Notable Services – SI

මුලතිව් පොලිස් කොට්ඨාස‌යට අයත් වැලිඔය පොලිස් ස්ථානයේ නිලධාරීන්ට හා පොලිස් ස්ථානයට පැමිණෙන ප්‍රදේශවාසීන්ට ගැටළුවක්ව පැවති සෞඛ්‍යාරක්ෂිත පානීය ජල ගැටළුව 2026.06.13 වන දින පොලිස්පති නීතිඥ ප්‍රියන්ත වීරසූරිය මහතා උතුරු පළාත තුළ සිදුකළ නිල සංචාරය අතරතුර නිමා කෙරුණි. පොලිස් සේවා වනිතා ඒකකයේ සභාපතිනී නීතිඥ නිල්මිණි නීටා සමරතුංග මහත්මියගේ සම්බන්ධීකරණය මත Vaultino LLC (pvt).Ltd ආයතනය හා ව්‍යාපාරික ඉෂාන් අධිකාරි මහතාගේ ධනපරිත්‍යාගයෙන් පොලිස් ස්ථානය පරිශ්‍රයේ ඉදිකළ අංගසම්පූර්ණ ජල පවිත්‍රකරණ යන්ත්‍රයක් පොලිස්පතිතුමා විසින් නිලධාරීන්ගේ හා ජනතාවගේ පරිහරණය කිරීම සඳහා නිල වශයෙන් එදින උදෑසන විවෘත කළේය. පොලිස් ස්ථානයේ භූමි සීමාවෙන් පිටත සිට පානීය ජලය ලබාගත හැකි පරිදි ජල පවිත්‍රකරණ යන්ත්‍රයෙන් පිරිපහදු කෙරෙන ජලය යොමුකිරීමටද වැලිඔය පොලිස් ස්ථානය කටයුතු සම්පාදනය කර ඇත. මීට සමගාමීව වැලිඔය කල්‍යාණිපුර විද්‍යාලයේ ඉගෙනුම ලබන ශිෂ්‍ය ශිෂ්‍යාවන් 126 දෙනෙකු සඳහා අවශ්‍ය පාසල් බෑග් පරිත්‍යාග කිරීම හා ගැබිනි මව්වරුන් සදහා ළදරු උපකරණ කට්ටල බෙදාදිම ද මෙහිදී පොලිස්පතිවරයා අතින් සිදු විය. දුෂ්කරතා මධ්‍යයේ අධ්‍යාපනය ලබන දරුවන්ගේ අධ්‍යාපන කටයුතු නංවාලීම වෙනුවෙන් මෙම සත්කාරය සංවිධානය කර තිබුණි. විවෘත කිරීමේ අවස්ථාව ව්‍යාපාරික ඒෂාන් අධිකාරී මහතා වැලිඔය පොලිස් ස්ථානය අයත් උතුරු පළාත භාර ජ්‍යෙෂ්ඨ නියෝජ්‍ය පොලිස්පති ජී.එම්.එච්. බුද්ධික සිරිවර්ධන, නියෝජ්‍ය පොලිස්පති එම්.එන්.එස්. මෙන්ඩිස් සහ ජ්‍යෙෂ්ඨ පොලිස් අධිකාරි එල්.ඒ.ඩී. රත්නවීර,සහකාර පොලිස් අධිකාරී II ආර්.එම්.ඒ ජේ ආරියරත්න, වැලිඔය ස්ථානාධිපති පොලිස් පරීක්ෂක ඩි.එම්.ටි.එස් විජේරත්න යන නිලධාරීන් සමඟ කල්‍යාණිපුර විද්‍යාලයේ විදුහල්පති ඇතුළු ආචාර්ය මණ්ඩලය, සිසු දරු දැරියන් සහ ප්‍රදේශවාසීන් සහභාගී විය.

