Special Events – SI

නවීන තාක්ෂණයෙන් සහ භෞතික සම්පත් මඟින් තවදුරටත් පොලිසිය කාර්යක්ෂම කිරීම සඳහා රුපියල් මිලියන 556 ක මූල්‍ය වටිනාකමකින් යුත් තාක්ෂණික උපකරණ තොගයක් මහජන ආරක්ෂක හා පාර්ලිමේන්තු කටයුතු පිළිබඳ ගරු අමාත්‍ය ආනන්ද විජේපාල මහතා විසින් 2026.02.18 වන දින පොලිස්පති නීතිඥ ප්‍රියන්ත වීරසූරිය මහතා වෙත ලබාදෙන ලදී.   පොලිස්පතිතුමන් විසින් මහජන ආරක්ෂක හා පාර්ලිමේන්තු කටයුතු අමාත්‍යංශ පරිශ‍්‍රයේදී සංකේතාත්මකව උපකරණ තොගය නිල වශයෙන් භාරගත් අතර රුපියල් මිලියන 365 ක් වටිනා පරිගණක යන්ත‍්‍ර 1718 ක්, රුපියල් මිලියන 129 ක් වටිනා ඡායා පිටපත් යන්ත‍්‍ර 575 ක්, රුපියල් මිලියන 45 ක් වටිනා වේගමාපක යන්ත‍්‍ර හා රුපියල් මිලියන 17 ක වටිනාකමකින් යුත් යූ.පී.එස්. (UPS) 1750 ක් එම උපකරණ අතර වේ. රාජකාරි බහුල පොලිස් සේවයේ නිලධාරින්ගේ රාජකාරි පහසු කිරීම මෙම තාක්ෂණික උපකරණ භාවිතයේ ප්‍රධාන අරමුණක් වන අතර මෙම ලබාදීම  මෑත කාලයේ පොලිසිය වෙත ලැබුනු වැඩිම වටිනාකමකින් යුත් උපකරණ තොගයයි.  මහජන ආරක්ෂක හා පාර්ලිමේන්තු කටයුතු අමාත්‍යංශ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනවිරත්න මහතා, අමාත්‍යංශ සම්බන්ධීකරණ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි පාලිත අමරතුංග මහතා ඇතුලු උසස් නිලධාරීන් මෙම අවස්ථාවට සහභාගී විය.

ඌව පළාත තුළ ව්‍යාප්ත වී ඇති ගංජා ඇතුළු විෂ මත්ද්‍රව්‍ය සහ නීති විරෝධී මත්පැන් උදුරා දැමීම ඉලක්ක කරගත් විශේෂ මෙහෙයුම් වැඩසටහනක සමාරම්භක උත්සවය 2026 පෙබරවාරි 14 වන දින පැවැත්විණි. පොලිස්පති නීතිඥ ප්‍රියන්ත වීරසූරිය මහතාගේ ප්‍රධානත්වයෙන් මෙම සමාරම්භක උත්සවය මොණරාගල කොට්ඨාසයට අයත් තණමල්විල පොලිස් ස්ථානයේදී පවත්වනු ලැබීය. මෙම අවස්ථාව සඳහා ඌව පළාත් භාර ජ්‍යෙෂ්ඨ නියෝජ්‍ය පොලිස්පති මහේෂ් සේනාරත්න මහතා, බදුල්ල දිසාව භාර නියෝජ්‍ය පොලිස්පති ජී.ඒ.එන්. ලක්සිරි මහතා, මොණරාගල දිසාව භාර නියෝජ්‍ය පොලිස්පති නිහාල් තල්දූව මහතා, මොණරාගල හා බදුල්ල කොට්ඨාස භාර නිලධාරින්, තණමල්විල ප්‍රාදේශීය ලේකම්තුමා, දිසා වෛද්‍ය නිලධාරී තුමිය හා මොණරාගල ප්‍රදේශයේ පාසල්වල විදුහල්පතිවරු ඇතුළු ප්‍රජා කමිටු සමාජිකයින් සහභාගි විය.  මෙම මෙහෙයුම හරහා ඌව පළාතේ තරුණ පරපුර මත්ද්‍රව්‍ය උවදුරෙන් බේරා ගැනීම සහ නීති විරෝධී මත්පැන් ජාවාරම් මුළුමනින්ම මර්දනය කිරීම ශ්‍රි ලංකා පොලිසියේ අපේක්ෂාවයි.

