Author name: Tharindu Withanage

පොලිස් පවුල් සුබසාධක සංගමය මඟින් පවත්වාගෙන යනු ලබන, මරදාන, කිව් පාර සහ පොලිස් ක්ෂේත්‍ර බලකා මූලස්ථානයේ ස්ථාපිත “ටයිනි ටොට්ස්” (Tiny Tots) පෙරපාසල් ත්‍රිත්වයේ දූ දරුවන්ගේ 2025 වාර්ෂික විවිධ ප්‍රසංගය 2026 ජනවාරි 09 වන දින කොළඹ බෞද්ධ සංස්කෘතික මධ්‍යස්ථාන ශ්‍රවණාගාරයේදී ඉතා උත්කර්ෂවත් අයුරින් පැවැත්විණි. පසුගිය වසරේ පැවැත්වීමට නියමිතව තිබූ මෙම ප්‍රසංගය, දිවයින පුරා බලපෑ අයහපත් කාලගුණික තත්ත්වය හේතුවෙන් තාවකාලිකව කල් දැමීමට සංවිධායක මණ්ඩලය පියවර ගෙන තිබුණි. මෙම අවස්ථාව සඳහා ප්‍රධාන ආරාධිත අමුත්තන් ලෙස පොලිස්පති ප්‍රියන්ත වීරසූරිය මහතා සහ සභාපතිණිය, පොලිස් සේවා වනිතා ඒකකය සහ පොලිස් පවුල් සුබසාධක සංගමය නිල්මිණී සමරතුංග මැතිණිය, ජ්‍යෙෂ්ඨ නියෝජ්‍ය පොලිස්පති රාජිත ශ්‍රී දමින්ද මහතා, නියෝජ්‍ය පොලිස්පති ඩබ්.වී. ගිණිගේ මහතා ඇතුළු පොලිස් සේවා වනිතා ඒකකයේ හිටපු සභාපතිණියන් ඇතුළු සම්භාවනීය අමුත්තන් රැසක් සහභාගී වූහ. කුඩා දූ දරුවන්ගේ සහජ දක්ෂතා සහ නිර්මාණශීලීත්වය විදහා දක්වමින් ඉදිරිපත් කළ විචිත්‍රවත් නර්තන, ගායන සහ රංගනයන්ගෙන් මුළු ප්‍රසංගයම අලංකාරවත් විය. පොලිස් පවුල්වල දූ දරුවන්ගේ සුබසාධනය සහ මුල් ළමාවිය සංවර්ධනය වෙනුවෙන් පොලිස් පවුල් සුබසාධක සංගමය සිදුකරනු ලබන මෙහෙවර මෙහිදී ඇගයීමට ලක්විය. දරුවන්ගේ දක්ෂතා ඇගයීම සඳහා සහභාගී වූ දෙමාපියන් සහ පොලිස් නිලධාරීන්ගෙන් ශ්‍රවණාගාරය පිරී පැවති අතර, එය ඉතාමත් සාර්ථක අයුරින් නිමාවට පත්විය.

