ තාක්ෂණික ක්‍රමවේදය පිළිබඳව පොලිස් නිලධාරීන් දැනුවත් කිරීමේ හමුව 2026.02.02 වන දින නුවරඑළිය කොට්ඨාසයට හා හැටන් කොට්ඨාසයට පැවැත්වීමෙන් අනතුරුව 2026.02.03 වන දින මහනුවර පොලිස් මූලස්ථානයේ ශ්‍රවනාගාරයේදී මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පති ලලිත් පතිනායක මහතාගේ හා රථවාහන හා මාර්ග ආරක්ෂන දිසාව නියෝජ්‍ය පොලිස්පති සේනාධීර මහතාගේ ප්‍රධානත්වයෙන් මහනුවර, මාතලේ,ගම්පොල,තෙල්දෙණිය පොලිස් කොට්ඨාසයන්ට පැවැත්වුනි. මාර්ගගත (Online) දඩ ගෙවීමේ ක්‍රමය භාවිතා කිරීමට මෙන්ම ජනතාව දැනුවත් කිරීමට අවශ්‍ය තාක්ෂණික දැනුම නිලධාරීන් වෙත ලබාදීම සඳහා  ප්‍රවාහන/අධිවේගී මාර්ග සහ නාගරික සංවර්ධන අමාත්‍යාංශයේ උපදේශක හර්ෂන පුරසිංහ මහතා, ඩිජිටල් ආරක්ෂක උපදේශක සුමුදු රත්නායක මහතා, Lankapay ආයතනය නියෝජනය කරමින් එහි විධායක නිලධාරී චන්දන සිල්වා මහතා සහ අමිල ඒ්කනායක මහතා, ICTA ආයතනයේ ව්‍යාපෘති කළමනාකරණ ‍උදාරි විතානගේ මහත්මිය සම්පත් දායකයින් ලෙස වැඩසටහන එක් විය.  වැඩසටහන අතරතුර මාර්ගගත (Online) දඩ ගෙවීමේ ක්‍රමය භාවිතා කිරීම සඳහා සංකේතාත්මකව නවීන ජංගම දුරකථන නිලධාරීන් වෙත ලබාදීමද සිදුකෙරුණි. මින් ඉදිරියට ඔබට Gov Pay ගෙවීම් ක්‍රමය මගින් මධ්‍යම පළාත තුල රථ වාහන දඩ ගෙවීම සඳහා පොලිස් නිලධාරින්ගෙන් උපදෙස් ඉල්ලා සිටි හැක. දඩ මුදල Online (මාර්ගගතව) ගෙවූ පසු එම අවස්ථාවේදීම ඔබේ රියදුරු බලපත්‍රය ලබාගත හැකිය. අවශ්‍යනම් පසුව අවස්ථාවක ගෙවීම සඳහා https://govpay.lk/si/spot-fine උපදෙස් පරිශීලනය කරමින් කටයුතු කළ හැකි බවත් දැනුම්දෙන්නෙමු.