ශ්‍රී ලංකා ප්‍රජාතාන්ත්‍රික සමාජවාදී ජනරජයේ 78 වන ජාතික නිදහස් දින සැමරුම් උත්සවය ගරු ජනාධිපති අනුර කුමාර දිසානායක මැතිතුමාගේ ප්‍රධානත්වයෙන් 2026.02.04 වන දින කොළඹ නිදහස් චතුරස්‍රය පරිශ්‍රයේ පැවැත්වුනි.  1949 වසරේ පළමු නිදහස් දින සැමරුම් උත්සවයේදී පටන් මේ දක්වා පැවැත්වූ සෑම නිදහස් දින සැමරුම් උත්සවයකදීම මෙන්ම මෙවර නිදහස් දින උත්සවයේද ආරක්ෂාව තහවුරු කරමින් ශ්‍රී ලංකා පොලිසිය, පොලිස්පති නීතිඥ ප්‍රියන්ත වීරසුරිය මහතාගේ නායකත්වය යටතේ ඉමහත් අභිමානයෙන් යුතුව නිදහස් දින පෙළපාලිය සඳහා එක්විය. පොලිස් යතුරුපැදි පෙරටු කරගනිමින් අභිමානවත්ව පැමිණි අතිගරු ජනාධිපතිතුමන් ජාතික ධජය එසවීමත් සමඟ නිදහස් දින සැමරුම් උළලේ කටයුුතු ආරම්භ විය. ජනපතිතුමන්ගේ ආමන්ත්‍රණයෙන් අනතුරුව 78 වන නිදහස් දින සැමරුම් උළලේ ත්‍රිවිධ හමුදාව, පොලිසිය, සිවිල් ආරක්ෂක බලකාය, ජාතික ශිෂ්‍ය භට බලකාය ඇතුලත් සම්මාන පෙළපාලිය ආරම්භ විය. 1866 සැප්තැම්බර් 03 වන දින පිහිටුවන ලද මෙරට නීතිය සාමය සුරක්ෂිත කිරීමේ ප්‍රමුඛතම රාජ්‍ය ආයතනය වන ශ්‍රී ලංකා පොලීසියේ සමස්ථ සම්මාන පෙළපාලිය සඳහා අණ ලබාදෙමින් පෙරටුව Henk නම් අසුපිට ගමන් කරන ලද්දේ ජ්‍යෙෂ්ඨ පොලිස් අධිකාරි නිශාන්ත චන්ද්‍රසේකර මහතාය. දෙපසින් පරිවාර අශ්වයින් පිට මත නැගී අසිපත් සහිතව  පොලිස් අධිකාරි ලසිත් අබේවික්‍රම මහතා, පොලිස් අධිකාරි ඉසුරු නිශාන්ත මහතා සහ සහකාර පොලිස් අධිකාරි රුචිර කරුණානායක මහතා ගමන් කරන ලදී. ඉන්පසුව, වසර 158 ක ප්‍රෟඩ ඉතිහාසයකට උරුමකම් කියන ශ්‍රී ලංකා පොලිසිය ධම්මෝ හවේ රක්ඛති ධම්මචාරී යන ආදර්ශ පාඨය හා ශක්තිය පිළිබිඹු වන හස්තියාගේ රුව නිර්මිත පොලිස් ධජය රැගෙන පෙරටුව ගමන් කරන ලද්දේ සහකාර පොලිස් අධිකාරි චාමර හේරත් මහතාය. දෙපසින් අසිපත් සහිතව උප පොලිස් පරීක්ෂකවරුන් දෙදෙනෙක් ගමන් කළහ.  