Notable Services – SI

ශ්‍රී ලංකා ටෙනිස් සංගමයට අනුබද්ධව ශ්‍රී ලංකා පොලිස් ටෙනිස් සංගමය වාර්ෂිකව පවත්වන 2025 – Sri Lanka Police Ranking Tournament  තරඟාවලිය 2025.12.19,20,21 යන තෙදින කොළඹ පොලිස් ටෙනිස් ක්‍රීඩා පිටියේදී පැවැත්වුනි. දිවයිනේ සියලු පළාත් නියෝජනය කරමින් වයස අවුරුදු 12-16 ත් අතර ළමුන්ට ඒ් සඳහා සහභාගීවීමේ අවස්ථාව සලසා තිබූ අතර පිරිමි හා කාන්තා වශයෙන් තරඟ ඉසව් පැවැත්වුනි. 07 වන වරට පැවැත්වුනු මෙවර තරඟාවලියේ දක්ෂතාවයන් අනුව  වයස අවුරුදු 12 න් පහළ ශූරයා වූයේ මතීෂ ෆ්රනෑන්ඩෝ ක්‍රීඩකයායි. සේතිය සිල්වා අනුශූරතාවයට හිමිකම් කියන ලදී. වයස අවුරුදු 12 පහළ ගැහැණු ශූරතාවය සෙනුලි තිමන්සා වික්‍රමරත්න දිනාගත් අතර එම වයස් කණ්ඩායේ අනුශූරිය නදුලි කුරකුලසූරියයි. වයස අවුරුදු 16 න් පහළ පිරිමි ශූරතාවය යොනාල් දන්කුඹුර ක්‍රීඩකයා සතු විය. අනුශූරතාවය අකේන් මනෝහරන් ක්‍රීඩකයා හිමිකරගත්තේය. වයස අවුරුදු 16 න් පහළ ගැහැණු ශූරතාවය යොනෙලි සේනාධීර ක්‍රීඩිකාව දිනාගන්නා ලදී.

අධ්‍යාපනය ලැබීම සඳහා උපකාර අවශ්‍ය ත්‍රීකුණාමලය පොලිස් කොට්ඨාසයේ දරු දැරියන් හඳුනාගෙන, අධ්‍යාපන කටයුතු සාර්ථක කරගැනීම වෙනුවෙන් පොත්පත් බෙදාදීම සඳහා පොලිස් සේවා වනිතා ඒ්කකය සංවිධානය කළ  වැඩසටහනක් 2025.12.24 වන දින ත්‍රීකුණාමලය කොට්ඨාස භාර නිලධාරී කාර්යාල පරිශ්‍රයේදී පැවැත්වුනි. පොලිස් සේවා වනිතා ඒ්කකයේ ගරු සභාපතිනී නිල්මිණි නිටා සමරතුංග මැතිනිය විසින් ප්‍රධානත්වය ගෙන සංවිධානය කරනුලබන ප්‍රජා සත්කාර වැඩසටහන් මාලාවේ තවත් එක්  අදියරක් ලෙස පැවැත්වුනු එම අවස්ථාවේදී පොත් කට්ටල 1000ක් දරු දැරියන් අතර බෙදාදීම සිදුවිය. මෙම ප්‍රධානයන් සඳහා පූර්ණ අනුග්‍රහය වාද්දුව සමුද්‍රාරාම විහාරස්ථනයේ විහාරස්ථානාධිපති පුජ්‍ය ගම්මන විජය ධම්ම හිමියන් ප්‍රමුඛ තරුණ කැළ විසින් ලබාදී ඇති අතර උන්වහන්සේගේද සහභාගීත්වයෙන්, නැගෙනහිර පළාත ජ්‍යෙෂ්ඨ නියෝජ්‍ය පොලිස්පති වරුණ ජයසුන්දර, නියෝජ්‍ය පොලිස්පති මහින්ද දිසානායක, ත්‍රිකුණාමලය කොට්ඨාසභාර නිලධාරි චන්ද්‍රපාල යන ජ්‍යෙෂ්ඨ නිලධාරීන් ඇතුලු ලමා හා කාන්තා කාර්යංශයේ ස්ථානාධිපති කාන්තා ප්‍රධාන පොලිස් පරිකෂක  නිමාලි ෆොන්සේකා, සේවා වනිතා ස්ථානාධිපති පද්මිනි ජයවිර යන මහත්මීන්ගේ සහභාගීත්වයෙන් වැඩසටහන සාර්ථකව පවත්වා ඇත.

