Special Events – SI

නව තාක්ෂණය උපයෝගී කරගනිමින් ශ්‍රී ලංකා පොලිසියේ පොලිස් සේවාවන් රැසක් ඇඟිලි තුඩින් ලබාගැනීමේ පහසුව මහජනතාවට හිමිකරදීම සඳහා පොලිස්පති නීතිඥ ප්‍රියන්ත වීරසූරිය මහතාගේ උපදෙස් හා මඟපෙන්වීම මත වීශේෂ ව්‍යාපෘතියක් ක්‍රියාත්මකයි. ව්‍යාපෘතිය අවසානයේ IOS හා Android මෙහෙයුම් පද්ධති සඳහා සරිලන ජංගම දුරකථන යෙදවුමක් (Mobile App) හා නව පොලිස් වෙබ් අඩවියක් ඔබගේ තාක්ෂණික උපාංගය (Device) මගින් පරිශීලනය කිරීමට හැකිවනු ඇත. ජංගම දුරකථන යෙදවුම(App) ඔස්සේ පොලිස් මාධ්‍ය කොට්ඨාසය සමාජ මාධ්‍ය ඔස්සේ ඔබ වෙත සමීපකරන දැනුවත්කිරීම්,පුවත්,ඡායාරූප, වීඩියෝ පහසුවෙන් නිරීක්ෂණය කිරීමට හැකිවනු ඇති අතර Notification පහසුකම හරහා ඔබ වෙත යම් හදිසි දැනුවත් කිරීමක් එසැණින් ලබාදීම මෙහි ප්‍රධාන අරමුණක් වේ. පොලිස් නිශ්කාෂණ වාර්තා අයදුම් කිරීම්, හදිසි දුරකථන ඇමතුම් අංක, හදිසි අවස්ථාවක Location Alerts වැනි පහසුකම් වැනි පොලිස් සේවා ඔබට පහසුවෙන් ලබාගත හැකිවන පරිදි මෙම ජංගම දුරකථන යෙදවුම සකස් කිරීමට නියමිතය. “Vampior Design” මෘදුකාංග සංවර්ධන පුද්ගලික ආයතනයේ නිර්මාණයක් වන මෙම යෙදවුම හා වෙබ් අඩවිය සඳහා අවශ්‍ය තාක්ෂණික සහය හා පාලනය පොලිස් තොරතුරු තාක්ෂණ කොට්ඨාසය මගින්ද අන්තර්ගත කරුණු පොලිස් මාධ්‍ය කොට්ඨාසය මගින්ද සකස්කරමින් පවතී. ඒ් අනුව පොලිස් සේවා ලබාගැනීම සඳහා මෙන්ම තොරතුරු දැනගැනීම සඳහා විවිධාකාරයෙන් වැයවන මහජනතාවගේ කාලය හා ශ්‍රමය ඉතිරිකර දෙමින් මෙම යෙදවුම නුදුරු කාලයේදී සෑම පුරවැසියෙකුගේම නවීන ජංගම දුරකථනයක් තුළ සුලභව භාවිතාවන යෙදවුමක්(App) වනු ඇත. පොලිස්පතිතුමාගේ ප්‍රධානත්වයෙන් මෙම ව්‍යාපෘතියේ ප්‍රගතිය සාකච්ඡා කෙරෙන හමුවක් 2026.06.16 වන දින පොලිස් මූලස්ථානයේදී පැවැත්වුනි. මෙම හමුව සඳහා මාණ්ඩලික නියෝජ්‍ය පොලිස්පති රොෂාන් ඩයස් මහතා,  පර්යේෂණ හා තොරතුරු තාක්ෂණ දිසාව භාර නියෝජ්‍ය පොලිස්පතිනී නිෂානි සෙනෙවිරත්න මහත්මිය,  පොලිස් තොරතුරු තාක්ෂණ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී කේ.ජී ලක්සිරි ගීතාල් මහතා, පොලිස් මාධ්‍ය කොට්ඨාසයේ අධ්‍යක්ෂ පොලිස් මාධ්‍ය ප්‍රකාශක නීතිවේදී එෆ්,යූ වුට්ලර් මහතා ඇතුලු කාර්යභාර්ය හිමි පොලිස් නිලධාරීන් “Vampior Design” මෘදුකාංග සංවර්ධන පුද්ගලික ආයතනයේ කළමණාකාර අධ්‍යක්ෂ අසංක බණ්ඩාර මහතා ඇතුලු  “Vampior Design” පුද්ගලික ආයතනයේ නිලධාරීන් සහභාගීවිය.