ඉන් අනතුරුව 1873 වර්ෂයේදී ස්ථාපිත කරන ලද ශ්‍රී ලංකාවේ පැරණිතම ආරක්ෂක අංශ තූර්ය වාදක කණ්ඩායම මෙන්ම ප්‍රථම නිදහස් සැමරුම් උත්සවයේ ජාතික ගීය අභිමානයෙන් යුතුව වාදනය කළ පොලිස් තූර්යවාදක කණ්ඩායම ඩ්‍රම් මේජර් පොලිස් කොස්තාපල් පියුමාල් තිලකරත්න නිලධාරියාගේ මෙහෙයවීම යටතේ වාදනයෙන් එක්වෙමින් සහකාර පොලිස් අධිකාරි සමීර රාජපක්ෂ මහතා විසින් අණ දෙනු ලැබූ ශ්‍රී ලංකා පොලිස් බලඇණිය ඉදිරියට රැගෙන යන ලදී. පසුපසින් ප්‍රධාන සරඹ උපදේශක මහ සැරයන් පියසිරි විජේසුන්දර නිලධාරියා ගමන් කළේය. ඉන් අනතුරුව කාන්තා සහකාර පොලිස් අධිකාරි ඉනෝකා ලියනගේ මහත්මිය විසින් අණ ලබා දුන් කාන්තා පොලිස් බළඇණිය ගමන් කරන ලදී. ( ආරම්භය – 1952 ජනවාරි 01) 1983 වර්ෂයේ පිහිටුවන ලද දකුණු ආසියාවේ විශිෂ්ඨතම අතුරු හමුදාව ලෙස විරුදාවලිය ලත් පොලිස් විශේෂ කාර්ය බලකාය අභිමානයෙන් යුතුව සම්මාන පෙළපාලියට එක්ව ජනාධිපතිතුමන් වෙත උත්තමාචාර පළ කල අවස්ථාව උදාවූයේ ඉන් අනතුරුවය. නියතයි ජය ආදර්ශ පාඨය කරගත් පොලිස් විශේෂ කාර්ය බලකා ධජය ප්‍රධාන පොලිස් පරීක්ෂක චන්දන පියසේන විසින් රැගෙන යන ලදී. ඩ්‍රම් මේජර් පොලිස් කොස්තාපල් සුනෙත් පෙරේරා විසින් මෙහෙයවන ලද පොලිස් විශේෂ කාර්ය බලකා තුර්ය වාදක කණ්ඩායම පෙරටු කර ගනිමින් සහකාර පොලිස් අධිකාරී ගයාන් සංජීව විසින් අණදුන් පොලිස් විශේෂ කාර්ය බලකා ඇණිය, සම්මාන පෙළපාලියේ අභිමානය විහිදා දක්වන ලදී. ඇණිය පසුපසින් පොලිස් විශේෂ කාර්ය බලකායේ ප්‍රධාන සරඹ උපදේශක ලෙස පොලිස් සැරයන් චමින්ද හේරත් ගමන් කළේය. පොලිස් සම්මාන පෙළපාලියේ වර්ණවත්ම අවස්ථාව වන පොලිස් අධිකාරි මිනුර සෙනරත් මහතාගේ අණ පෙරටුකරගත් පොලිස් අශ්වාරෝහකයින් පෙළපාලියට එක්වූයේ ඉන් අනතුරුවය. 1921 වර්ෂයේදි බ්‍රිතාන්‍ය ජාතික පොලිස් නිලධාරීන් 08 දෙනෙකුගෙන් ආරම්භකළ පොලිස් අශ්වාරෝහක රාජකාරිය පොලිස් රාජකාරිය සඳහා අශ්වාරෝහකයින් යොදා ගන්නා ලද ලෝකයේ දෙවන අවස්ථාව ලෙස ඉතිහාසගතව ඇත. මෙවර ශ්‍රී ලංකා පොලිසියේ නිදහස් දින පෙළපාලි පුහුණුව ජ්‍යෙෂ්ඨ නියෝජ්‍ය පොලිස්පති පුහුණු හා උසස් පුහුණු සම්පත් ලියනගේ මහතාගේ අධීක්ෂණය යටතේ සිදුකෙරුනු අතර පොලිස් සම්මාන පෙළපාලියේ විස්තර කථන පිටපත සැකසීම හා නිවේදනය පොලිස් මාධ්‍ය කොට්ඨාසයේ උප පොලිස් පරීක්ෂක නිමල් අබේසිංහ මහතා විසින් සිදුකරන ලදී.