මෙරට පුද්ගලයින් රථ වාහන වෙනුවෙන් රක්ෂණ සමාගම් මගින් වාර්ෂිකව ලබාගන්නා ප්ලාස්ටික් රක්ෂණ කාඩ්පත ඉදිරියේදී ඉවත්කෙරෙනු ඇත. ඒ් වෙනුවට ශ්‍රී ලංකා රක්ෂණ නියාමන කොමිෂන් සභාවේ මැදිහත් වීම මත සකස්කළ නව ස්ථීර ඩිජිටල් රක්ෂණ කාඩ්පතක් ලබාදීමට අවශ්‍ය කටයුතු සිදුවෙමින් පවතී. මාර්ගයේදී රක්ෂණ කාඩ්පත පරීක්ෂා කරනු ලබන පොලිස් නිලධාරියා මෙන්ම පොලිස්පති නීතිඥ ප්‍රියන්ත වීරසූරි මහතා ඇතුලු ජ්‍යෙෂ්ඨ පොලිස් නිලධාරීන් මෙම නව වැඩපිළිවෙල සම්බන්ධව දැනුවත්කිරීම සඳහා මහජන ආරක්ෂක අමාත්‍යංශය හා ශ්‍රී ලංකා රක්ෂණ නියාමන කොමිෂන් සභාව විසින් සංවිධානය කළ හමුවක් 2026.01.07 වන දින සවස මහජන ආරක්ෂක සහ පාර්ලිමේන්තු කටයුතු අමාත්‍යංශ ශ්‍රවනාගාරයේදී පැවැත්වුනි. ගරු පාර්ලිමේන්තු කටයුතු හා මහජන ආරක්ෂක අමාත්‍ය ආනන්ද විජේපාල මහතා, ගරු පාර්ලිමේන්තු කටයුතු හා මහජන ආරක්ෂක නියෝජ්‍ය අමාත්‍ය සුනිල් වටගල මහතා, මහජන ආරක්ෂක අමාත්‍යංශයේ ලේකම් රවී සෙනෙවිරත්න මහතා සහ පොලිස්පති නීිතිඥ වීරසූරිය මහතා මෙම හමුව සඳහා මූලිකත්වය ගෙන සහභාගී වූ අතර, රක්ෂණ නියාමන කොමිෂන් සභාවේ වත්මන් සභාපති ආචාර්ය අජිත් රවීන්ද්‍ර ද මෙල් මහතා විසින් එහිදී මෙම නව ඩිජිටල් ක්‍රියාවලියේ අරමුණු හා ප්‍රතිලාභ පිළිබඳව දැනුවත් කෙරෙන ප්‍රධාන දේශනය පවත්වන ලදී. මේ වන විට භාවිතයේ පවතින ප්ලාස්ටික් රක්ෂණ කාඩ්පත් වාර්ෂිකව කල් ඉකුත්වීමෙන් පරිසරයට එකතුවී සිදුවන පරිසර දූෂණය, නව කාඩ්පත් සකස්කිරීමට වැයවන අධික මූල්‍ය පිරිවැය වැනි රක්ෂණ ක්ෂේත්‍රයේ කාඩ්පත ඇසුරින් අවස්ථානුකූලව ඇතිවන වෙනත් ගැටළු රැසක් විසඳාගැනීමේ හැකියාව මෙම නව ක්‍රමය ඇසුරින් උදාවනු ඇති බව එතුමා පොලිස් නිලධාරීන් අමතා ප්‍රකාශ කළේය. වැඩිදියුණුකළ ශ්‍රී ලංකා පොලිසියේ රිය අනතුරු දත්ත කළමනාකරණ පද්ධතිය පහසුවෙන් පරිහරනය කිරීමට ඉඩ සලසමින් හා මෙම නව රක්ෂණ ඊ-කාඩ්පත භාවිතා කිරීම සඳහා අවශ්‍ය තාක්ෂණික මෙවලමක් ලෙස ටැබ් යන්ත්‍ර 500ක් බස්නාහිර පළාතේ රථවාහන පොලිස් නිලධාරීන් අතර බෙදාදීම ආරම්භ කරමින් වැඩසටහන අතරතුර ටැබ් යන්ත්‍ර 150 ක් සංකේතාත්මක පොලිස් නිළධාරීන් අතර බෙදා දීම සිදුවිය. ශ්‍රී ලංකා රක්ෂණ නියාමන කොමිෂන් සභාවේ අධ්‍යක්ෂ ජෙනරාල් දමයන්ති ප්‍රනාන්දු මහත්මිය, ශ්‍රී ලංකා පොලිසියේ පරිපාලනය භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතා, ශ්‍රී ලංකා රක්ෂණ කරුවන්ගේ සංගමයේ සභාපති ලසිත විමරත්න මහතා සහ රක්ෂණ සමාගම්වල විධායක නිලධාරීන් ඇතුලු ජ්‍යෙෂ්ඨ රාජ්‍ය නිලධාරීන්, පොලිස් නිලධාරීන් මෙම හමුව සඳහා සඳහා සහභාගී වූහ.

