Special Events – SI

සකල ලෝ වාසී බෞද්ධ ජනතාව ඉමහත් බක්තියෙන් සමරන 2026 වෙසක් පුර පසළොස්වක පොහොය හෙට දිනට (29) යෙදී ඇති නිමිත්තෙන් පොලිස් මූලස්ථානය සංවිධානය කළ විශේෂ ධර්ම දේශනාමය පිංකමක් පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් 2026.05.28 වන දින සවස පොලිස් මූලස්ථානය පරිශ්‍රයේදී පැවැත්වුනි. ධර්ම දේශනය සඳහා වැඩමවා වදාළ පූජ්‍යපාද රාජගිරියේ අරියඥාන ස්වාමීන් වහන්සේ විසින් ධර්ම දේශනය ශ්‍රවනය කිරීමට එක්වුනු  පොලිස් මූලස්ථානයේ නිලධාරීන්ගේ අධ්‍යාත්මික සංවර්ධනය සහ මානසික සුවය,පෞර්ෂ වර්ධනය උදෙසා වැදගත් වූ අවවාද හා ධර්ම කරුණුවලින් පොහොසත් දේශනාවක් වදාළ සේක.

අපරාධ හා ප්‍රචණ්ඩත්වයෙන් තොර, සැමට බියකින් තොරව ජීවත් විය හැකි සුරක්ෂිත පරිසරයක් ගොඩනැගීමේ වැඩපිළිවෙළ යටතේ, සහස්පුර නව පොලිස් ස්ථානය අද දින (2026 මැයි 08) උත්සවාකාරයෙන් විවෘත කරන ලදී. මෙම අවස්ථාව සඳහා ප්‍රධාන ආරාධිත අමුත්තා ලෙස මහජන ආරක්ෂක සහ පාර්ලිමේන්තු කටයුතු පිළිබඳ ගරු අමාත්‍ය ආනන්ද විජේපාල මහතා සහභාගී වූ අතර, නියෝජ්‍ය අමාත්‍ය සුනිල් වටගල මහතා සහ  පොලිස්පති ප්‍රියන්ත වීරසූරිය මහතා ඇතුළු ජ්‍යෙෂ්ඨ පොලිස් නිලධාරීන් පිරිසක් ද මෙම අවස්ථාවට එක්ව සිටියහ. ප්‍රදේශයේ නීතිය හා සාමය තහවුරු කරමින් මහජනතාවට කාර්යක්ෂම සේවාවක් සැලසීම, නවීන තාක්ෂණය හා ප්‍රජා පොලිස් සංකල්පය ඔස්සේ අපරාධ පාලනය කිරීමට නව පොලිස් ස්ථානය මූලිකත්වය ගනු ඇත. එමෙන්ම ප්‍රදේශවාසීන්ට ඉතා පහසුවෙන් සහ කඩිනමින් පොලිස් සේවාවන් ලබා ගැනීමට මෙහිදී අවස්ථාව සැලසේ.

වියට්නාම ජනාධිපතිතුමාගේ මෙරට නිල සංචාරයට සමගාමීව වියට්නාමයේ මහජන ආරක්ෂක අමාත්‍ය Luong Tam Quang මහතා හා මෙරට මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජයපාල මහතා අතර දෙරටේ ආරක්ෂක සහයෝගීතාවය නව ක්ෂේත්‍ර කිහිපයකින් වර්ධනය වන අවබෝධතා ගිවිසුමක් 2026.05.08 දින උදෑසන පොලිස් මුලස්ථානයේදී අත්සන් කෙරුණි. මහජන ආරක්ෂක ලේකම් රවී සෙනෙවිරත්න මහතා, පොලිස්පති නීතිඥ ප්‍රියන්ත වීරසූරිය මහතා හා ශ්‍රී ලංකා පොලිසියේ ජ්‍යෙෂ්ඨ නිලධාරීන් රැසක් මෙම අවස්ථාවට සහභාගී වූ අතර ගිවිසුම ප්‍රකාරව සයිබර් අපරාධ,මිනිස් වෙළඳාම වැනි  සංවිධානාත්මකව සිදුවන අපරාධ වලක්වාගැනීමට හා අත්අඩංගුවට ගන්නා සැකකරුවන් සම්බන්ධව ක්‍රියකිරීමේදී, තොරතුරු හුවමාරුකරගැනීමේදී මෙන්ම පොලිස් නිලධාරීන් වෙනුවෙන් පුහුණු අවස්ථා ඇතිකිරීම සඳහා අවශ්‍ය සහයෝගය පිලිබඳව ඵලදායී වූ සාකච්ඡා පැවැත්වුනි. මෙම විශේෂ අවස්ථාව සිහිගන්වමින් පොලිස්පතිතුමා, කටාන පොලිස් අභ්‍යාස විද්‍යාලය, නියෝජ්‍ය පොලිස්පති මංජුල මහගිරිල්ල මහතා සහ විදෙස් දූත පිරිස අතර සමරු සිහිවටන හුවමාරුවිය.

මෑත අවුරුදු කිහිපය තුළ ශ්‍රී ලංකා පොලිස් සේවයෙන් විශ්‍රාම ලැබූ නිලධාරීන් යනු තිස් වසරක යුද සමයද ඇතුලුව මෙරට මුහුණදුන් අභියෝගාත්මක කාලසීමාවේ රට වෙනුවෙන් ජීවිත පරදුවට තබා පොලිසියේ භාරදූර්ය කාර්යයන් ඉටුකළ ජ්‍යෙෂ්ඨ පුරවැසියන් සමූහයකි. ශ්‍රී ලංකා පොලිසියේ උසස් නිලතල දැරූ එවැනි විශ්‍රාමික පොලිස් නිලධරයන් පිරිසක් වෙනුවෙන් විශ්‍රාමික රාජ්‍ය නිවේදිත නිලධාරීන්ගේ සංගමය සංවිධානය කළ අලුත් අවුරුදු උත්සවයක් පසුගියදා කොළඹ 07 ප්‍රදේශයේ පිහිටි ජ්‍යෙෂ්ඨ පොලිස් නිලධාරී නිවස්නය ඉදිරිපිට ක්‍රීඩාංගණයේදී පැවැත්වුනි. ප්‍රධාන ආරාධිත අමුත්තා ලෙස විශ්‍රාමික ‌‌ජ්‍යෙෂ්ඨ නියෝජ්‍ය පොලිස්පතිවරයෙකු වන මහජන ආරක්ෂක අමාත්‍යංශයේ වත්මන් ලේකම් රවී සෙනෙවිරත්න මහතා‌  සහභාගී වූ අතර පොලිස්පති නීතිඥ ප්‍රියන්ත වීරසූරිය මහතා සහ වයඹ පළාත භාර ජ්‍යෙෂ්ඨ නියෝජ්‍ය පොලිස්පති නීතිඥ අජිත් රෝහන මහතාද විශ්‍රාමික නිලධාරීන් වෙනුවෙන් මෙම අවස්ථාවට එක්විිය. විශ්‍රාමික රාජ්‍ය නිවේදිත නිලධාරීන්ගේ සංගමයේ ලේකම් විශ්‍රාමික නියෝජ්‍ය පොලිස්පති ලක්ෂ්මන් බණ්ඩාර මහාතා ඇතුළු එම සංගමය විසින් මෙහිදී විනෝද ක්‍රීඩා,  ජන ක්‍රීඩා රැසක් සමඟ කැවිලි මේසයක් මැනවින් සංවිධානය කර තිබූ අතර විශ්‍රාමික ජ්‍යෙෂ්ඨ නිලධාරීන් එකිනෙකා හමුවූ සුහඳ හමුවක් ලෙසද ඔවුන්ට මෙම උත්සවය ඉතා වින්දනාත්මක අවස්ථාවක් විය.