පොලිස්පති නීතිඥ ප්‍රියන්ත වීරසූරිය මහතාගේ යෝජනාවක් අනුව 2026.02.04 වන දිනට යෙදෙන 78 වන ජාතික නිදහස් දිනයට සමගාමීව පරිසර පොලිස් සතියක් ප්‍රකාශයට පත්කර ඇත. ඒ් අනුව ප්‍රජා පොලිස් හා පරිසර ආරක්ෂණ දිසාවේ මූලිකත්වයෙන් දිවයින පුරා රුක් රෝපණ වැඩසටහනක් ක්‍රියාත්මක වන අතර කරඳ, මී, කොස් හා පළතුරු වැනි වටිනා ශාක පැළ 25000 ක් පමණ දිවයින පුරා පොලිස් ස්ථාන වෙත බෙදාදීමට නියමිතය.  මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජයපාල මහතාගේ ප්‍රධානත්වයෙන් හා පොලිස්පතිතුමාගේ සහභාගීත්වයෙන් 2026.02.02 වන දින උදෑසන පැළ බෙදාදීමේ නිල සමාරම්භක උත්සවය පොලිස් ක්ෂේත්‍ර බලකා මූලස්ථානයේ පවත්වමින් සංකේතාත්මකව බස්නාහිර පළාතේ පොලිස් ස්ථාන 126 ක් වෙත පැළ 2500 ක් පමණ බෙදාදෙන ලදී. වන සංරක්ෂණ දෙපාර්තමේන්තුවේ අධීක්ෂණය යටතේ නිවැරදිව රෝපණය කිරීමට අවශ්‍ය උපදෙස් සමඟ දිවයිනේ සියලු පොලිස් ස්ථාන වෙත ඉදිරි දින කිහිපය තුල පැළ ප්‍රවාහණයට නියමිත අතර රෝපණය කළ පැළ සම්බන්ධව පසු විපරමක්ද ප්‍රජා පොලිස් හා පරිසර ආරක්ෂණ දිසාව විසින් සිදුකිරීමට නියමිතය ඒ් අනුව පරිසර පොලිස් නිලධාරීන්ගේ හා සමස්ථ පොලිස් බලකායේ කැපවීමෙන් සැලකිය යුතු ශාක ඝනත්වයක් පරිසරයට එක්වනු ඇත. සොභාසුන්දරත්වය රැකගනිමින් වක්‍රාකාරයෙන් පරිසරයට යහපත් ප්‍රතිඵල එක්කිරීමේ ව්‍යාපෘතියේ ප්‍රධාන අරමුණ මුදුන්පත්කර ගැනීමට හැකිවනු ඇත. සමාරම්භක උත්සව අවස්ථාවට ජනාධිපති ජ්‍යෙෂ්ඨ අතිරේක ලේකම් (මූල්‍ය හා ආර්ථික කටයුතු) ජී.එම්.ආර්.ඩී. අපොන්සු මහතා, Clean Sri Lanka ලේකම් කාර්යාලය වෙනුවෙන් ජනාධිපති අතිරේක ලේඛම් ඉංජිනේරු එස්.පී.සී සුගීෂ්වර මහතා, මහජන ආරක්ෂක අමාත්‍යංශ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහතා, ප්‍රජා පොලිස් සහ පරිසර ආරක්ෂණ දිසාව භාර නියෝජ්‍ය පොලිස්පති ආර්.ඒ්.ආර්.එන් රාජපක්ෂ මහතා, ප්‍රජා පොලිස් කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ඩි.කේ ප්‍රියන්ත මහතා, පරිසර ආරක්ෂණ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ඩි.කේ මනෝජ් පෙරේරා මහතා ඇතුලුව රාජ්‍ය නිලධාරීන් ජ්‍යෙෂ්ඨ පොලිස් නිලධාරීන් රැසක් සහභාගී විය.