දිට්වා සුළි කුණාටුවෙන් පීඩාවට පත් ජනතාවට සහන සැලසීම සහ විනාශ වූ යටිතල පහසුකම් යළි ගොඩනැගීම වෙනුවෙන් රජය මගින් පිහිටුවන ලද Rebuilding Sri Lanka අරමුදල ශක්තිමත් කිරීම සඳහා ශ්‍රී ලංකා පොලිසිය රුපියල් මිලියන 50ක මූල්‍ය පරිත්‍යාගයක් සිදු කරන ලදී. මෙම මූල්‍ය පරිත්‍යාගයට අදාළ චෙක්පත 2026.01.06 වන දින ජනාධිපති ලේකම් කාර්යාලයේදී ජනාධිපති ලේකම් ආචාර්ය නන්දික සනත් කුමානායක මහතා වෙත නිල වශයෙන් භාර දෙන ලදී. මහජන ආරක්ෂක සහ පාර්ලිමේන්තු කටයුතු පිළිබඳ අමාත්‍යාංශයේ ලේකම් රවී සෙනවිරත්න මහතා සහ පොලිස්පති නීතිඥ ප්‍රියන්ත වීරසූරිය මහතා විසින් මෙම ප්‍රදානය සිදු කරන ලදී. ශ්‍රී ලංකා පොලිසියේ සමස්ත නිලධාරීන්ගේ වැටුපෙන් ලබාදුන් දායකත්වය මත මෙම අරමුදල රැස්කර ඇති අතර, රටේ නීතිය හා සාමය ආරක්ෂා කරන අතරතුර ජාතික ආපදාවකදී රට වෙනුවෙන් තම වගකීම ඉටු කිරීමට පොලිස් නිලධාරීන් මෙම කැපවීම සිදු කර ඇත.

ශ්‍රී ලංකා පොලිසිය වන අපගේ ප්‍රධාන අරමුණ මාතෘ භූමිය තුල නීතිය සුරක්ෂිත කර පවත්වාගනිමින් මහජනතාව වන අප සියල්ලට එදිනෙදා ජීවිතය සාමකාමීව ගතකිරීමට අවශ්‍ය පසුබිම සකසා දීමයි.  ඒ් සඳහා අවශ්‍ය පිරිස් බලය ශක්තිමත් කරවීම වෙනුවෙන් අප හා එක්වූ තවත් ජවසම්පන්න තරුණ කණ්ඩායමක් අභිමානවත් රාජ්‍ය නිලධාරීන් ලෙස සමාජ ගත කරවීම 2026.01.04 වන දින සවස පහලගම පොලිස් විද්‍යාලයේදී උත්සවාකාරයෙන් සිදුකෙරුනි. මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජයපාල මහතාගේ ප්‍රධානත්වයෙන්, මහජන ආරක්ෂක අමාත්‍යංශ ලේකම් රවී සෙනෙවිරත්න මහතාගේ සහ පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් පැවති මෙම අභිමානවත් විසිරයාමේ උළලේදී පොලිස් කොස්තාපල්වරුන් 240 දෙනෙකු වශයෙන් හා ආධුනික පොලිස් රියදුරු 74 දෙනෙකු වශයෙන් 2025.06.08 වන දින නිකවැරටිය හා පහලගම යන පොලිස් ස්ථාන වෙත වාර්තා කළ ආධුනික නිලධාරීන් 314 දෙනෙකු විසිරයන ලදී. මාස 07 ක කාලයක් නීතිය, ප්‍රයෝගික පොලිස් පුහුණුව වැනි පොලිස් සේවයට අවශ්‍ය සියලු ශිල්පයන් පොලිස් විදු මව් සෙවණේ ප්‍රගුණ කර මූලික පුහුණුව සම්පූර්ණ කළ ඔවුන් අතරින්  සුවිශේෂීව කැපී පෙනුනු පහත නම් සඳහන් ආධුනික නිලධාරීන්ව ඇගයීමද උළෙල අතරතුර සිදුකෙරුනි. දක්ෂතම වෙඩික්කරු – ආධුනික පොලිස් කොස්තාපල් 107695 ඉමේෂ් පසිදු විදාන පතිරණ. දක්ෂතම රියදුරු – ආධුනික පොලිස් කොස්තාපල් රියදුරු 107837 ආනන්ද දිසානායකගේ ඩිල්ෂාන්. නීතිය පිළිබඳව දක්ෂතම ආධුනික නිලධාරී –  – ආධුනික පොලිස් කොස්තාපල් 107616 