දිවයිනේ සෑම පොලිස් කොට්ඨාසයකම නීතිය හා සාමය එකලෙස ක්‍රියාත්මක කිරීමේ යාන්ත්‍රණය  ශක්තිමත්ව හා කාර්යක්ෂමව පවත්වාගැනීම ශ්‍රී ලංකා පොලිසියේ දැක්මයි. භෞතික හා සාමාජීය සංවර්ධනය සමඟ ක්‍රමානකූලව ගොඩනැගෙන උතුර පළාත තුළද සමාජ මිත්‍රශීලී ශක්තිමත් පොලිස් සේවාවක් ඇතිකරමින් එම පළාත තුල ජීවත්වන සියළු ජනතාවට මෙරට නීතියේ හා මහජන ආරක්ෂාවේ සෙවණේ ජීවත්වීමට හැකි පරිසරය තවදුරටත් ඔප්නැංවීම සඳහා අවශ්‍ය පසුබිම මහජන ආරක්ෂක අමාත්‍යංශය යටතේ නිර්මාණය වෙමින් පවතී. ඒ් අනුව කෝපායි පොලිස් ස්ථානය වෙනුවෙන් ඉදිකළ නව ගොඩනැගිල්ල මෙන්ම සංවර්ධනය කළ පොලිස් ස්ථානාධිපතිවරුන්ගේ නිල නිවාස කිහිපයක්ම ගරු මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතා හා පොලිස්පති නීතිඥ ප්‍රියන්ත වීරසූරිය මහතා 2026.06.13 සහ 14 දෙදින උතුරු පළාත තුළ සිදුකළ නිල සංචාරයේදී විවෘත කරන ලදී.   නිල වශයෙන් විවෘත කෙරුණු පොලිස් ස්ථානාධිපති නිල නිවාස – කන්කසන්තුරේ, කෝපායි, පලාලී, කොඩිකාමම්, චාවකච්චේරි, චුන්නාකම්, කයිට්ස්.  මෙම අවස්ථාවන් සඳහා එම ප්‍රදේශයන්හි ජ්‍යෙෂ්ඨ රාජ්‍ය නිලධාරීන්, උතුරු පළාත භාර ජ්‍යෙෂ්ඨ නියෝජ්‍ය පොලිස්පති ජී.එම්.එච්. බුද්ධික සිරිවර්ධන මහතා ඇතුළු නියෝජ්‍ය පොලිස්පතිවරුන්, කොට්ඨාසභාර පොලිස් නිලධාරීන්, ස්ථානාධිපතිවරුන් සහභාගී විය.

යාපනය කොට්ඨාසයේ අළුතින් ඉදි කරන ලද කෝපායි පොලිස් ස්ථානයේ නව පරිපාලන ගොඩනැගිල්ල විවෘත කිරීම ගරු මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මැතිතුමාගේ ප්‍රධානත්වයෙන්, පොලිස්පති නීතිඥ ප්‍රියන්ත වීරසූරිය මහතාගේ සහභාගිත්වයෙන් 2026.06.14 අද දින සිදු කරන ලදී.  කෝපායි පොලිස් ස්ථානය 1966 වර්ෂයේ ජනවාරි මස 06 වන දින ආරම්භ කර ඇති අතර අළුතින් ඉදිකරන ලද අංග සම්පූර්ණ නවීන ගොඩනැගිල්ල ඉදිකිරීම සඳහා රුපියල් මිලියන 47ක පමණ මුදලක් වැය වී ඇත.මෙම පොලිස් වසමට ග්‍රාම නිලධාරී වසම් 27ක් අයත් වන අතර වර්ග කිලෝ මීටර් 51ක භූමි ප්‍රමාණයක 64,500ක පමණ ජනතාවක් ජීවත් වේ. එමෙන්ම යාපනය විශ්ව විද්‍යාලය හා යාපනය ගුරු විද්‍යා පීඨයද මෙම පොලිස් වසම තුල පිහිටා ඇත.  මෙම උත්සව අවස්ථාවට ගරු උතුරු පළාත් ආණ්ඩුකාර නාගලිංගම් වේදනායහන් මහතා, යාපනය දිස්ත්‍රික් ගරු පාර්ලිමේන්තු මන්ත්‍රීවරුන්, යාපනය දිස්ත්‍රික් ලේකම් මරුදලිංගම් ප්‍රදීපන් මහතා, යාපනය ආරක්ෂක සේනා මූලස්ථානයේ ආඥාපති මේජර් ජනරාල් ප්‍රියන්ත නවරත්න මහතා, උතුරු පළාත භාර ජ්‍යෙෂ්ඨ නියෝජ්‍ය පොලිස්පති බුද්ධික සිරිවර්ධන මහතා ඇතුළු පිරිසක් සහභාගී විය.