හැටන් කොට්ඨාසයේ පොල්පිටිය ග්‍රාමය වෙනුවන් ඉදිකළ නව පොලිස් ස්ථානය 2026.02.06 වන දින මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතාගේ ප්‍රධානත්වයෙන්, පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් විවෘත කෙරුණි. නුවරඑළිය දිස්ත්‍රික් සංවර්ධන කමිටු සභාපති පාර්ලිමේන්තු මන්ත්‍රී මංජුල සුරවිරආරච්චි මහතා, නුවරඑලිය දිසාව නියෝජ්‍ය පොලිස්පති ප්‍රියන්ත චන්ද්‍රසිරි මහතා, හැටන් කොට්ටාශ භාර ජේෂ්ඨ පොලිස් අධිකාරි ප්‍රදීප් විරසේකර මහතා ඇතුලු හැටන් පොලිස් කොට්ටාශයේ සියලුම ස්ථානාධිපතිවරුන්, රාජ්‍ය නිලධාරීන් රැසක් විවෘත කිරීමේ උත්සව සභාවට සපැමිණ සිටි අතර පොල්පිටිය පොලිස් ස්ථානයේ ස්ථානාධිපතිවරයා වන පොලිස් පරීක්ෂක පි.එච්.එම්.එන් උපුල් කුමාර මහතා විසින් සැවොම ගෞරවාන්විත පිළිගන්නා ලදී. පොලිස්පතිතුමන් උත්සව සභාව අමතමින් සියලු පහසුකම් සහිත ස්ථිර, නවීන ගොඩනැගිල්ලක ස්ථාපනය කර ජනතා අයිතියට පත් කිරීමට ලැබීම පිළිබඳව සිය නිහතමානී සතුට ප්‍රකාශකළ අතර ලංකා විදුලිබල මණ්ඩලයට අයත් පර්චස් 78.43 ක භූමිය පවරා ගෙන 2025 නොවැම්බර් මාසයේ සිට මෙලෙස  නව පොලිස් ස්ථානයක් ලෙස ගොඩනැංවීම වෙනුවෙන් සහයෝගය දැක්වූ මහජන ආරක්ෂක අමාත්‍යංශය ප්‍රධාන සියලුම පාර්ශව වෙත සිය ස්තූතිය පළකලේය. 2021 වසරේදී කුලී පදනම මත ලබාගත් කුඩා නිවසක පවත්වාගෙන යමින් අවම ඉඩ පහසුකම් යටතේ වුවද ප්‍රදේශයේ ග්‍රාම නිලධාරී වසම් 07ක වෙසෙන 9,000කට අධික පිරිසක් වෙනුවෙන් සුවිශාල පොලිස් සේවයක් සැලසූ පොල්පිටිය පොලිස් ස්ථානය, මේ අනුව මෙතැන් සිට සියලු පහසුකම් සහිතව මැනවින් සකස්කළ පොලිසියටම වෙන්වූ භූමියක වඩාත් කාර්යක්ෂමව මහජන මෙහෙවරට කැපවනු ඇත.

පොලිස් මත්ද්‍රව්‍ය කාර්යංශයේ නිලධාරීන් ශ්‍රී ලංකා නාවික හමුදා නිලධාරීන්ගේ සහය ඇතිව මත්ද්‍රව්‍ය රැගෙන මෙරටට පැමිණෙමින් තිබූ ධීවර යාත්‍රා දෙකක් 2026.01.23 වන දින දකුණු මුහුදු තීරයේදී සැකකරුවන් 11දෙනෙකු සමඟ අත්අඩංගුවට ගෙන 2026.01.25 වන දින උදෑසන දික්ඕවිට වරාය වෙත රැගෙන පැමිණියහ. සැකකරුවන් අවුරුදු 24 ත් 50 ත් අතර වයස්වල පසුවන අම්බලන්තොට, කොස්වත්ත හා බේරුවල ප්‍රදේශවල පදිංචිකරුවන් වේ. යාත්‍රා දෙකෙහි හෙරෝයින් කිලෝග්‍රෑම් 184 ග්‍රෑම් 528 හා අයිස් මත්ද්‍රව්‍ය කිලෝග්‍රෑම් 112 ග්‍රෑම් 268 ක් අඩංගු පාර්සල් 270 ක් තිබී‌ පොලිස් භාරයට ගෙන තිබේ.  සැකකරුවන් 11 දෙනා  2026.01.25 වන දින අළුත්කඩේ අංක 01 ගරු මහේස්ත්‍රාත් අධිකරණයට ඉදිරිපත්කර දින 07 ක රැඳවුම් නියෝග ලබා ගැනීමට නියමිතව ඇත.