“Transnational Crime and Social Protection: Integrated Responses for Regional Security” යන තේමාව යටතේ පැවැත්වෙන මෙම සමුළුව සඳහා දේශීය හා ජාත්‍යන්තර පර්යේෂකයන්, විශ්වවිද්‍යාල ආචාර්යවරුන්, නීති ක්‍රියාත්මක කිරීමේ වෘත්තීයවේදීන්, ප්‍රතිපත්ති නිර්මාණකරුවන් සහ අදාළ ක්ෂේත්‍රවල වෘත්තීයවේදීන්ට හා පොලිස් නිලධරයන්ට තම පර්යේෂණ සාරාංශ ඉදිරිපත් කිරීමට ආරාධනා කෙරේ. 📅 Conference Dates: 31 August 2026 – National Police Academy, Sri Lanka 01 September 2026 – The Grand Maitland Hotel, Colombo 07 📲 Scan the QR code on the flyer to submit your abstract via Microsoft CMT. 🔗 වැඩිදුර තොරතුරු සඳහා: https://npa.gov.lk/?page_id=3552 📧 npa.irc@police.gov.lk 📞 +94 71 859 1807 නව අවසන් දිනය: 2026 ජුනි 25

මත්ද්‍රව්‍ය භාවිතයට සිසු දරුවන් ඇතුළු සමාජය නැඹුරුවීමෙන් වළක්වාගැනීම සඳහා නිකවැරටිය පොලිස් කොට්ඨාසය සංවිධානය කළ දැනුවත් කිරීමේ හමුවක් වයඹ පළාත භාර ජ්‍යෙෂ්ඨ නියෝජ්‍ය පොලිස්පති අචාර්ය නීතීඥ අජිත් රෝහණ මහතාගේ ප්‍රධානත්වයෙන් 2026.06.02 දින මහව විජයබා ජාතික පාසලේ සයිමන් නවගත්තේගම ශ්‍රවනාගාරයේ දී පැවැත්වුනි. අන්තරායකර ඖෂධ පාලක ජාතික මණ්ඩලයේ නියෝජ්‍ය අධ්‍යක්ෂ ප්‍රදීප් කොහොලානේගෙදර මහතා විසින් ප්‍රධාන දේශනය පවත්වමින් දැනුවත් කිරීමේ හමුව සඳහා කැඳවා තිබූ නිකවැරටිය හා මහව අධ්‍යාපන කළාප වල අධ්‍යාපන බලධාරීන් හා පාසල් විදුහල්පතිවරුන් පවතින තත්වය හා වළක්වා ගැනීමට ගතයුතු ක්‍රියාමාර්ග සම්බන්ධයෙන් සවිස්තරව දැනුවත් කරන ලදී. එමෙන්ම ජාතික ළමාරක්ෂක අධිකාරිය කුරුණෑගල දිස්ත්‍රික් මනෝ සමාජීය නිලධාරිණී එම්.කාංචනා සුභසිංහ මිය විසින්ද දේශණයක් පවත්වා ළමුන් සම්බන්ධව අවධානය යොමුකළ යුතු නිසි පියවර සම්බන්ධයෙන් එහිදී හරවත් දේශනයක් පැවැත්විය.   මෙම අවස්ථාව සදහා  කුරුණෑගල දිසාව භාර නියෝජ්‍ය පොලිස්පති ප්‍රියන්ත චන්ද්‍රසිරි මහතා, නිකවැරටිය කොට්ඨාශය භාර ජ්‍යෙෂ්ඨ පොලිස් අධිකාරි එස්.පී.කේ. ගාල්ලගේ මහතා, මහව දිස්ත්‍රික්කය භාර සහකාර පොලිස් අධිකාරි සමීර රාජපක්ෂ මහතා ඇතුළු නිකවැරටිය කොට්ඨාශයේ පොලිස් ස්ථාන 16 හි ස්ථානාධිපතිවරුන් ද, වයඹ පළාත් අතිරේඛ පළාත් අධ්‍යාපන අධ්‍යක්ෂ (සංවර්ධන) ඒ.එම්.ඩී. වෑදණ්ඩ මහත්මිය, කළාප අධ්‍යාපන අධ්‍යක්ෂ නිකවැරටිය ලක්ෂමන් හපුආරච්චි මහතා ඇතුළු රාජ්‍ය නිලධාරීන් සහභාගි විය.