ජයරන්ගේ තේණුක දේමින්ද සේනානායක. සෑම ආකාරයෙන්ම අති දක්ෂතම ආධුනික කොස්තාපල් රියදුරු – ආධුනික පොලිස් කොස්තාපල් රියදුරු 107812 ඌවේ හන්ගිලි ගෙදර චතුර ධනංජය හේරත්. සෑම ආකාරයෙන්ම අති දක්ෂතම ආධුනික පොලිස් කොස්තාපල් – ආධුනික පොලිස් කොස්තාපල් 107599 දිසානායක මුදියන්සේලාගේ ශාමික දිල්ශාන් දිසානායක. පොලිස් කොස්තාපල්වරුන් ඇණි 10 කින් සමන්විත වූ මෙවර විසිරයාමේ උළෙලේ සම්මාන පෙළපාලිය ප්‍රධාන අණදෙන නිලධාරී ලෙස මෙහෙයවනු ලැබුවේ නෙදර්ලන්තයෙන් ගෙන්වූ බීච්වේලි නම් අසු පිටනැගි කොළඹ මධ්‍යම කොට්ඨාසයේ පොලිස් අධිකාරී මිනුර සෙනරත් මහතා විසින්ය. දෙවන අණදෙන නිලධාරී ලෙස ඇල්පිටිය පොලිස් විද්‍යාලයේ පාලන ස්ථානාධිපති ප්‍රධාන පොලිස් පරීක්ෂක පි.ඩි මිලාන් ඔෂන්ත මහතා කටයුතු කරන ලදී. ඇණි පිටිය වෙත ගෙන ඒ්ම පහලගම පොලිස් විද්‍යාලයේ පොලිස් සැරයන් 33340 ප්‍රියන්ත නිලධාරියා විසින් ඉටුකරන ලදී. විසිරයන නිලධාරීන්ගේ ගාම්භීර උත්තමචාර පෙළපාලියෙන් අනතුරුව නියෝජ්‍ය පොලිස්පති බඳවා ගැනීම පුහුණු දිසාව අනුර පුෂ්පකුමාර මහතා විසින් උත්සවයේ පිළිගැනීමේ කතාව පවත්වමින් ප්‍රධාන ආරාධිත අමුත්තන් ඇතුලුව පැමිණ සිටි පරිපාලනය භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න, ජ්‍යෙෂ්ඨ නියෝජ්‍ය පොලිස්පති විශේෂ කාර්යංශය සහ පුහුණු හා උසස් පුහුණු නීතිඥ සම්පත් කුමාර ලියනගේ, නියෝජ්‍ය පොලිස්පති බඳවා ගැනීම පුහුණු දිසාව අනුර පුෂ්පකුමාර, පොලිස් විද්‍යාල කොට්ඨාසයේ අධ්‍යක්ෂව සිට අද දින ව්‍ශ්‍රාම ලබන ජ්‍යෙෂ්ඨ පොලිස් අධිකාරී චින්තක ගුණරත්න යන ජ්‍යෙෂ්ඨ පොලිස් නිලධාරීන් මෙන්ම ප්‍රධාන රාජ්‍ය/පුද්ගලික ආයතනයන්හි මුලසුන් හොඹවමින් උත්සවය නියෝජනය කළ ජ්‍යෙෂ්ඨ රාජ්‍ය නිලධාරීන්, ආධුනික නිලධාරීන්ගේ දෙමව්පියන් සහ හිතවතුන් සාදරයෙන් පිළිගත්තේය. උත්සව සභාව ආමන්ත්‍රණය කළ මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජයපාල මහතා සහ පොලිස්පති නීතිඥ ප්‍රියන්ත වීරසූරිය මහතා නවක නිලධාරීන්ට සුභාසිංශන එක්කර පොලිස් සේවයේ යහපත් වෘත්තීයභාවයෙන් නිරතවීමෙන් ජීවිතයට එක්කර ගත හැකි වටිනාකම් පිළිබඳව පැහැදිලි කළහ. සුපුරුදු පරිදි විසිර යාමේ උළල රසාස්වාදයෙන් සහ දර්ශනීයභාවයෙන් සමාප්තකිරීමට පොලිස් බටහිර තූර්ය වාදන කණ්ඩායම, පොලිස් සංස්කෘතික කොට්ඨාසය හා පොලිස් විද්‍යාලයේ යතුරුපැදි කණ්ඩායමත් කටයුතු කරන ලදී. මෙම සියලු අවස්ථාවන් සජීවීව නැරඹීමට  විසි අටදහසක පමණ ප්‍රේක්ෂක පිරිසක් SRI LANKA POICE නිල FACEBOOK පිටුව හා එක්වී සිටියහ.