මහජන ආරක්ෂක අමාත්‍යවරයා සහ අමාත්‍යංශ ලේකම්තුමාගේ සම්බන්ධී කරණය හරහා පොලිස්පතිවරයා විසින් ඉන්දීය රජය, ශ්‍රී ලංකාවේ ඉන්දීය මහ කොමසාරිස් කාර්යාලය හා ඉන්දීය ආරක්ෂක අංශ සමඟ කරනු ලැබූ ඍජු සාකච්ඡාවක ප්‍රතිඵලයක් ලෙස රතු නිවේදන නිකුත් කර තිබූ විදෙස්ගතව සිටි සංවිධානාත්මක අපරාධකරුවෙකු 2026.01.24 වන දින සවස ඉන්දියාවේ සිට ගුවන් මඟින් මෙරටට රැගෙන ඒමෙන් පසු කටුනායක ගුවන් තොටුපලේදී අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් විසින් භාරයට ගත්හ.  කෙසෙල්වත්ත ප්‍රදේශයේ පදිංචිකරුවෙකු වන 34 හැවිරිදි වියේ පසුවන මෙම සැකකරු වැඩිදුර විමර්ශන සඳහා කෙසෙල්වත්ත පොලිස් ස්ථානය වෙත ඉදිරිපත්කිරීමට නියමිතය. සැකකරුට එරෙහිව පහත අපරාධ චෝදනා සම්බන්ධව ගරු අධිකරණයන්හි නඩු පවරා ඇත. • 2015 වර්ෂයේදී කෙසෙල්වත්ත පොලිස් වසමේදී තියුණු ආයුධයවලින් පහරදී මනුෂ්‍ය ඝාතනයක් සිදු කිරීම.• 2018 වර්ෂයේ කොටහේන පොලිස් වසමේදී වෙඩි තබා මනුෂ්‍ය ඝාතනයක් සිදු කිරීම සඳහා ආධාර අනුබල දීම. • 2021 වර්ෂයේදී මට්ටක්කුලිය පොලිස් වසමේදී තියුණු ආයුධවලින් පහරදී මනුෂ්‍ය ඝාතනයක් සිදු කිරීම. • 2021 වර්ෂයේදී කොටහේන පොලිස් වසමේදී ජීව අත්බෝම්බයක් සන්තකයේ තබා ගැනීම.• කෙසෙල්වත්ත, වේල්ලවීදිය, බ්ලූමැන්ඩල් යන පොලිස් වසම්වලදී කොල්ලකෑම් සහ මත්ද්‍රව්‍ය සන්තකයේ තබා ගැනීම. සැකකරු සම්බන්ධ ඉදිරි විමර්ශන කටයුතු නියෝජ්‍ය පොලිස්පති කොළඹ දිසාවගේ මෙහෙයවීම මත සිදුකරනු ලබයි.

Pick me ආයතනයේ ලියාපදිංචි කුලී රථ රියදුරෙකු හා ඇල්ල ප්‍රදේශයේ ත්‍රී රෝද කුලී රථ රියදුරන්  අතර 2025 දෙසැම්බර් මාසයේ දිනයක ඇති වූ මත බේදයක් මුල් කර ගනිමින් දිවයිනේ බොහෝ ප්‍රදේශවල Pick me, Uber වැනි  ආයතන වලට අනුබද්ධ කුලී රථ රියදුරන්ට විරුද්ධව සාමාන්‍ය ත්‍රී රෝද කුලී රථකරුවන් උද්ඝෝෂණ පැවැත්විය. එම තත්වය ගැටුම් දක්වා දුර දිග ගොස් මහජන සාමය කඩවන අවස්ථාද වාර්තා වූ බැවින් පොලිස්පති නීතිඥ ප්‍රියන්ත වීරසූරිය මහතා ගැටූමේ දෙපාර්ශව නියෝජනය කරන ත්‍රී රෝද හිමියන්ගේ සංගමයේ ප්‍රධානීන් සහ Uber, Pick me ආයතනයන් වල ප්‍රධානීන් පොලිස් මූලස්ථානය වෙත කැඳවා සාකච්ඡා පැවැත්විය. එහිදී ශ්‍රී ලංකා පොලිසියේ ප්‍රමුඛතම මෙහෙවර මහජන සාමය ආරක්ෂාකිරීම බව පැහැදිලි කළ පොලිස්පතිතුමන් මැර බලය හෝ පහරදීම්, තර්ජනය කිරීම් පැමිණිලි පොලිස් ස්ථාන වෙත වාර්තා වීමේදී ආයතනික හා සංගම් වශයෙන් පවතින ගැටළු සැලකිල්ලට නොගෙන අපරාධමය වරදකට අවශ්‍ය නීතිමය ක්‍රියාමාර්ග ගන්නා බව පැහැදිළි කළේය.