Notable Services - SI

78 වන නිදහස් සැමරුම් දිනයට සමගාමීව ප්‍රජා පොලිස් කොට්ඨාසය

/

ජීවිතයේ සැඳෑ සමය වැඩිහිටි සුරාක්ෂා නිවාසයක් තුළ ගෙවමින් පසුවන ජ්‍යෙෂ්ඨ පුරවැසියන් පිරිසක් සැනසීම සඳහා ප්‍රජා පොලිස් කොට්ඨාසයේ නිලධරයන් 2026.02.05 වන දින උදෑසන බොරැල්ල ලංකාරාම විහාරස්ථානය වෙත ගියහ. වැඩිහිටියන් සෙනෙහසින් රැකබලා ගැනීම බාල පරම්පරාවට හුරු පුරුදු කිරීම අරමුණුකරගනිමින් ප්‍රජා පොලිස් කොට්ඨාසයෙන් පවත්වාගෙන යනු ලබන ටයිනි ටොට්ස් පෙර පාසල් ත්‍රිත්වයේ දරු දැරියන් සමූහයක්ද මෙම අවස්ථාවට එක් කර ගත් අතර පොලිස් බටහිර තූර්ය වාදක කණ්ඩායමේ සංගීතය මුසු කරගනිමින් රසාස්වාදයෙන් පිරි සංගීතමය හෝරා කිහිපයකින් වැඩිහිටි පිරිසට ලබාදීමට කටයුතු කරන ලදී. හාස්‍ය උත්පාදිත රංගනයේ හා ගායනයේ නම් දැරූ කලාකරුවන් දෙදෙනෙක් වන සුනෙත් චිත්‍රානන්ද මහතා සහ අනුර ශ්‍රීනාත් මහතා වැඩසටහන සඳහා එක්වෙමින් සංගීත හෝරා කිහිපය තවත් රසගැන්වීය.  එදින වැඩිහිටි නිවාසය සඳහා දිවා ආහාර වේලද ප්‍රජා පොලිස් කොට්ඨාසය විසින් පිරිනමන ලදී. පොලිස්පතිතුමාගේ සංකල්පයක් මත ප්‍රජා පොලිස් සහ පරිසර දිසාව භාර නියෝජ්‍ය පොලිස්පති රොෂාන් රාජපක්ෂ මහතාගේ සංවිධානයෙන්, ප්‍රජා පොලිස් කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධීකාරී ඩි.කේ ප්‍රියන්ත මහතාගේ මෙහෙයවීමෙන් පැවැත්වූ වැඩසටහනට ආරාධනය පරිදි මහජන ආරක්ෂක හා පාර්ලිමේන්තු කටයුතු නියෝජ්‍ය අමාත්‍ය සුනිල් වටගල මහතාගේ සහභාගීීත්වය හිමිවිය.

Special Events - SI

නවීකරණය කළ පොල්පිටිය පොලිස් ස්ථානය ජනතා අයිතියට

/

හැටන් කොට්ඨාසයේ පොල්පිටිය ග්‍රාමය වෙනුවන් ඉදිකළ නව පොලිස් ස්ථානය 2026.02.06 වන දින මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතාගේ ප්‍රධානත්වයෙන්, පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් විවෘත කෙරුණි. නුවරඑළිය දිස්ත්‍රික් සංවර්ධන කමිටු සභාපති පාර්ලිමේන්තු මන්ත්‍රී මංජුල සුරවිරආරච්චි මහතා, නුවරඑලිය දිසාව නියෝජ්‍ය පොලිස්පති ප්‍රියන්ත චන්ද්‍රසිරි මහතා, හැටන් කොට්ටාශ භාර ජේෂ්ඨ පොලිස් අධිකාරි ප්‍රදීප් විරසේකර මහතා ඇතුලු හැටන් පොලිස් කොට්ටාශයේ සියලුම ස්ථානාධිපතිවරුන්, රාජ්‍ය නිලධාරීන් රැසක් විවෘත කිරීමේ උත්සව සභාවට සපැමිණ සිටි අතර පොල්පිටිය පොලිස් ස්ථානයේ ස්ථානාධිපතිවරයා වන පොලිස් පරීක්ෂක පි.එච්.එම්.එන් උපුල් කුමාර මහතා විසින් සැවොම ගෞරවාන්විත පිළිගන්නා ලදී. පොලිස්පතිතුමන් උත්සව සභාව අමතමින් සියලු පහසුකම් සහිත ස්ථිර, නවීන ගොඩනැගිල්ලක ස්ථාපනය කර ජනතා අයිතියට පත් කිරීමට ලැබීම පිළිබඳව සිය නිහතමානී සතුට ප්‍රකාශකළ අතර ලංකා විදුලිබල මණ්ඩලයට අයත් පර්චස් 78.43 ක භූමිය පවරා ගෙන 2025 නොවැම්බර් මාසයේ සිට මෙලෙස  නව පොලිස් ස්ථානයක් ලෙස ගොඩනැංවීම වෙනුවෙන් සහයෝගය දැක්වූ මහජන ආරක්ෂක අමාත්‍යංශය ප්‍රධාන සියලුම පාර්ශව වෙත සිය ස්තූතිය පළකලේය. 2021 වසරේදී කුලී පදනම මත ලබාගත් කුඩා නිවසක පවත්වාගෙන යමින් අවම ඉඩ පහසුකම් යටතේ වුවද ප්‍රදේශයේ ග්‍රාම නිලධාරී වසම් 07ක වෙසෙන 9,000කට අධික පිරිසක් වෙනුවෙන් සුවිශාල පොලිස් සේවයක් සැලසූ පොල්පිටිය පොලිස් ස්ථානය, මේ අනුව මෙතැන් සිට සියලු පහසුකම් සහිතව මැනවින් සකස්කළ පොලිසියටම වෙන්වූ භූමියක වඩාත් කාර්යක්ෂමව මහජන මෙහෙවරට කැපවනු ඇත.