පොලිස් ශිෂ්‍යභට කොට්ඨාසයේ අධ්‍යක්ෂකවරයා වශයෙන් රාජකාරි ඉටුකරමින් සිටි ජ්‍යෙෂ්ඨ පොලිස් අධිකාරී චින්තක ගුණරත්න මහතා එතුමාගේ ජීවිතයේ 60 හැවිරිදි වියට පිවිසීමෙන් පොලිස් නිලධාරී භූමිකාවට ගෞරවනීය ලෙස සමු දී විශ්‍රාම සුවයට එළඹෙන ලදී. මේ දක්වා එතුමා දුන් විශිෂ්ඨ නායකත්වයට ගෞරවය පුදකරමින් කළුතර පොලිස් විද්‍යාලයේ නිලධාරීන් 2026.01.03 වන දින උපහාර උත්සවයක් පවත්වා සමස්ථ පොලිස් නිලධරයන්ගේ උත්තමාචාරය එතුමා වෙත පිරිනැමීය. ජ්‍යෙෂ්ඨ රාජ්‍ය නිලධාරීන් රැසක් එම උත්සවයට සහභාගී විය.   1966.01.05 වන දින උපත ලබා ඇති චින්තක ගුණරත්න මහතා දරුවන් පස් දෙනෙකුගෙන් යුත් පවුලක වැඩිමහල් දරුවායි. එතුමාගේ මවද කාන්තා පොලිස් කොස්තාපල් වරියක් ලෙස සේවයට බැඳී පොලිස් පරීක්ෂකවරියක් ලෙස විශ්‍රාමගත් කාන්තාවකි. ආනන්ද විද්‍යාලයේ කැපී පෙනෙන ආදි සිසුවෙකු වන චින්තක ගුණරත්න මහතා අධ්‍යාපනය හදාරන වියේදී ශිෂ්‍ය භටයෙකු ලෙස පොලිස්පති අභියෝග කුසාලනය දිනාගැනීමට සමත් වූවෙකි. මීටර් 400 දිවීම මළල ක්‍රීඩා ඉසව්වක තරඟ වාර්තාවක්ද හිමි චින්තක ගුණරත්න මහතා අ.පො.ස උසස්පෙළ ජීව විද්‍යා අංශයෙන් උසස් ලෙස සමත් වී කොළඹ විශ්ව විද්‍යාලයට ඇතුලත්ව ඇති අතර, සිය කැපීපෙනෙන පෞර්ෂ ගති ලක්ෂණ සුදුසුම වෘත්තිය ශ්‍රී ලංකා පොලිසිය බව තේරුම්ගෙන රට දැයට සේවය කිරීම සඳහා 1988.03.15 වන දින උප පොලිස් පරීක්ෂකවරයෙකු ලෙස පොලිසියට එක් වී ඇත. වෘත්තීය ජීවිතයේදී අති සාර්ථක වූ එතුමා ක්‍රමානුකූලව ජ්‍යෙෂ්ඨ පොලිස් අධිකාරී ධූරය දක්වා පැමිණි අතරතුර එක්සත් ජාතීන්ගේ සංවිධානය යටතේ නැගෙනහිර ටිමෝරය, මොසැම්බික් රාජ්‍යය, දකුණු සුඩානය වැනි රටවල්වල සාම සාධක කටයුතුවලද නිරතවූ නිලධාරියෙකි. ජාත්‍යන්තර සාම සාධක රාජකාරි වෙනුවෙන් පදක්කම් හතරක් ලබාගත් ශ්‍රී ලංකා පොලිස් ඉතිහාසයේ එකම නිලධාරියාද චින්තක ගුණරත්න මහතායි. කළුතර පොලිස් විද්‍යාලයේ සහකාර පුහුණු අධ්‍යක්ෂවරයා ලෙසද, ශ්‍රී ලංකා පොලිස් පරීක්ෂක සංගමයේ සභාපතිවරයා ලෙසද,  