අපරාධ වාර්තා කොට්ඨාසය මගින් සංවිධානය කරන ලද වෝහාරික ඡායාරූපකරණය හා විඩියෝකරණය පාඨමාලාව – කණ්ඩායම් අංක 28 2026.06.12 දින සාර්ථකව අවසන් වන ලදී.  සහතික පත් බෙදා දීමේ උත්සවය පොලිස් මුලස්ථානයේදි පොලිස්පති නීතීඥ ප්‍රියන්ත වීරසූරිය මහතාගේ මුලිකත්වයෙන් පැවැත්වු අතර ඒ සදහා අපරාධ හා රථ වාහන ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා අපරාධ දිසාව භාර නියෝජ්‍ය පොලිස්පති ජයසිරි කොඩිතුවක්කු මහතා සහ අධ්‍යක්ෂ අපරාධ වාර්තා කොට්ඨාසය ජ්‍යෙෂ්ඨ පොලිස් අධිකාරි රුවන් කුමාර මහතා ඇතුලු නිලධාරින් සහභාගි විය.  මෙම පාඨමාලාව 2026.04.22 වන දින සිට 2026.06.12 දින දක්වා දින 45 පුරාවට පවත්වන ලදී. මෙම පාඨමාලාව මගින්,  •වෝහාරික ඡායාරූපකරණය හා වීඩියෝකරණය.•වෝහාරික හා අධිකරණ වෛද්‍ය විද්‍යාව පිළිබද දැනුම•නවීන තාක්ෂණික කැමරා පිළිබද දැනුම•අධිකරණ කටයුතු සදහා අවශ්‍ය නෛතික දැනුම•ප්‍රායෝගික වැඩමුළු (හෝටන් තැන්න/වනජීවී/වෝහාරික)•ජාත්‍යන්තර මට්ටමේ ප්‍රවනතා පිළිබද යාවත්කාලීන දැනුම•අපරාධ ස්ථාන‍, උද්ඝොෂණ‍, විමර්ශන හා ආවේක්ෂණ ඡායාරූපකරණය හා වීඩියෝකරණය යනාදි ක්ෂේත්‍ර ආවරණය කරන ලදී. මෙම නිලධාරින් ඉදිරියේදි දිවයින පුරා පොලිස් කොට්ඨාස වෙත අනුයුක්ත කරන අතර එහිදි එම නිලධාරින්ගේ සේවය පොලිස් කොට්ඨාස වෙත ලබා දිමට නියමිතය.