Notable Services - SI

රූ සිරි රූපලාවන්‍යාගාරයක් අනුරාධපුර පොලිස් ස්ථානයට

/

පොලිස්පතිතුමාගේ භාර්යයාව, සේවා වනිතා ඒකකයේ සභාපතිනි නිල්මිණී සමරතුංග මහත්මියගේ සංකල්පයක් අනුව මින් පෙර කොළඹ පොලිස් ක්ෂේත්‍ර බලකා මූලස්ථානයේ හා පාර්ලිමේන්තු වෙළඳ සංකීර්ණය තුල  රූ සිරි නමින් ස්ථාපිත කළ රූපලාවන්‍යාගාරය දිවයිනේ සෙසු ප්‍රදේශකරා ද ව්‍යාප්තකිරීම ආරම්භකරමින් අනුරාධපුර පොලිස් ස්ථානය පරිශ්‍රයේ සකස්කළ නව රූපලාවන්‍යාගාරය  2026.02.07 වන දින විවෘත කරන ලදී. ගැටළු ඉදිරිපත්කිරීම සඳහා පොලිස් ස්ථානය වෙත පැමිණීමට සාමාන්‍ය ජනතාව දිරිගන්වමින් පොලිස් ස්ථාන කාන්තාවන්ට සමීප කරවීම ප්‍රධාන අරමුණක් කර ගනිමින් ඉතා සහනදායී මිලක් යටතේ මෙම රූපලාවන්‍යාගාරය මගින් සේවා සැපයීමට නියමිත අතර මෙමගින් රූපලාවන්‍ය ක්ෂේත්‍රයේ ප්‍රවීනත්වය ලබාගත් පොලිස් නිලධාරීන්ගේ පවුල්වල සාමාජිකාවන් උදෙසා රැකියා අවස්ථාවන්ද ලබාදීමට හැකිවේ. සේවා වනිතා ඒකකයේ සභාපතිනි නීතිඥ නිල්මිණී සමරතුංග මහත්මියගේ ප්‍රධානත්වයෙන් අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරී තිළිණ හේවා පතිරණ මහතා, අනුරාධපුර දිස්ත්‍රික් සහකාර පොලිස් අධිකාරී 1 ප්‍රභාත් විතානගේ මහතා ඇතුලුව අනුරාධපුර මූලස්ථාන ප්‍රධාන පොලිස් පරීක්ෂක ජයවීර, අනුරාධපුර කොට්ඨාස ළමා හා කාන්තා කාර්යංශයේ ස්ථානාධිපති ප්‍රධාන පොලිස් පරීක්ෂක ශ්‍යාමලී දිසානායක, පොලිස් සේවා වනිතා ඒ්කකයේ ස්ථානාධිපති ප්‍රධාන පොලිස් පරීක්ෂක පද්මිණී ජයවීර යන මහත්ම මහත්මීන්ගේ සහභාගීත්වයෙන් විවෘත කිරීම සිදු කෙරුණි.