අංක 07, ජෝශප් ප්‍රේෂර් පාර, කොළඹ 05 ලිපිනයේ පිහිටි පොලිස් පවුල් සුබසාධක සංගමයේ නවීන උත්සව ශාලාව දැන් ඔබටත් වෙන්කරවා ගත හැකියි. වායුසමනය කළ (A/C) ශාලාවක් වන මෙම උත්සව ශාලාව පළමු පැය 03 සඳහා: රු. 30,000/- ක මුදලකට ලබාගත හැකි අතර අමතර සෑම පැයක් සඳහාම: රු. 5,000/- ක මුදලක් පමණි. ඔබේ පවුලේ උත්සව, ප්‍රියසම්භාෂණ, නිල රැස්වීම් මෙන්ම ගෘහස්ථ ක්‍රීඩා (Indoor Games) සඳහාම ඉතාමත් සුදුසු ස්ථානයක් ලෙස මෙම ශාලාව හැදින්විය හැකි අතර පොලිස් නිලධාරීන්ට මෙන්ම මේ වන විට ඉල්ලීම පරිදි සිවිල් පුරවැසියන්ටද වෙන්කරවාගැනීමේ අවස්ථාව ලබාදී ඇත. අමතර පහසුකම් ලෙස ඔබේ අවශ්‍යතාවය පරිදි සකස් කරගත හැකි මේස සහ පුටු හිමි වේ. ඉඩකඩ ඇති, ආරක්ෂිත වාහන නැවැත්වීමේ පහසුකම් (Parking), ඔබේ අවශ්‍යතාවය පරිදි ආහාර පාන ඔබ කැමති තැනකින් සපයා ගැනීමේ  හැකියාවද සහිතයි. ඔබේ උත්සවය ඉහළම ප්‍රමිතියෙන් සහ සුරක්ෂිතව පවත්වා ගැනීම සඳහා දිනයක් වෙන් කරවා ගන්න. අමතන්න – 0112 588 877ලිපිනය -අංක 07 ජෝශප් ප්‍රේෂර් පාර,කොළඹ 05

ජගත් පරිසර දිනයට සමගාමීව ප්‍රකාශයට පත් කර ඇති ජාතික පරිසර සතිය නිමිත්තෙන්, දිවයින පුරා පුළුල් රුක් රෝපණ වැඩසටහන් මාලාවක් සංවිධානය කර ක්‍රියාත්මක කිරීමට කටයුතු යොදා ඇත. මෙම වැඩසටහන සඳහා අවශ්‍ය කෙරෙන පැළ විසිදෙදහසක් (22,000) වන සංරක්ෂණ දෙපාර්තමේන්තුවේ අනුග්‍රාහක දායකත්වය යටතේ ලබා දී ඇති අතර, පොලිස් පරිසර ආරක්ෂණ කොට්ඨාශයේ සම්බන්ධීකරණයෙන් දිවයිනේ සියලුම පොලිස් කොට්ඨාස වෙත එම පැළ ලබා ගැනීමට අවශ්‍ය කටයුතු මේ වන විටත් සූදානම් කර තිබේ. මෙම රුක් රෝපණ වැඩසටහනට සමගාමීව, පරිසර ආරක්ෂණ කොට්ඨාශයේ සංවිධානයෙන් අද දින (2026.06.05) උදෑසන වැල්ලවත්ත පොලිස් වසමේ, වැල්ලවත්ත දුම්රිය ස්ථානය ආසන්න වෙරළ තීරයේදී විශේෂ රුක් රෝපණ වැඩසටහනක් පවත්වන ලදී. පරිසර ආරක්ෂණ හා ප්‍රජා පොලිස් දිශාව භාර නියෝජ්‍ය පොලිස්පති රොෂාන් රාජපක්ෂ මහතාගේ ප්‍රධානත්වයෙන් සහ වන සංරක්ෂණ දෙපාර්තමේන්තුවේ නිලධාරීන්ගේ සහභාගිත්වයෙන් මෙම සමාරම්භක උත්සවය පැවැත්විණි. මෙහිදී සංකේතාත්මකව පොල් පැළ රෝපණය කිරීම සිදු කෙරුණු අතර, ඉදිරියේදී මෙම ව්‍යාපෘතිය යටතේ දිවයින පුරා පිහිටි සියලුම පොලිස් ස්ථාන වෙත විවිධ වර්ගයේ පැළ යොමු කිරීමට නියමිතව ඇත. මෙම අවස්ථාව සඳහා පරිසර කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී මනෝජ් පෙරේරා මහතා, පොලිස් පරිසර කොට්ඨාසයේ ස්ථානාධිපති ප්‍රධාන පොලිස් පරීක්ෂක නිශ්ශංක මහතා ඇතුළු පොලිස් නිලධාරීන් පිරිසක් සහභාගි වූහ.