විශේෂ ආරක්ෂක සහ මැතිවරණ භාර ජ්‍යේෂ්ඨ නියෝජ්‍ය පොලිස්පති ආචාර්ය දිනේෂ් කරුණානායක මහතා විසින් රචිත අපරාධ නිවාරණය සහ වින්දිත උපදේශනය නැමති ග්‍රන්ථය පොලිස්පති නීතීඥ ප්‍රියන්ත වීරසූරිය මහතා වෙත පිළිගැන්වීම 2026.06.10 වන අද දින පොලිස් මූලස්ථානයේදී සිදුවිය. එම අවස්ථාවට ජ්‍යේෂ්ඨ නියෝජ්‍ය පොලිස්පති සංජීව ධර්මරත්න මහතා ඇතුළු උසස් පොලිස් නිලධාරීන් පිරිසක් එක්ව සිටියහ.  ජ්‍යේෂ්ඨ නියෝජ්‍ය පොලිස්පති ආචාර්ය දිනේෂ් කරුණානායක මහතා ශ්‍රී ලංකා පොලිසිය තුල සිටින දක්ෂ ග්‍රන්ථ රචකෙයකු මෙන්ම ගීත නිර්මාණ කරුවෙකුද වෙයි. එතුමා විසින් මීට පෙර 2012 වර්ෂයේදී  “මත්ද්‍රව්‍ය සඳහා ඇබ්බැහිවීම සහ පුනුරුත්ථාපනය” නැමති ග්‍රන්ථය සහ 2023 වර්ෂයේදී  “පොලිස් නිලධාරීන්ගේ රැකියා තෘප්තිය සහ කාර්යක්ෂමතාවය” යන ග්‍රන්ථයද රචනා කරන ලදී. ඊට අමතරව ශ්‍රී ලංකා පොලිසිය වෙනුවෙන් නිර්මාණය කල “මිනිසා නුඹයි”, දළදා වහන්සේ ප්‍රදර්ශනය වෙනුවෙන් නිර්මාණය කරන ලද “ශ්‍රී දළදා” යන ගීතය මෙන්ම තවත් ගීත රැසක පදරචනයටද දිනේෂ් කරුණානායක මහතා දායක වී ඇත. 

නූූතන තාක්ෂණය සමඟ මෙන්ම ගෝලීයකරණය තුළ ශ්‍රීඝ්‍රයෙන් වෙනස්වන සමාජ වටපිටාවන්ට ගැලපෙන පරිදි පොලිස් රාජකාරි ඉටුකිරීම සඳහා සෑම පොලිස් නිලධරයෙකුම දැනුමෙන් සපිරි යාවත්කාලීන පුරවැසියෙකු වීම අනිවාර්ය වේ. එවැනි අපේක්ෂාවන් සඵල කර ගැනීම සඳහා සේවයේ යෙදීසිටින නිලධාරීන් හට විවිධ පුහුණු පාඨමාලා  ලබාදෙමින් දැනුමෙන් සන්නද්ධකිරීම සඳහා අත්තිඩිය ජාතික පොලිස් අභ්‍යාස ආයතනය මේ වන විටත් විශිෂ්ඨ අන්දමින් ක්‍රියාත්මකයි. ගරු මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතා සමඟ මහජන ආරක්ෂක අමාත්‍යංශ ලේකම් රවී සෙනෙවිරත්න මහතා හා පොලිස්පති නීතිඥ ප‍්‍රියන්ත වීරසූරිය මහතා ඇතුලූ පොලිසියේ ජ්‍යෙෂ්ඨ නිළධාරීන් පිරිසක් තවදුරටත් අත්තිඩිය ජාතික පොලිස් අභ්‍යාස ආයතනය වෙනුවෙන් කළයුතු වැඩිදියුණුකිරීම් පිළිබඳ සොයාබැලීම සඳහා 2026.06.05 වන දින අත්තිඩිය ජාතික පොලිස් අභ්‍යාස ආයතනයේ නිරීක්ෂණ චාරිකාවක නිරත විය. ගරු අමාත්‍යතුමන් විසින් මෙහිදී ශ‍්‍රී ලංකා පොලිසිය වෙත අවශ්‍ය ගුණාත්මක වශයෙන් ඉහළ තලයේ විශ්ව විද්‍යාලයක් බවට පත් කිරීමට මෙහි ඇති ශක්‍යතාවය විමර්ෂණයට උපදෙස් ලබාදී ඇති අතර තොරතුරු තාක්ෂණ පාඨලාවන් සඳහා වැඩි අවස්ථාවක් ලබාදීමටත්, සිදුවෙමින් පවතින් ඉදිකිරීම් කටයුතු කඩිනම් කිරීමට අවශ්‍ය පියවර ගැනීමටත් උපදෙස් ලබාදෙමින් ප්‍රතිපාදන සඳහා කඩිනම් පියවර ගනිමින් සුවවන බව සඳහන් කර ඇත.