Police News - SI

අභිමානවත් 78 වන ජාතික නිදහස් දින උත්සවය හා එහි පෙරහුරු පැවැත්වෙන දිනයන්හි ක්‍රියාත්මක වන විශේෂ රථවාහන සැලැස්මක්

/

අභිමානවත් 78 වන ජාතික නිදහස් දින සැමරුම් උත්සවය 2026.02.04 වන දින නිදහස් චතුරශ්‍ර පරිශ්‍රයේදී උත්කර්ශවත් අයුරින් පැවැත්වීමට නියමිතව ඇත.   උත්සවයට සමඟාමීව පැවැත්වෙන පූර්ව පෙරහුරු වැඩසටහන් 2026.01.30 වන දින සිට 2026.02.02 වන දින දක්වා පැවැත්වෙන අතර එම දිනයන් හා 2026.02.04 වන දින නිදහස් උත්සව දිනය මූලික කරගෙන කොළඹ ප්‍රදේශයේ රථවාහන ගමනාගමනය සීමා කිරීම, විකල්ප මාර්ග භාවිතා කිරීම පිළිබඳව විශේෂ රථවාහන සැළැස්මක් ක්‍රියාත්මක කිරීමට සැලසුම් කර ඇත.  ඒ අනුව, 2026.01.30, 31 හා 2026.02.02 දින පෙරහුරු පුහුණුවීමේ කටයුතු සඳහා පැය 0745 සිට පැය 1330 දක්වාත්, පූර්ණ පෙරහුරුව පැවැත්වෙන 2026.02.01 වන දින පැය 0500 සිට පැය 1330 දක්වා සහ 2026.02.04 වන දින පැය 0500 සිට නිදහස් දින උත්සවය අවසන් වන තුරු අවස්ථානුකූලව රථවාහන ගමනාගමනය සීමා කෙරෙනු ඇත. 1. නිදහස් මාවත නිදහස් වටරවුමෙන් නිදහස් චතුරශ්‍රය දෙසට ඇතුළුවීම. 2. ස්ටැන්ලි විජේසුන්දර මාවතෙන් පදනම් ආයතනය දෙසට ඇතුළුවීම. 3. බෞද්ධාලෝක මාවත, ටොරින්ටන් හන්දියෙන් ප්‍රේමකීර්ති ද අල්විස් මාවතට ඇතුළුවීම. 4. බෞද්ධාලෝක මාවත, ආර්.එෆ්.පී. හන්දියෙන් මේට්ලන්ඩ් පෙදෙසට ඇතුළුවීම. 5. විජේරාම මාවත, විද්‍යා මාවත, හන්දියෙන් විද්‍යා මාවතට ඇතුළුවීම. 6. මේට්ලන්ඩ් ක්‍රසන්ට් ආර්.ජී. සේනානායක මාවත හන්දියෙන් නිදහස් වටරවුම දෙසට ඇතුළුවීම. 7. නිදහස් වටරවුමෙන් මේට්ලන්ඩ් ක්‍රසන්ට් දෙසට ඇතුළුවීම. 8. හෝර්ටන් පෙදෙස මේට්ලන්ඩ් ක්‍රසන්ට් හන්දියෙන් නිදහස් වටරවුම දෙසට ඇතුළු වීම. විශේෂ රථවාහන සැලැස්මට අනුව 2026.02.04 වන දින උත්සව අවස්ථාවේ පැය 0300 සිට ජාතික නිදහස් සැමරුම් උත්සවය අවසන් වන තෙක් පහත සඳහන් මාර්ගයන්හි ගමනාගමනය සීමා කරනු ඇත.  1. හෝර්ටන් වටරවුමෙන් ආනන්ද කුමාරස්වාමි මාවතට ඇතුළු වීම. 2. පුස්තකාල හන්දියෙන් ආනන්ද කුමාරස්වාමි මාවත හෝර්ටන් වටරවුම දෙසට ඇතුළුවීම. 3. ධර්මපාල මාවතෙන් එෆ්.ආර්. සේනානායක මාවතට ඇතුළුවීම. 4. කන්නංගර මාවතෙන් එෆ්.ආර්. සේනානායක මාවතට ඇතුළුවීම. 5. නිදහස් මාවත නිදහස් වටරවුමෙන් නිදහස් චතුරශ්‍රය දෙසට ඇතුළුවීම. 6. ස්ටැන්ලි විජේසුන්දර මාවතෙන් පදනම් ආයතනය දෙසට ඇතුළුවීම. 7. බෞද්ධාලෝක මාවත, ටොරින්ටන් හන්දියෙන් ප්‍රේමකීර්ති ද අල්විස් මාවතට ඇතුළු වීම. 8. බෞද්ධාලෝක මාවත, ආර්.එෆ්.පී. හන්දියෙන් මේට්ලන්ඩ් පෙදෙසට ඇතුළුවීම. 9. විජේරාම මාවත, විද්‍යා මාවත හන්දියෙන් විද්‍යා මාවතට ඇතුළුවීම. 10. මේට්ලන්ඩ් ක්‍රසන්ට් ආර්.ජී. සේනානායක මාවත හන්දියෙන් නිදහස් වටරවුම දෙසට ඇතුළුවීම. 11. නිදහස් වටරවුමෙන් මේට්ලන්ඩ් ක්‍රසන්ට් දෙසට ඇතුළුවීම. 12. හොර්ටන් පෙදෙස මේට්ලන්ඩ් ක්‍රසන්ට් හන්දියෙන් නිදහස් වටරවුම දෙසට ඇතුළුවීම.  • ඉහත දිනයන්හිදි ගමනාගමනය සීමා කරනු ලබන මාර්ගයන්හි පදිංචිකරුවන් හා ආයතන වෙත රාජකාරියට බාධාවක් නොවන අයුරින් ගමන් කිරීමට අවස්ථාව සලසා ඇත.  