The Sri Lanka Police was honoured with the award for the Best State Institution at the LankaPay Technnovation – 2026 Awards Ceremony, in recognition of its exemplary contribution to implementing the online payment system for traffic fines through GovPay. LankaPay, the organization responsible for developing and operating the innovative national digital payment network (GovPay) under the guidance of the Central Bank of Sri Lanka, organized the LankaPay Technnovation – 2026 Awards Ceremony to acknowledge institutions dedicated to advancing the nation towards a digitally transformed future by delivering efficient and citizen-centric services. The event was held on the evening of 25 March 2026 at the Shangri-La Hotel Complex in Colombo. During the ceremony, the Sri Lanka Police received the award for its outstanding commitment to delivering high-quality digital payment services (GovPay) to the public. Special recognition was extended to the Inspector General of Police, Attorney-at-Law Priyantha Weerasuriya; Senior Deputy Inspector General in charge of Crime and Traffic, Ranmal Kodithuwakku; Deputy Inspector General in charge of Traffic Control and Road Safety, W. P. J. Senadheera; and the Officer-in-Charge of the Police Information Technology Division, Chief Inspector Lakmal, for their significant contributions towards introducing and promoting the digital payment system, thereby enhancing public convenience. The awards ceremony was graced by distinguished guests, including the Honorable Deputy Minister of Digital Economy, Eranga Weeraratne; the Governor of the Central Bank of Sri Lanka, Dr. P. Nandalal Weerasinghe; and the President’s Principal Advisor on Digital Economy, Dr. Hans Wijesuriya. The event also saw the participation of heads of several leading private institutions in the country, recognized for their excellence in adopting digital solutions.

පොලිස් රාජකාරි අතරතුර දිවි පිදූ නිලධරයින් ගෞරවයෙන් සිහිපත්කරන මාර්තු මස 21 වන අද දිනට යෙදෙන පොලිස් විරු සමරු දිනයට සමගාමීව ශ්‍රී ලංකා පොලිසිය, පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් මහනුවර දළදා මාලිගාවේ තැන්පත් අතිපූජනීය දළදා වහන්සේ උදෙසා උදෑසන මුල්තැන් දානය පූජා කරන ලදී. මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පති ලලිත් පතිනායක මහතා ඇතුළුව මහනුවර සහ මාතලේ පොලිස් කොට්ඨාසවල ජ්‍යෙෂ්ඨ පොලිස් නිලධාරීන්, වික්‍රමාන්විත රාජකාරියේදී දිවි පිදූ නිලධාරීන්ගේ සමීප ඥාතීන් මෙම උතුම් පින්කම සඳහා සහභාගී වූ අතර පොලිස්පතිතුමන් එහිදී පොලිස් කොට්ඨාස ධජ උතුම් දළදා වහන්සේ ඉදිරිපිට තබා සියළු පොලිස් නිලධාරීන්ට ආශිර්වාද ප්‍රාර්ථනා කරන ලදී.