කොළඹ ගංගාරාම විහාරාධිපති පූජ්‍ය කිරින්දේ අස්සජි ස්වාමීන් වහන්සේගේ අනුශාසනා පරිදි 2026.05.30 වන දින ඇරඹුනු දර්ශනීය “බුද්ධ රශ්මි” වෙසක් කළාපය 2026.06.02 වන දින සවස නිමාවට පත්විය. නිමාව සනිටුහන් කරමින් එදින සවස පොලිසිය විසින් ගංගාරාම විහාරස්ථානයේ සිට සීමා මාලකය දක්වා මල් පෙරහැරක් පැවැත්විය.  පොලිස්පති නීතිඥ ප්‍රියන්ත වීරසූරිය මහතාගේ ප්‍රධානත්වයෙන් පොලිස් බෞද්ධ හා ආගමික කටයුතු සංගමයේ සංවිධානයෙන් පොලිස් නිලධරයන් 170කට අධික ප්‍රමාණයක් සේසත්, මුතුකුඩ,බෞද්ධ රජ, මල් වට්ටි රැගෙන, හේවිසි කණ්ඩායම් හා නැටුම් කණ්ඩායම් සමඟ පෙරහැරේ ගමන් ගත්හ. පොලිස් සංස්කෘතික කොට්ඨාසයේ නිලධරයන්, පොලිස් විශේෂ කාර්ය බලකායේ නිලධරයන් සහ පොලිස් මූලස්ථානයේ නිලධරයන් පෙරහැරට විශේෂාංග සමගින් සහභාගීත්වය ලබාදුන් අතර අවට පොලිස් ස්ථානවල සහයෝගය හා ආරක්ෂාව යටතේ පෙරහැර දර්ශනීයව අන්දමින් පැවැත්වීමට හැකිවුනි. ‌පෙරහැර අවසානයේ විහාරස්ථානට පැමිණසිටි කොළඹ අගරදගුරු අතිඋතුම් කාදිනල් මැල්කම් රංජිත් හිමිපාණන්, විපක්ෂ නායක සජිත් ප්‍රේමදාස මහතා සමඟ පොලිස්ලතිතුමන් සුහඳ පිළිසඳරක නිරතවූ අතර විහාරස්ථාන පරිශ්‍රය තුළ සංවිධානය කළ බත් දන්සලේ කටයුතු සඳහා සහභාගී විය.

පොදු ජන සිත්තුල ආගමානුසාරයෙන් ආකල්පමය වෙනසක් ඇති කිරීම සමාජය වරදින් මුදවාගැනීම සඳහා වැදගත් පියවරක් වන බැවින් ශ්‍රී ලංකා පොලිසිය වන අප වෙසක් පොහෝ දිනය අරමුණුකරගනිමින් පසුගිය දින කිහිපය තුල දිවයින පුරා විවිධ වූ ආගමික වැඩසටහන් පවත්වන  ලදී.  ලොව්තුරු බුදුරජාණන් වහන්සේගේ උතුම් තෙමඟුල සිහිකරනු ලබන මෙවර වෙසක් උත්සවයට සමගාමීවද පොලිස් මූලස්ථානය පරිශ්‍රයේ උත්කර්ෂවත් බැති ගී සරණියක් පවත්වා එය සමාජ මාධ්‍ය ඔස්සේ සජීවීව ඔබවෙත ගෙන ඒමට කටයුතු සංවිධානය වූයේද එහි එක් ප්‍රධාන පියවරක් වශයෙනි. ඒ් අනුව පොලිස් බෞද්ධ හා ආගමික කටයුතු සංගමයේ මනා සංවිධානය යටතේ  මෙවර “වෙසක් බැති ගී සුගායනය- 2026” ,  බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතාගේ හා මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතා‌ගේ ප්‍රධානත්වයෙන් 2026.06.01 වන දින සවස පොලිස් මූලස්ථානයේදී උත්කර්ෂවත් ලෙස පවත්වන ලදී. වැඩමවාවදාල ගරු සංඝරත්නයේ ආශිර්වාද සමඟින් පොලිස්පති නීතිඥ ප්‍රියන්ත වීරසූරිය මහතා ප්‍රමුඛ ජ්‍යෙෂ්ඨ පොලිස් නිලධාරීන්ගේ හා ආරාධිත ප්‍රභූවරුන්ගේ සහභාගීත්වයෙන් සවස 07.00 ට පමණ ඇරඹුනු මෙම බැති ගී සරණිය මියුරු හඩ ඇති පොලිස් නිලධාරීන්ගෙන් හා පොලිස් බටහිර තූර්ය වාදන වෘන්දයේ සංගීතයෙන් පුරා හෝරා 2ක් පුරා රසගැන්වුනි. පොලිස් සංස්කෘතික කොට්ඨාසයේ නර්තනාංගයන් මෙන්ම ප්‍රවීන ගායකයින් වන දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත්,  පොලිස් කොස්තාපල් බුද්ධික උෂාන් යන නිලධාරීන් ඇතුළු ගීත ගායනයෙන් ශ්‍රී ලංකා පොලිසිය තුළ ඉමහත් ප්‍රසිද්ධියක් අත්කරගෙන ඇති නිලධාරීන්ගේ ගීත ගැයුම් මෙහිදී කාගෙත් සිත් අමන්දානන්දයට පත්කිරීමට සමත් විය. පොලිස් බෞද්ධ හා ආගමික කටයුතු සංගමයේ සභාපති ලෙස පොලිස්පති නීතිඥ ප්‍රියන්ත වීරසූරිය මහතාගේ සහ උපසභාපති ශ්‍රී ලංකා පොලිසියේ පරිපාලනය භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතාගේ මෙන්ම ලේකම් නියෝජ්‍ය පොලිස්පති මහින්ද දිසානායක මහතාගේ උපදෙස් හා සෘජු මෙහෙයවීම යටතේ එලෙස අති සර්ථකව පැවැත්වුනු මෙවර “වෙසක් බැති ගී සුගායනය” පොලිස් මාධ්‍ය කොට්ඨාසය විසින් පොලිස් තොරතුරු තාක්ෂණ කොට්ඨාසය, පොලිස් අපරාධ වාර්තා කොට්ඨාසය, සන්නිවේදන කොට්ඨාසය ඇතුලු පාර්ශව රැසකගේ සහයෝගය ඇතිව Sri Lanka Police නිල Facebook පිටුව ඔස්සේ සජීවීව විකාශනය කරන ලදී.

කොළඹ හුණුපිටිය ගංගාරාම “බුද්ධ රශ්මි” වෙසක් කලාපයට සහ “බෞද්ධාලෝක” වෙසක් කලාපයට සමගාමීව, ජනාධිපති කාර්යාලය විසින් සංවිධානය කරනු ලබන “වෙසක් බැති ගී සරණිය” 2026.05.30 වන දින පස්වරු 6.30 ට ජනාධිපති කාර්යාල පරිශ්‍රයේදී උත්කර්ෂවත් අයුරින් ආරම්භ විය. මෙම අවස්ථාව සඳහා ගරු අග්‍රාමාත්‍ය ආචාර්ය හරිනි අමරසූරිය මෙනවිය, ජනාධිපති ලේකම් ආචාර්ය නන්දික සනත් කුමානායක මහතා, ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ මහතා සහ ජනාධිපති කාර්යාලයේ නීති අධ්‍යක්ෂ ජනරාල්, පොලිස්පති නීතිඥ ප්‍රියන්ත වීරසූරිය මහතා  මෙන්ම බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සංජීව මැදවත්ත මහතා ඇතුළු සම්භාවනීය අමුත්තන් පිරිසක් එක්ව සිටියහ. ශ්‍රී ලංකා පොලිසියේ සහ ත්‍රිවිධ හමුදාවේ බැති ගී කණ්ඩායම් මෙන්ම කොළඹ ප්‍රදේශයේ පාසල් කිහිපයක සිසු දැරියන්ගේ සහභාගිත්වයෙන් පැවැත්වෙන මෙම භක්ති ගීත ප්‍රසංගය, එළඹෙන ජූනි මස 02 වනදා දක්වා සෑම දිනකම පස්වරු 6.30 සිට ජනාධිපති කාර්යාල පරිශ්‍රයේදී පැවැත්වීමට කටයුතු යොදා ඇත. මීට සමගාමීව ජනාධිපති ලේකම් කාර්යාලය සහ ශ්‍රී ලංකා යුද හමුදාව එක්ව සංවිධානය කළ බත් දන්සල 2026.09.30 වන දින රාත්‍රී 7.00 ට ජනාධිපති කාර්යාලය අසලදී ආරම්භ කෙරුණු අතර, ඒ සඳහා ජනාධිපති ලේකම් ආචාර්ය නන්දික සනත් කුමානායක මහතා, පොලිස්පති නීතිඥ ප්‍රියන්ත වීරසූරිය මහතා මෙන්ම යුද හමුදාවේ ජ්‍යෙෂ්ඨ නිලධාරීන් ද එක්විය.  