Clean Sri Lanka ජාතික වැඩසටහනට සමගාමීව ශ්‍රී ලංකා පොලිසියේ රථවාහන හා මාර්ග ආරක්ෂාව දිසාව විසින් සංවිධානය කරනු ලබන “Take care – සුරැකෙමු මඟතොට” දැනුවත් කිරීමේ වැඩසටහන් මාලාවේ තවත් ප්‍රධාන වැඩමුළුවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් 2026.05.26 වන දින උදෑසන කොළඹ දේවි බාලිකා විද්‍යාලයේදී පැවැත්වුනි. ජනාධිපති ලේකම්වරයා සහ පොලිස්පති නීතිඥ ප්‍රියන්ත වීරසූරිය මහතාගේ හා රථවාහන පාලන හා මාර්ග ආරක්ෂාව දිසාව භාර නියෝජ්‍ය පොලිස්පති ඩබ්ලිව්. පී.ජේ. සේනාධීර මහතා විසින් මෙහිදී දේවි බාලිකා විද්‍යාලයේ දරු දැරියන් හා ගුරුභවතුන් Clean Sri Lanka ජාතික වැඩසටහනේ අරමුණ පිළිබඳව හා මාර්ග ආරක්ෂාවේ වැදගත්කම පිළිබඳව පූර්ණ වශයෙන් දැනුවත් කරන ලදී. ස්ථානාධිපති ප්‍රධාන පොලිස්පරීක්ෂක රාජපක්ෂ මහතාගේ මෙහෙයවීම යටතේ රථවාහන මූලස්ථානයේ අධ්‍යාපන අංශයේ ස්ථානාධිපති පොලිස් පරීක්ෂක රවීන් සුමනරත්න මහතා සහ දමිළ භාෂාවෙන් සංඛ්‍යාලේකන අංශයේ ස්ථානාධිපති පොලිස් පරීක්ෂක රවීන් සුමනරත්න මහතා දැනුවත් කිරීමේ දේශන පැවැත්වූ අතර  රථවාහන මූලස්ථානයේ අධ්‍යාපන අංශයේ හා රිය පාසලේ ස්ථානාධිපිත උප පොලිස් පරීක්ෂක දයාල් කාරියවසම් මහතා විසින් සුපුරුදු පරිදි දර්ශනීය මාර්ග ආරක්ෂණ විධි සන්දර්ශනය පවත්වා  මාර්ගයේදී ආරක්ෂාව සහිතව ගමන් ගන්නා ආකාරය ප්‍රායෝගික ක්‍රියාකාරකම් ඇසුරින් පැහැදිලිකරමින් වැඩමුළුව සාරථකව නිමාකරන ලදී.

160 වන ජාතික පොලිස් දිනයට සමගාමීව කටාන ජාතික පොලිස් අභ්‍යාස ආයතනය විසින් සංවිධානය කිරීමට නියමිත පළමු අන්තර්ජාතික පර්යේෂණ සමුළුව (NPAIRC-2026) 2026.08.31 වන දින ජාතික පොලිස් අභ්‍යාස ආයතන පරිශ්‍රයේදී සහ 2026.09.01 වන දින කොළඹ හෝටල් පරිශ්‍රයක් තුළ පැවැත්වීමට සියළු කටයුතු සංවිධානය කරමින් පවතී. දෙස් විදෙස් රාජ්‍ය හා පුද්ගලික විශ්වවිද්‍යාල වෙත, අධ්‍යාපන ආයතන වෙත, රාජ්‍ය හා රාජ්‍ය නොවන සංවිධාන මෙන්ම දෙස් විදෙස් පොලිස් නිලධාරීන් වෙත මෙම සමුළුවට සහභාගී වී නූතන ලෝකයේ සිදුවන අපරාධ පර්යේෂනාත්මක ඇසින් විග්‍රහ කරමින් විසඳුම් ඉදිරිපත්කිරීමට මේ වනවිටත් ඇරයුම් කර ඇත.   