ජනාධිපති පුද්ගලික ආරක්ෂක නිලධාරියා ලෙසද එක්සත් ජාතීන්ගගේ දූත මණ්ඩල 4 ක උපදේශකවරයෙකු ලෙසද කීර්තිමත් රාජකාරි ඉතිහාසයක් සතු මෙතුමා පොලිස් විද්‍යාලයට හා 2022.06.16 දින අධ්‍යක්ෂකවරයා ලෙස පත්වූ පොලිස් ශිෂ්‍යභට කොට්ඨාසයට සුවිශේෂී දියුණුවක්  අත්කර දුන් ජ්‍යෙෂ්ඨ නිලධාරියෙකු ලෙස ප්‍රකටය. සිය වෘත්තීය ජීවිතයේ මෙහෙවර එලෙස නිමාකරමින් විශාම සුවයට එළඹි  ජ්‍යෙෂ්ඨ පොලිස් අධිකාරී චින්තක ගුණරත්න මහතාට එතුමාගේ ආදරණීය බිරිඳ සහ දියණිය හා පුතනුවන් සමඟ සුවදායී විශ්‍රාම දිවියක් හිමිවන්නට ප්‍රාර්ථනා කරමින් ආසිරි පතන්නෙමු.

අම්බලන්තොට, වලවේ ගඟ පාලම අසල මාර්ග බාධකයේ රථ වාහන පරීක්ෂා කිරීමේ රාජකාරියේ නිරතව සිටියදී අනතුරකට ලක්ව මියගිය පොලිස් කොස්තාපල් 82615 එම්. සරත් කුමාර නිලධාරියාගේ අවසන් කටයුතු 2026.01.03 වන දින සිදුකෙරුණි. රාජකාරියේදී මියගිය මෙම නිලධාරියා පශ්චාත් උසස්කිරීමේ පදනම මත පොලිස් සැරයන් නිලය දක්වා උසස් කිරීමට කටයුතු කරමින් පොලිස්පති නීතිඥ ප්‍රියන්ත වීරසූරිය මහතා දේහය තැන්පත් කර තිබූ සූරියවැව, වීරියගම පිහිටි නිවස වෙත ගොස් සිය අවසන් ගෞරව පුද කළේය.  ප්‍රදේශයේ උසස් පොලිස් නිලධාරීන්ද ඇතුලුව නිලධාරියා සමඟ රාජකාරි කළ නොකළ පොලිස් නිලධාරීන් රැසක් එදින අවසන් කටයුතු සඳහා සහභාගී විය.

දකුණු ආසියවේ විශිෂ්ඨතම අතුරු හමුදාවට ආධුනික කොස්තාපල්වරයෙකු ලෙස එක්වීමේ භාග්‍ය උදාකරගත් මෙරට ජව සම්පන්න තරුණයින් 225 දෙනෙකු, මූලික පුහුණුව හැදෑරීම සඳහා 2025.12.31 වන දින ඇල්පිටිය පොලිස් විද්‍යාලය වෙත වාර්තා කරන ලදී. මූලික තොරාගැනීමේ පරීක්ෂණ වලදී පොලිස් විශේෂ කාර්ය බලකායේ අභිමානවත් නිල ඇඳුම පැළදීම සඳහා අවශ්‍ය කාය ශක්තිය,මානසික ශක්තිය, විනය මෙන්ම සරිලන අධ්‍යාපන මට්ටම, පවුල් පසුබිම වඩාත් සාර්ථකව පෙන්නුම් කර සුදුස්සන් වූ මෙම පිරිස, මෙතැන් සිට රටදැය ආරක්ෂාකිරීමට කැපවන අතිදක්ෂ සන්නද්ධ නිලධාරියෙකු වීම උදෙසා  පොලිස් විදු සෙවනේ සුවිශේෂී පුහුණුවක් ලබනු ඇත.