වයිනේ නන් දෙසින් පැමිණි දස දහසකට අධික ජනතාවක් ඊට එක්ව සිටි අතර බත් දන්සල ජූනි 02 දක්වා පැවැත්වේ. එමෙන්ම වෙසක් සිරි නැරඹීමට කොළඹට පැමිණෙන ජනතාව වෙනුවෙන් අයිස්ක්‍රීම් දන්සලක්ද  පස්වරුවේ ජනාධිපති කාර්යාලය අසලදී ආරම්භ කෙරිණි. ජනාධිපති කාර්ය මණ්ඩලයේ සෘජු දායකත්වයෙන් ජනාධිපති ලේකම් කාර්යාලය ඇතුළු අවට රාජ්‍ය ගොඩනැඟිලි සහ මාර්ග විදුලි බුබුලුවලින් අලංකාරවත් කර ඇති අතර, මනරම් වෙසක් පහන් කූඩු ප්‍රදර්ශනයක් ද මේ දිනවලදී මහජනතාව සඳහා විවෘතව පවතී.

ලෝකවාසී බෞද්ධ ජනතාවගේ පරම පූජනීය වෙසක් පුර පසළොස්වක පොහොය දිනය නිමිත්තෙන් සමස්ත ශ්‍රී ලාංකික ජනතාව වෙත මගේ හෘදයාංගම සුභාශිංසන පිරිනමනුයේ හදපිරි භක්තියෙනි. භාග්‍යවතුන් වහන්සේගේ තෙමඟුල (ඉපදීම, බුදුවීම සහ පිරිණිවන් පෑම) සිහිපත් කරන උදාර වෙසක් පොහොය, අප සැමගේ සිත් තුළ කරුණාව, දයාව සහ ප්‍රඥාව වර්ධනය කර ගැනීමට ලැබෙන උතුම් අවස්ථාවකි.  බුදුරජාණන් වහන්සේ දේශනා කළ වෛරයෙන් වෛරය නොසන්සිඳෙන බවත්, අවෛරයෙන්ම වෛරය සංසිඳෙන බවත් යන ශාස්තෘ වැකිය වත්මන් සමාජයට වඩාත්ම ගැලපෙන පණිවිඩයයි. ශ්‍රී ලංකා පොලිසිය ලෙස අප සැමවිටම කැපවී සිටින්නේ රට තුළ නීතිය හා සාමය සුරකිමින්, සාමකාමී සහ සදාචාරාත්මක සමාජයක් ගොඩනැගීමටයි. මෙවර වෙසක් සමයේදී ආමිස හා ප්‍රතිපත්ති පූජාවන්ට මුල්තැන දෙමින්, අන්‍යෝන්‍ය ගරුත්වය සහ සහයෝගීතාවය පෙරදැරිව කටයුතු කරන මෙන් සමස්ත පොලිස් නිලධාරීන්ගෙන් මෙන්ම රටවැසි මහජනතාවගෙන්ද කාරුණිකව ඉල්ලා සිටිමි. විශේෂයෙන්ම, උත්සව සමය තුළ මාර්ග ආරක්ෂාව පිළිබඳව සැලකිලිමත් වෙමින්, මත්ද්‍රව්‍ය හා මත්පැන්වලින් වැළකී, පින්සිතුවිලිවලින් යුතුව වෙසක් උත්සවය සැමරීමට වගබලා ගන්නා ලෙස සිහිපත් කරමි. සැමට පින්බර වෙසක් මංගල්‍යයක් වේවා! – පොලිස්පති, නීතිඥ ප්‍රියන්ත වීරසූරිය – …………………………………………………………. பௌத்த உலக மக்களின் மிகப் புனிதமான வெசாக் பௌர்ணமி தினத்தை முன்னிட்டு, இலங்கை வாழ் அனைத்து மக்களுக்கும் எனது இதயபூர்வமான வாழ்த்துகளை பணிவுடன் தெரிவித்துக் கொள்கிறேன். புத்த பகவானின் திருத்திருமுக நிகழ்வுகளான (பிறப்பு, புத்தத்துவம் அடைதல் மற்றும் பரிநிர்வாணம்) நினைவுகூரும் இந்த உன்னத வெசாக் பௌர்ணமி தினம், நம் அனைவரின் மனங்களில் கருணை, அன்பு மற்றும் ஞானத்தை வளர்த்தெடுக்கக் கிடைக்கும் சிறந்த வாய்ப்பாகும். “பகையால் பகை தீராது, அன்பினாலேயே பகை தணியும்” என்ற புத்தரின் உபதேசம் இன்றைய சமூகத்திற்கும் மிகப் பொருத்தமான செய்தியாகும். இலங்கை பொலிஸ் துறையாக, நாட்டில் சட்டம் மற்றும் ஒழுங்கை பாதுகாத்து, அமைதியான மற்றும் நெறிமுறை சார்ந்த சமூகத்தை உருவாக்க நாம் எப்போதும் அர்ப்பணிப்புடன் செயற்பட்டு வருகிறோம். இவ்வருட வெசாக் காலத்தில், ஆராதனை