Police News - SI

2026.01.30 වන දින නුගේගොඩ ගම්සභා හන්දිය අසල විරෝධතාවය සම්බන්ධව

/

026.01.30 වන දින නුගේගොඩ ගරු මහේස්ත්‍රාත් අධිකරණයේ විභාගවූ නඩුවක් සඳහා පෙනී සිටි නීතිඥවරුන් දෙදෙනෙකු නඩු විභාගයෙන් අනතුරුව කාර් රථයකින් පිටව යන අවස්ථාවේ නුගේගොඩ ගම්සභා හන්දිය ආසන්නයේදී පිරිසක් කාර් රථයට මාර්ගය අවහිර කර මරණ තර්ජනය කරමින් වාහනයට පහරදී අනර්ථයක් සිදුකළ බව සඳහන් පැමිණිල්ලක් මිරිහාන පොලිස් ස්ථානයට වෙත ලැබී තිබේ. සිද්ධිය සම්බන්ධයෙන් මිරිහාන පොලිස් ස්ථානය ඇතුළු පොලිස් කණ්ඩායම් තුනක් විමර්ශන ආරම්භ කර ඇති අතර 2026.02.01 වන අද දින අළුයම මිරිහාන පොලිස් ස්ථානයේ නිලධාරින් කණ්ඩායමක් විසින් මාදම්පේ පොලිස් වසමේ කජුලන්දවත්ත ප්‍රදේශයේදී සිද්ධියට සම්බන්ධ සැකකරුවෙකු අයුතු ජන රාශියක සාමාජිකයෙකුව සිටිමින් අයුතු අවහිරය, සාපරාධී බියගැන්වීම සහ අනර්ථය යන චෝදනා යටතේ අත්අඩංගුවට ගෙන ඇත. සැකකරු වයස අවුරුදු 43 ක් වන කජුලන්දවත්ත, මාදම්පේ ප්‍රදේශයේ පදිංචිකරුවෙකි. නීතිඥ වෘත්තියට බාධාකිරීම සම්බන්ධව සියළු සැකකරුවන් කඩිනමින් අත්අඩංගුවට ගෙන ගරු අධිකරණය වෙත ඉදිරිපත් කිරීමට නියමිතය.  

Scroll to Top