පොලිස් පවුල් සුබසාධක සංගමය මඟින් පවත්වාගෙන යනු ලබන, මරදාන, කිව් පාර සහ පොලිස් ක්ෂේත්‍ර බලකා මූලස්ථානයේ ස්ථාපිත “ටයිනි ටොට්ස්” (Tiny Tots) පෙරපාසල් ත්‍රිත්වයේ දූ දරුවන්ගේ 2025 වාර්ෂික විවිධ ප්‍රසංගය 2026 ජනවාරි 09 වන දින කොළඹ බෞද්ධ සංස්කෘතික මධ්‍යස්ථාන ශ්‍රවණාගාරයේදී ඉතා උත්කර්ෂවත් අයුරින් පැවැත්විණි. පසුගිය වසරේ පැවැත්වීමට නියමිතව තිබූ මෙම ප්‍රසංගය, දිවයින පුරා බලපෑ අයහපත් කාලගුණික තත්ත්වය හේතුවෙන් තාවකාලිකව කල් දැමීමට සංවිධායක මණ්ඩලය පියවර ගෙන තිබුණි. මෙම අවස්ථාව සඳහා ප්‍රධාන ආරාධිත අමුත්තන් ලෙස පොලිස්පති ප්‍රියන්ත වීරසූරිය මහතා සහ සභාපතිණිය, පොලිස් සේවා වනිතා ඒකකය සහ පොලිස් පවුල් සුබසාධක සංගමය නිල්මිණී සමරතුංග මැතිණිය, ජ්‍යෙෂ්ඨ නියෝජ්‍ය පොලිස්පති රාජිත ශ්‍රී දමින්ද මහතා, නියෝජ්‍ය පොලිස්පති ඩබ්.වී. ගිණිගේ මහතා ඇතුළු පොලිස් සේවා වනිතා ඒකකයේ හිටපු සභාපතිණියන් ඇතුළු සම්භාවනීය අමුත්තන් රැසක් සහභාගී වූහ. කුඩා දූ දරුවන්ගේ සහජ දක්ෂතා සහ නිර්මාණශීලීත්වය විදහා දක්වමින් ඉදිරිපත් කළ විචිත්‍රවත් නර්තන, ගායන සහ රංගනයන්ගෙන් මුළු ප්‍රසංගයම අලංකාරවත් විය. පොලිස් පවුල්වල දූ දරුවන්ගේ සුබසාධනය සහ මුල් ළමාවිය සංවර්ධනය වෙනුවෙන් පොලිස් පවුල් සුබසාධක සංගමය සිදුකරනු ලබන මෙහෙවර මෙහිදී ඇගයීමට ලක්විය. දරුවන්ගේ දක්ෂතා ඇගයීම සඳහා සහභාගී වූ දෙමාපියන් සහ පොලිස් නිලධාරීන්ගෙන් ශ්‍රවණාගාරය පිරී පැවති අතර, එය ඉතාමත් සාර්ථක අයුරින් නිමාවට පත්විය.