මෙරට ඉතිහාසයේ වික්‍රමාන්විත, අභිමානවත් පොලිස් රාජකාරීන් අතරතුර දිවි අහිමිවූ ශ්‍රී ලංකා පොලිසියේ පොලිස් විරුවන් ගෞරවාන්විතව අනුස්මරණය කරමින් 162 වන පොලිස් විරු සමරු දින ප්‍රධාන සැමරුම පොලිස්පති නීතිඥ ප්‍රියන්ත වීරසූරිය මහතාගේ ප්‍රධානත්වයෙන් 2026.03.21 වන උදෑසන කොළඹ, පොලිස් ක්ෂේත්‍ර බලකා මූලස්ථානයේදී පැවැත්වුනි. පොලිස් නිලධරයන් හා පොලිස් විශේෂ කාර්ය බලකා නිලධරයන්ගෙන් සමන්විත වූ සම්මාන මුර පෙළපාලියක ගෞරව හරසර මධ්‍යයේ පොලිස්පතිතුමන් හා දිවි පිදූ පොලිස් විරුවන්ගේ සමීප ඥාතීන් ක්ෂ්ත්‍ර බලකා මුලස්ථානයේ ස්ථාපිත රණවිරු ස්මාරකයට පුෂ්ප උපහාර උපහාර පුද කළහ. පොලිස්පතිතුමන් විරුදින සැමරුම ආමන්ත්‍රණය කරමින් “සෑම දිනකම හිරු නැග එන මෙහොතේ මෙන්ම හිරු බැස යන මොහොතේ දිවි පිදූ පොලිස් නිලධාරීන් අනුස්මරණය කර සිය ගෞරවස්තූතිය පුදකරන බවත්, දිවිපිදූ නිලධරයන්ගේ සමීප ඥාතීන්ගේ සුභ සාධනය වෙනුවෙන් හැකි උපරිමයෙන් කැපවන බවත්”  ප්‍රකාශ කළේය. වාර්තාගතව ඇති පරිදි උතුවන්කන්දේ සරදියල් අත් අඩංගුවට ගැනීමට කෑගල්ල මහ දිසාපතිවරයා වන ඊ. ආර්. සෝන්ඩස් ගේ නියෝගයක් අනුව රාජකාරි කළ පොලිස් කොස්තාපල් සභාන් නැමැති නිලධාරියා සරදියෙල් සමඟ ගැටුමේදී මිය ගිය දින සිට අද දිනය දක්වා පොලිස් රාජකාරි වෙනුවෙන් දිවි පිදූ පොලිස් නිලධාරීන් ගණන 5789 කි. කාන්තා නිලධාරිනියන් ගණන 07කි. දිවි පිදූ පොලිස් විශේෂ කාර්ය බලකා නිලධරයන් ගණන 464 කි. ව්ක්‍රමාන්විත පොලිස් රාජකාරියේදී ආබාධිත වූ පොලිස් නිලධරයන් ගණන 1633 කි. මින් 30 වසරක උතුරු නැගෙනහිර යුධ සමයේදී නිලධරයන් 2598 ක් රට දැය සාමය වෙනුවෙන් දිවි පුදා ඇති අතර යුධ සමයේදී අබාධිත වූ විරුවන් ගණන 1575 කි. දිවි පිදූ පළමු කාන්තා නිළධාරිනිය ලෙස ඉතිහාසයේ සඳහන්ව තිබෙන්නේ 1989 ජූලි 16 වන දින මහනුවරදී වික්‍රමාන්විත පොලිස් රාජකාරියකදී දිවි පිදූ  යශෝමැණිකේ නිලධාරිනිය පිළිබඳවයි.  මෙවර සම්මාන මුර පෙළපාලියේ ප්‍රධාන අණදෙන්නා ලෙස පොලිස් ක්ෂේත්‍ර බලකා මූලස්ථානයේ අණදෙන නිලධාරී ජ්‍යෙෂ්ඨ පොලිස් අධිකාරී හේමාල් ප්‍රශාන්ත මහතා කටයුතු කළ අතර ජ්‍යෙෂ්ඨ නියෝජ්‍ය පොලිස්පතිවරුන් ඇතුළු පොලිස් නිලධාරීන් රැසක් රණවිරු ස්මාරකයට උපහාර දක්වමින් ගෞරවාන්විතව විරු දිනය අනුස්මරණය කිරීමට ක්ෂේත්‍ර බලකා මූලස්ථානයට එක්ව සිටියහ.