ඒ් අනුව මෙම සමුළුව සඳහා ඉදිරිපත්වීමට පැමිණෙන පිරිස ඉහල නැංවීම සඳහාත්, පුළුල් මාධ්‍ය ප්‍රචාරයක් මගින් මෙම ක්ෂේත්‍රයට නැඹුරු පිරිස් වෙත අවබෝදයක් ලබාදීම සඳහාත්, කටාන ජාතික පොලිස් අභ්‍යාස ආයතනය පොලිස් මාධ්‍ය කොට්ඨාසය  ඒ්කාබද්ධව ක්‍රියාත්මක වීමට නියමිතය. මේ සඳහා අවශ්‍ය වැඩපිළිවෙල සඳහා 2026.05.11 වන අද දින උදෑසන පොලිස් මාධ්‍ය කොට්ඨාසයේදී කටාන ජාතික පොලිස් අභ්‍යාස ආයතනයේ විධායක අධ්‍යක්ෂ නියෝජ්‍ය පොලිස්පති මංජුල මහගිරිල්ල මහතාගේ ප්‍රධානත්වයෙන්, එම අභ්‍යාස ආයතනයේ පරිපාලන අධ්‍යක්ෂ ජ්‍යෙෂ්ඨ පොලිස් අධිකාරී උපාලි අතපත්තු මහතා‌ගේ, පොලිස් මාධ්‍ය ප්‍රකාශක සහකාර පොලිස් අධිකාරී නීතිවේදී ෆෙඩ්රික් වුට්ලර් මහතාගේ, කැළණිය විශ්වවිද්‍යාලයේ ජ්‍යෙෂ්ඨ මහචාර්ය අනුරුද්ධි එදිරිසිංහ, මහාචාර්ය අනූෂා එදිරිසිංහ යන මහත්මීන්ගේ සහ පොලිස් මාධ්‍ය කොට්ඨාසයේ වෙබ් හා සමාජ මාධ්‍ය අංශයේ නිලධාරීන්ගේ සහභාගීත්වයෙන් සාකච්ඡාවක් පැවැත්වූ අතර සාකච්ඡා වූ පරිදි නුදුරු කාල සීමාව තුළ ශ්‍රී ලංකා පොලිස් නිල සමාජ මාධ්‍ය ඔස්සේ මෙම සමුළුව පිළිබඳව නිරන්තරයෙන් ඔබව දැනුවත් කරන්නෙමු.   (වැඩිදුර විස්තර සඳහා පොලිස් අභ්‍යාස ආයතනයේ නිල වෙබ් අඩවිය –  https://npa.gov.lk/?page_id=3552)

මිනිස් ක්‍රියාකාරකම් හේතුවෙන් අපවිත්‍ර වූ මෙරට වෙරළ තීරයන්  පිරිසිදුකරමින් වෙරළ ආශ්‍රිත වැදගත් පරිසර පද්ධතිය රැකගැනීම සඳහා පොලිස් පරිසර ආරක්ෂණ කොට්ඨාසය නිරන්තරයෙන් විවිධාකාරයේ වැඩසටහන් සංවිධානය කරයි. ඒ් අනුව මට්ටක්කුලිය ප්‍රදේශයේ ප්‍රදේශවාසීන් හා පරිසර ආරක්ෂක කොට්ඨාසයේ පොලිස් නිලධාරීන් සහභාගීකරගනිමින් නිරන්තරයෙන් අපවිත්‍රවන මට්ටක්කුලිය කාක දූපත වෙරළ තීරය පිරිසිදු කරීමේ වැඩසටහනක් 2026.05.09 වන දින උදෑසන ක්‍රියාවට නැංවුනි. බස්නාහිර පළාත් ආණ්ඩුකාර හනීෆ් යූසුෆ්, ජනාධිපති අතිරේක ලේකම් එස්.ජි.සී සුගීෂ්වර, ප්‍රජා පොලිස් සහ පරිසර ආරක්ෂණ දිසාව භාර නියෝජ්‍ය පොලිස්පති ආර්.ඒ්.ආර්.එන් රාජපක්ෂ, යන මහත්වරුන්ගේ ප්‍රධානත්වයෙන් සංවිධානය වූ මෙම වැඩසටහන සඳහා වෙරළ තීරය සුරැකීමේ කාර්යභාරයේ මෙරට පදනම් කරගනිමින් ක්‍රියාත්මක වන ලාභ නොලබන සංවිධානයක් වන Clean Ocean Force සංවිධානය ඇතුළු පුද්ගලික වෙළඳ ආයතන රැසක අනුග්‍රහය යට‌තේ ද්‍රව්‍ය උපකරණ හිමිවිය.  පරිසර ආරක්ෂණ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ඩි.කේ මනෝජ් පෙරේරා, කොළඹ උතුර කොට්ඨාසය භාර ජ්‍යෙෂ්ඨ පොලිස් අධිකාරී එරික් පෙරේරා මහතා ඇතුළු ජාත්‍යන්තර පොලිස් සංගමයේ Green IPA ව්‍යාපෘතියේ සහයද සමඟ එම සංවිධානයේ ශ්‍රී ලංකා ශාඛාවේ මහ ලේකම් කාන්තා ප්‍රධාන පොලිස් පරික්‍ෂක සුනේත්‍රා සෙනවිරත්න ඇතුලු ජ්‍යෙෂ්ඨ නිලධාරී මහත්ම මහත්මීන් පිරිසක් මෙම අවස්ථාවට සහභාගී විය.