මෙරට පුද්ගලයින් රථ වාහන වෙනුවෙන් රක්ෂණ සමාගම් මගින් වාර්ෂිකව ලබාගන්නා ප්ලාස්ටික් රක්ෂණ කාඩ්පත ඉදිරියේදී ඉවත්කෙරෙනු ඇත. ඒ් වෙනුවට ශ්‍රී ලංකා රක්ෂණ නියාමන කොමිෂන් සභාවේ මැදිහත් වීම මත සකස්කළ නව ස්ථීර ඩිජිටල් රක්ෂණ කාඩ්පතක් ලබාදීමට අවශ්‍ය කටයුතු සිදුවෙමින් පවතී. මාර්ගයේදී රක්ෂණ කාඩ්පත පරීක්ෂා කරනු ලබන පොලිස් නිලධාරියා මෙන්ම පොලිස්පති නීතිඥ ප්‍රියන්ත වීරසූරි මහතා ඇතුලු ජ්‍යෙෂ්ඨ පොලිස් නිලධාරීන් මෙම නව වැඩපිළිවෙල සම්බන්ධව දැනුවත්කිරීම සඳහා මහජන ආරක්ෂක අමාත්‍යංශය හා ශ්‍රී ලංකා රක්ෂණ නියාමන කොමිෂන් සභාව විසින් සංවිධානය කළ හමුවක් 2026.01.07 වන දින සවස මහජන ආරක්ෂක සහ පාර්ලිමේන්තු කටයුතු අමාත්‍යංශ ශ්‍රවනාගාරයේදී පැවැත්වුනි. ගරු පාර්ලිමේන්තු කටයුතු හා මහජන ආරක්ෂක අමාත්‍ය ආනන්ද විජේපාල මහතා, ගරු පාර්ලිමේන්තු කටයුතු හා මහජන ආරක්ෂක නියෝජ්‍ය අමාත්‍ය සුනිල් වටගල මහතා, මහජන ආරක්ෂක අමාත්‍යංශයේ ලේකම් රවී සෙනෙවිරත්න මහතා සහ පොලිස්පති නීිතිඥ වීරසූරිය මහතා මෙම හමුව සඳහා මූලිකත්වය ගෙන සහභාගී වූ අතර, රක්ෂණ නියාමන කොමිෂන් සභාවේ වත්මන් සභාපති ආචාර්ය අජිත් රවීන්ද්‍ර ද මෙල් මහතා විසින් එහිදී මෙම නව ඩිජිටල් ක්‍රියාවලියේ අරමුණු හා ප්‍රතිලාභ පිළිබඳව දැනුවත් කෙරෙන ප්‍රධාන දේශනය පවත්වන ලදී. මේ වන විට භාවිතයේ පවතින ප්ලාස්ටික් රක්ෂණ කාඩ්පත් වාර්ෂිකව කල් ඉකුත්වීමෙන් පරිසරයට එකතුවී සිදුවන පරිසර දූෂණය, නව කාඩ්පත් සකස්කිරීමට වැයවන අධික මූල්‍ය පිරිවැය වැනි රක්ෂණ ක්ෂේත්‍රයේ කාඩ්පත ඇසුරින් අවස්ථානුකූලව ඇතිවන වෙනත් ගැටළු රැසක් විසඳාගැනීමේ හැකියාව මෙම නව ක්‍රමය ඇසුරින් උදාවනු ඇති බව එතුමා පොලිස් නිලධාරීන් අමතා ප්‍රකාශ කළේය. වැඩිදියුණුකළ ශ්‍රී ලංකා පොලිසියේ රිය අනතුරු දත්ත කළමනාකරණ පද්ධතිය පහසුවෙන් පරිහරනය කිරීමට ඉඩ සලසමින් හා මෙම නව රක්ෂණ ඊ-කාඩ්පත භාවිතා කිරීම සඳහා අවශ්‍ය තාක්ෂණික මෙවලමක් ලෙස ටැබ් යන්ත්‍ර 500ක් බස්නාහිර පළාතේ රථවාහන පොලිස් නිලධාරීන් අතර බෙදාදීම ආරම්භ කරමින් වැඩසටහන අතරතුර ටැබ් යන්ත්‍ර 150 ක් සංකේතාත්මක පොලිස් නිළධාරීන් අතර බෙදා දීම සිදුවිය. ශ්‍රී ලංකා රක්ෂණ නියාමන කොමිෂන් සභාවේ අධ්‍යක්ෂ ජෙනරාල් දමයන්ති ප්‍රනාන්දු මහත්මිය, ශ්‍රී ලංකා පොලිසියේ පරිපාලනය භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතා, ශ්‍රී ලංකා රක්ෂණ කරුවන්ගේ සංගමයේ සභාපති ලසිත විමරත්න මහතා සහ රක්ෂණ සමාගම්වල විධායක නිලධාරීන් ඇතුලු ජ්‍යෙෂ්ඨ රාජ්‍ය නිලධාරීන්, පොලිස් නිලධාරීන් මෙම හමුව සඳහා සඳහා සහභාගී වූහ.