ශ්‍රී ලාංකේය සිසු පරපුරේ අධ්‍යාපන සිහින සැබෑ කරලීම වෙනුවෙන්, ඔක්ස්ෆර්ඩ් චෙස්ටර් උසස් අධ්‍යාපන ආයතනය (OCU) මගින් 2026.03.19 දින පූර්ණ ශිෂ්‍යත්ව 75ක් පිරිනමන ලදී. ගංගාරාම විහාරාධිපති පූජ්‍ය ආචාර්ය කිරින්දේ අස්සජි ස්වාමින් වහන්සේගේ ජන්ම දිනය නිමිත්තෙන් සංවිධානය වූ මෙම වැඩසටහන, උන්වහන්සේගේ සෘජු මගපෙන්වීම සහ සුවිශේෂී සංකල්පයකට අනුව ක්‍රියාත්මක නැන්වූවකි. පොලිස්පතිතුමාගේ සහභාගීත්වයෙන්පොලිස් මූලස්ථානයේදී මෙම වැඩසටහන ආරම්භ වූ අතර ඒ සඳහා පොලිස් සේවා වනිතා ඒකකයේ සභාපතිනී නීතීඥ නිල්මිණී නීටා සමරතුංග මහත්මියද සහභාගි විය.  මෙහිදී රට වෙනුවෙන් අප්‍රතිහත සේවයක් ඉටු කරන පොලිස් නිලධාරීන්ගේ දරුවන් වෙනුවෙන් උපහාරයක් ලෙස මෙන්ම, දැඩි ආර්ථික දුෂ්කරතා මධ්‍යයේ ඉගෙනුම ලබන දක්ෂ දරුවන් වෙනුවෙන් මෙම ශිෂ්‍යත්ව ප්‍රදානය කෙරිණි. ශ්‍රී ලංකාවේ අධ්‍යාපන ක්ෂේත්‍රය ජාත්‍යන්තර මට්ටමට ඔසවා තැබීමට සහ සිසුන්ට අවශ්‍ය සහයෝගය ලබාදීමට ආචාර්ය දුලාන් හෙට්ටිආරච්චි මහතා ලබාදෙන සුවිශේෂී දායකත්වය මෙහිදී ඇගයීමට ලක්විය. අස්සජි හිමියන්ගේ මගපෙන්වීම මත ඔක්ස්ෆර්ඩ් චෙස්ටර් ආයතනය ක්‍රියාවට නංවන මෙම සමාජ සත්කාරය, මෙරට අනාගත පරපුරේ අධ්‍යාපන අයිතිය සුරක්ෂිත කරන්නකි.  බස්නාහිර පළාත් ආණ්ඩුකාර ගරු හනීෆ් යූසෆ්, බස්නාහිර පළාත් අධ්‍යාපන ලේකම්, වනන් පෙරේරා, ජ්‍යෙෂ්ඨ නියෝජ්‍ය පොලිස්පති පරිපාලන සංජීව ධර්මරත්න, නියෝජ්‍ය පොලිස්පති පොලිස් මූලස්ථාන, නාලක සිල්වා  මහතා යන මහත්වරුන් ඇතුළු පිරිසක්ද මෙම අවස්ථාවට සඳහා සහභාගි වූහ. 