ශ්‍රී ලංකා පොලිසිය විසින් පවත්වාගෙන යනු ලබන පොලිස් සෞඛ්‍ය සහ සුඛ විහරණ යෝජනා ක්‍රමය යනු පොලිස් නිලධරයන්ගේ යහපැවැත්ම හා සුබසාධනය වෙනුවෙන් මූල්‍ය පහසුකම් සලසන අරමුදලයි.  මෙමගින් පොලිස් නිලධාරීන්ට යහපත් සෞඛ්‍ය තත්වයක් පවත්වාගෙන යාම සඳහා මෙන්ම විවිධ රෝගාබාධ හා ශල්‍යකර්මවලදී, අවමංගල්‍ය කටයුත්තකදී අවශ්‍ය මූල්‍ය සහන සලසයි. පෙර පැවති පොලිස් වෛද්‍ය සේවා අරමුදල සහ පොලිස් සුඛ විහරණ අරමුදල ඒකාබද්ධ කරමින් ආරම්භ කරන ලද 2757/2023 පොලිස් සෞඛ්‍ය සුබ සාධක යෝජනා ක්‍රමයෙහි දිමනා සහ ප්‍රතිලාභ වැඩි කිරිමට පොලිස්පති නීතිඥ ප්‍රියන්ත වීරසූරිය මහතාගේ උපදෙස් පරිදි මෙම නව යෝජනා ක්‍රමය හදුන්වා දී ඇත. මීට අදාළ පොලිස්පති චක්‍රලේඛය 2757/2026 (1) මැයෙන් 2026.03.23 වන දින සියළු පොලිස් කොට්ඨාස වෙත නිකුත්කෙරුණි. සාමාජිකත්වය දරන සියළු පොලිස් නිලධාරීන්ගේ මාසික වැටුපෙන් රුපියල් 150 ක් වැනි සුළු මුදලක් මෙම අරමුදලට බැර වන අතර පොලිස් ත්‍යාග අරමුදලින් මාසිකව රුපියල් මිලියන දහයකට අධික මුදලක් පොලිස්පතිතුමාගේ අනුමැතිය යටතේ පොලිස් සුඛ විහරණ අරමුදලට බැර කෙරේ. යම් නිලධාරියෙකු සේවා කාලය තුලදී උග්‍ර රෝගී තත්වයක්ට පත්වී ජීවිත හානි විය හැකි හෘදය, මොළය,පිළිකා, වකුගඩු, ඇට මිදුළු ශල්‍යකර්ම, අක්මාවේ ශල්‍යකර්මයකට ලක් වුවොත් එම ශල්‍යකර්මය වෙනුවෙන් සහ රෝගී තත්වය වෙනුවෙන් භාවිතාකිරීමට සිදුවන ඖෂධ හා එන්නත් සඳහා වියදම සේවා කාලය තුළදී උපරිමය රු. 2,000,000 ක (ලක්ෂ 20) මුදලක් දක්වා ගෙවීම මෙමගින් නිලධාරියෙකුට ලබාගත හැකි ඉහළම ප්‍රතිලාභයයි. එවැනි රෝගී තත්වයකට නිලධාරියෙකු ජාතික රක්ෂණ භාර අරමුදලේ රන් යෝජනා ක්‍රමයෙන්/ ජනාධිපති අරමුදලෙන්/ වෙනත් අරමුදකින්/ වෙනත් රක්ෂණ ක්‍රමයකින් ප්‍රතිලාභ ලබාගෙන, එහෙත් ප්‍රතිකාර සඳහා වියදම පියවාගත නොහැකිනම් ආවරණය නොවූ මූල්‍ය ශේෂය රු. 2,000,000 ක (ලක්ෂ 20) මුදලට යටත්ව පොලිස් සෞඛ්‍ය සහ සුඛ විහරණ යෝජනා ක්‍රමය මගින් ලබාගෙන ගෙවීමට හැකිවීම මෙහි විශේෂත්වයකි. එ‍ම ශල්‍යකර්මය සඳහා නැවත මුදල් ගෙවීමට සිදුවුවත් මෙම ක්‍රමවේදය යටතේ උපරිමය රුපියල් ලක්ෂ 20 ක මුදලක් දක්වා පොලිස් සෞඛ්‍ය සහ සුඛ විහරණ යෝජනා ක්‍රමය මගින් මුදල් ලබාගැනීමේ හැකියාව පවතී.  