மற்றும் நடைமுறை வழிபாடுகளுக்கு முன்னுரிமை அளித்து, பரஸ்பர மரியாதை மற்றும் ஒத்துழைப்புடன் செயற்படுமாறு அனைத்து பொலிஸ் அதிகாரிகளையும், பொதுமக்களையும் அன்புடன் கேட்டுக்கொள்கிறோம். குறிப்பாக, பண்டிகை காலத்தில் வீதிப் பாதுகாப்பை கவனத்தில் கொண்டு, மது மற்றும் போதைப்பொருட்களைத் தவிர்த்து, பக்தியுடன் வெசாக் திருவிழாவை கொண்டாடுமாறு நினைவூட்டுகின்றோம். அனைவருக்கும் புண்ணியமிக்க வெசாக் பண்டிகை நல் வாழ்த்துகள்! …………………………….. On the occasion of the most sacred Vesak Full Moon Poya Day, revered by Buddhists around the world, I extend my heartfelt Vesak greetings to all Sri Lankans with profound devotion and sincere goodwill. The noble Vesak Poya, which commemorates the Birth, Enlightenment, and Parinibbana of the Buddha, provides a valuable opportunity for all of us to cultivate loving-kindness, compassion, wisdom, and understanding within our hearts. The timeless teaching of the Buddha that “Hatred is never appeased by hatred, Hatred is appeased only by non-hatred” remains one of the most relevant and powerful messages for contemporary society. It serves as a guiding principle for fostering harmony, tolerance, and peaceful coexistence among all people. As the Sri Lanka Police, we remain steadfast in our commitment to maintaining law and order, ensuring Public Safety, and contributing to the creation of a Peaceful, Disciplined, and morally upright society. During this Vesak season, I respectfully urge all police officers and members of the public to give priority to both Amisa Pooja and Prathipatti Pooja, embracing the true spirit and values of the Buddha’s teachings through their words and actions. I also kindly appeal to everyone to demonstrate mutual respect, understanding, and cooperation during this festive period. In particular, I encourage all citizens to exercise caution on the roads, uphold road safety regulations, refrain from the use of alcohol and narcotic substances, and celebrate Vesak with noble thoughts and virtuous conduct. May this blessed Vesak bring peace, happiness, and spiritual fulfillment to all. – The Inspector General of Police, Attorney-at-Law Mr. Priyantha Weerasuriya –