චීන ජනරජය හා ශ්‍රී ලංකාව අතර පවතින සහයෝගීතාවයන් වෙනුවෙන් ද්විපාර්ශික සාකච්ඡා සඳහා මෙරටට පැමිණි මහජන චීන ජනරජයේ ජාතික ආගමන පරිපාලන නියෝජ්‍ය අමාත්‍ය Zhang Yong මහතා ඇතුළු චීන ජනරජයේ නියෝජිත පරිසක් 2026.03.14 වන දින පොලිස් මූලස්ථානයේදී පොලිස්පති නීතිඥ ප්‍රියන්ත වීරසූරිය මහතා හමුවිය. එහිදී සංවිධානාත්මක අපරාධ, මිනිස් ජාවාරම්, සයිබර් අපරාධ, ආදී දෙරටෙහි මහජන ආරක්ෂාවට තර්ජනයක් වන ක‍්‍රියාකාරකම් වැළක්වීම සඳහා ගෙන ඇති ක්‍රියාමාර්ගවල ප්‍රගතිය පිළිබඳව හා නව තාක්ෂණය භාවිතයන් පිළිබඳව සාකච්ඡාවට බඳුන් වී ඇත. මෙදින Zhang Yong මහතා ඇතුළු දූත පිරිස හා මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල මහතා අතර මහජන ආරක්ෂක අමාත්‍යංශයේදී පැවත්වුනු ද්විපාර්ශික සාකච්ඡා සඳහාද පොලිස්පතිතුමා සහභාගී වූ අතර එහිදී දෙරටෙහි ආගමන විගමන පරිපාලනය හා සංවිධානාත්මක අපරාධ වැලැක්වීම,  මහජන ආරක්ෂාව සම්බන්දව වැදගත් වන කරුණු රැසක් පිළිබඳව සහයෝගීතාවය වර්ධනය කර ගැනීමේ සාකච්ඡා කෙරුණි.  මෙම අවස්ථාව සඳහා  ශ‍්‍රී ලංකාවේ මහජන චීන ජනරජ තානාපති Qi Zhenhong මහතා, මහජන ආරක්ෂක හා පාර්ලිමේන්තු කටයුතු නියෝජ්‍ය අමාත්‍ය නීතිඥ සුනිල් වටගල මහතා, මහජන ආරක්ෂක හා පාර්ලිමේන්තු කටයුතු අමාත්‍යංශ ලේඛම් රවී සෙනෙවිරත්න මහතා, ආගමන විගමන දෙපාර්තමේන්තුවේ වැඩබලන පාලක ජනරාල් චමින්ද පතිරාජ මහතා ඇතුළු රජයේ ඉහළ නිලධාරීන් රැසක් සහභාගී විය.

පොලිස් මත්ද්‍රව්‍ය කාර්යංශය විසින් සිදුකළ වැටලීම් මගින් අත්අඩංගුවට ගෙන නඩු කටයුතු අවසන් කළ හෙරොයින් කිලෝග්‍රෑම් 40 ග්‍රෑම් 539 ක්, කැතීන් මත්ද්‍රව්‍ය කිලෝග්‍රෑම් 132 ග්‍රෑම් 79 ක්, කොකේන් ග්‍රෑම් 55 ක් හා මත්පෙති 3482 ක් දවා විනාශ කිරීම සඳහා 2026.03.13 ක් දවා වන දින උදෑසන ගරු කොළඹ මහාධිකරණයේ සිට පුත්තලම වනාතවිල්ලුව ප්‍රදේශය දක්වා ප්‍රවාහනය කරන ලදී. මෙම තොගයට අමතරව බලපිටිය මහේස්ත්‍රාත් අධිකරණයේ විභාග නඩු විභාග වී අවසන් වූ හෙරොයින් කිලෝග්‍රෑම් 19 ක්, රස පරීත්ෂක කාර්යාලයේ තිබෙන නඩු කටයුතු 1500 කට ආසන්න ප්‍රමාණයක සියළුම නඩු භාණ්ඩද මෙදින විනාශ කිරීමට නියමිතය. පොලිස් විශේෂ කාර්ය බලකායේ විශේෂ ආරක්ෂාව යටතේ උදෑසන 09.00 පමණ වන විට වනාතවිල්ලුව ප්‍රදේශයේ ලැක්ටොවත්ත ප්‍රදේශයේ ස්ථාපිත කර ඇති දහන උඳුන වෙත ප්‍රවාහනය කළ මෙම තොගය දවා විනාශ කිරීම අධීක්ෂණය සඳහා ගරු මහේස්ත්‍රාත්වරුන්, රස පරීක්ෂක කාර්යාලයේ නිලධාරීන්, අන්තරාදායක ඖෂධ පාලක මණ්ඩලයේ නිලධාරීන්, ශ්‍රී ලංකා පොලිසියේ නිලධාරීන් සහභාගී විිය.