එමෙන්ම පෙනහලු, ගර්භාෂය, RF Ablation ශල්‍යකර්ම, ප්‍රාථමික පෙහලු ධමනි, අගන්‍යාශයික ප්‍රදාහය, Fulminant Hepatitis (FH), Multiple Sclerosis(MS) රෝග සඳහා සිදුකරන ශල්‍යකර්ම, කොඳුඇටපෙළ ශල්‍යකර්ම, අවයව බද්ධ කිරීම යන ශල්‍යකර්ම නිලධරයෙකුට හදිසියේ සිදුකිරීමට සිදුවුවොත් එම එක් එක් අවස්ථාවන් සඳහා රුපියල් 500,000 (ලක්ෂ 5 ) උපරිමය යටතේ ගෙවීම සිදුකරයි.  ජාතික රක්ෂණ භාර අරමුදලේ රන් යෝජනා ක්‍රමයෙන්/ ජනාධිපති අරමුදලෙන්/ වෙනත් අරමුදලකින්/ වෙනත් රක්ෂණ ක්‍රමයකින් ප්‍රතිලාභ ලබාගෙන, එහෙත් ප්‍රතිකාර සඳහා වියදම පියවාගත නොහැකිනම් මෙම ලක්ෂ 5 ක උපරිම මුදල ලබාගෙන හිඟ මුදල ප්‍රතිපූර්ණය කරගැනීමේ අවස්ථාව සලසා තිබේ. එ‍ම ශල්‍යකර්මය සඳහා නැවත මුදල් ගෙවීමට සිදුවුවද මෙම ක්‍රමවේදය යටතේ උපරිමය රුපියල් 500,000 (ලක්ෂ 5 ) මුදලක් දක්වා පොලිස් සෞඛ්‍ය සහ සුඛ විහරණ යෝජනා ක්‍රමය මගින් මුදල් ලබාගැනීමේ හැකියාව පවතී.  මීට අමතරව *සියලුම අංශභාග රෝගී තත්වයන් සඳහා රු.100,000 (ලක්ෂයක්) ගෙවීම  *පොලිස් රෝහලේ සිදුකරදීමට පහසුකම් නොමැති, රජයේ රෝහලක පොරොත්තු ලේඛනයේ දීර්ඝ කාලයක් රැදී සිටීමට සිදුවන අත්‍යවශ්‍ය ශල්‍යකර්ම වන දණහිස්, ශ්‍රෝණි මේඛලා, අත හෝ පාදයේ අස්ථි බද්ධ කිරීමේ ශල්‍යකර්ම සඳහා රුපියල් 250,000/= (දෙලක්ෂ පනස්දහසක්) දෙවතාවක් පමණක් ගෙවීම. *සක්‍රිය සේවයේ නිරත පොලිස් නිලධාරියෙකු හට ශ්‍රවණාබාධයක් ඇතිවුවොත් වෛද්‍ය නිර්දේශය පරිදි කෘතිම අවයව වෙනුවෙන් ‌ නිලධාරියා දැරූ පිරිවැය රුපියල් 50,000/= ක උපරිමයකට යටත්ව ප්‍රතිපූර්ණය කිරීම. *රජයේ රෝහලක හෝ පොලිස් රෝහලේ නේවාසිකව ප්‍රතිකාරලබමින් සිටින නිලධරයෙකුට MRI /   Angiogram/ CT Scan / PET Scan / Eco පරීක්ෂණ පිරිවැය නිලධාරියාගේ ස්වකීය මුදලින් පුද්ගලික පරීක්ෂණාගාර මගින් සිදුකරගැනීමට සිදුවුවහොත් රුපියල් 20,000/= ක උපරිමයකට යටත්ව අවස්ථා 03කදී පමණක් ප්‍රතිපූර්ණය කිරීම.  *සක්‍රිය සේවයේ නිලධාරියෙකු වකුගඩු රෝගී තත්වයකදී රජයේ අනුමත පුද්ගලික රෝහලකින් රුධිර කාන්දුකරණයන් (Dialysis) සඳහා වියදම් කිරීමට සිදුවුවහොත් තුන්වරකදී පමණක් රුපියල් 2,000,000 ක උපරිමයකට යටත්ව වියදම ප්‍රතිපූර්ණය කිරීම. *ඉහත සඳහන් සැත්කම් නොවන සැත්කමට ලක් වී රෝගියාට රජයේ රෝහලකින් ඖෂධ සැපයීම සිදු නොකරන්නේ නම් වෛද්‍යවරයාගේ උපදෙස් පරිදි වසර 3 ක කාලයක් මාසිකව රුපියල් 25,000 ක උපරිමයට යටත්ව පොලිස් රෝහල මගින් ඖෂධ මිලීදී ගෙන ලබාදෙනු ඇත. *වයස අවුරුදු 40 ට වැඩි සාමාජික නිලධරයන්ගේ ඇස්වල පෙනීම දුර්වල වූ විට ඇස් කණ්ණාඩි මිලදී ගැනීම සදහා වැය වූ මුදල ප්‍රතිපූර්ණය සඳහා රුපියල් 15000/= ක උපරිමයකට යටත්ව මුදල් ගෙවීම. වැනි ප්‍රතිලාභ රැසක හිමිකරුවන් වීමට පොලිස් සෞඛ්‍ය හා සුඛ විහරණ යෝජනා ක්‍රමය යටතේ ප්‍රතිලාභ ලබන පොලිස් නිලධරයන්ට අවස්ථාව උදාකර ඇති අතර පොලිස්පති චක්‍රලේඛය 2757/2026 පරිශීලනය කිරීම මගින් මේ සම්බන්වද පූර්ණ අවබෝදයක් ලබාගත හැකි බව දන්වා සිටින්නෙමු.

ගෝලීයව උද්ගතවී ඇති අර්බුධකාරී තත්ත්වය හමුවේ මෙරට ආරක්ෂාව හා සාමය පවත්වාගෙන යාමට බාධා විය හැකි සිදුවීම් වැළැක්වීම සඳහා පොලිස්පතිතුමා විසින් සියළු පොලිස් ස්ථාන දැනුවත් කරමින් උපදෙස් මාලාවක් නිකුත් කර ඇත. ඒ අනුව තානාපති කාර්යාල, මහ කොමසාරිස් කාර්යාල, එම නිල නිවාස හා එම ආයතනවලට සම්බන්ධ අනෙකුත් ස්ථානවල ආරක්ෂාව තහවුරු කිරීම සඳහා සකස් කළ විශේෂ වැඩපිළිවෙල ක්‍රියාත්මක කිරීමින් නැවත දැනුම් දෙනතුරු ආරක්ෂක වැඩපිළිවෙලට අනුව ක්‍රියාත්මක වන ලෙසත් පොලිස් ස්ථාන දැනුවත් කර ඇත. මෙරට සංචාරයේ නියුතු හා රැඳී සිටින විදෙස් ජාතිකයන්ගේ / ඔවුන්ගේ දේපළ සහ රැඳී සිටින වාසස්ථානයන්හි ආරක්ෂාව ව්‍යාපාරික ස්ථාන, සංචාරක ස්ථාන / ගමනාන්ත හා නේවාසික ගොඩනැගිලි, ආගමික මධ්‍යස්ථානයන්හි රැඳී සිටින පුද්ගලයන් / දේපළ වල ආරක්ෂාවද තහවුරු කිරීම සඳහා පැය 24 ම ආවරණය වන පරිදි ආරක්ෂක වැඩපිළිවෙලක් සකස් කර ක්‍රියාත්මක කරන ලෙසට පොලිස්පතිතුමා වැඩිදුරටත් උපදෙස් ලබා දී ඇත. මෙම ආරක්ෂක සැලසුම් ක්‍රියාත්මක කිරීමේදී ත්‍රිවිධ හමුදා සහාය අවශ්‍ය නම් ඒ සඳහාද පියවර ගැනීම සඳහා උපදෙස් ලබා දී ඇත.