ඩිජිටල් ආර්ථික අමාත්‍යංශය, ICTA ආයතනය සහ Lanka pay ආයතනය එක්ව එළිදැක්වූ Gov pay මාර්ගගත ගෙවීමේ ක්‍රමය ඔස්සේ රථ වාහන දඩ මුදල් ගෙවීමේ පහසුකම නැගෙනහිර පළාතට ලබාදෙමින් සමාරම්භක වැඩසටහන 2025.12.23 වන දින අම්පාර මූලස්ථාන පොලිසියේ ප්‍රධාන ශ්‍රවනාගාරයේදී පැවැත්වුනි. Gov Pay භාවිතාකිරීම සඳහා අවශ්‍ය උපදෙස්,දැනුම සහ පුහුණුව වැඩසටහනට‌ ප්‍රධානත්වය ගෙන එක්වූ රථවාහන හා මාර්ග ආරක්ෂාව භාර නියෝජ්‍ය පොලිස්පති ඩබ්ලිව්.පී.ජේ. සේනාධීර මහතා මෙන්ම ICTA ආයතනය නියෝජනය කරමින් එක්වූ ව්‍යාපෘති කළමණාකාර උදාරි විතානගේ මහත්මිය, තාක්ෂණික අංශයේ ඉනුක මායාකඩුව මහතා සහ ලංකා ගෙවීම් (Lanka Pay) ආයතනය නියෝජනය කරමින් එක්වූ සහකාර කළමණාකාර මිගාර සිල්වා මහතා විසින් අම්පාර කොට්ඨාසයේ පොලිස් නිලධාරීන්ට ලබාදෙන ලදී. වැඩසටහන අතරතුර මාර්ගගත (Online) දඩ ගෙවීමේ ක්‍රමය භාවිතා කිරීම සඳහා සංකේතාත්මකව නවීන ජංගම දුරකථන කිහිපයක් නිලධාරීන් වෙත ලබාදීමද සිදුකෙරුණි. අම්පාර කොට්ඨාස භාර ජ්‍යෙෂ්ඨ පොලිස් අධිකාරි පී.බී.කස්තුරිආරච්චි මහතා,අම්පාර දිස්ත්‍රීක් I සහකාර පොලිස් අධිකාරි එච්.බී.ජී.සම්පත් කුමාර වික්‍රමආරච්ච මහතා සහ කොට්ඨාසයේ පොලිස් ස්ථානාධිපතිවරුන්, තොරතුරු තාක්ෂණ කොට්ඨාසයේ ස්ථානාධිපති ප්‍ර.පො.ප.ලක්මාල් මහතා ඇතුලුව රථ වාහන අංශවල නිලධාරින් මෙම අවස්ථාව සඳහා සහභාගී විය. මේ අනුව ඉදිරි කාලය තුල ඔබට අම්පාර දිස්ත්‍රික්කය තුල Gov pay මගින් රථ වාහන දඩ මුදල් ගෙවීම සිදුකළ හැකි වනු අතර දඩ පත්‍රිකාව ලබාදෙන පොලිස් නිලධාරියාගෙන් ඒ් සඳහා උපදෙස් ඉල්ලා සිටි හැකිය. දඩ මුදල Online (මාර්ගගතව) ගෙවූ පසු එම අවස්ථාවේදීම ඔබේ රියදුරු බලපත්‍රය ලබාගත හැකිය. අවශ්‍යනම් පසුව අවස්ථාවක ගෙවීම සඳහා https://govpay.lk/si/spot-fine උපදෙස් පරිශීලනය කරමින් කටයුතු කළ හැකි බව දැනුම්දෙන්නෙමු.

2025 නත්තල් උත්සවයට සමගාමීව කොළඹ නගරය ආශ්‍රිතව පවත්වන සැමරුම් උත්සව, සැරසිලි අසිරිය නැරඹීම සඳහා 2025.12.24 දින විශාල ජනතාවක් සහ රථවාහන ප්‍රමාණයක් කොළඹ නගරය වෙත, ගාලු මුවදොර ප්‍රදේශය වෙත පැමිණෙනු ඇත.  එම ජනතාවගෙන් කොළඹ නගරයේ කොටුව, පිටකොටුව, කොම්පඤ්ඤවීදිය මරදාන, කොල්ලුපිටිය,බම්බලපිටිය,කුරුඳුවත්ත යන පොලිස් වසම් තුළ එදින අධික රථවාහන තදබදයක් ඇතිවිය හැකි බැවින් අධික තදබදයක් ඇතිවන අවස්ථා වලදි පමණක් අවස්ථානුකූලව පහත පරිදි රථවාහන ගමනාගමනය සිදු කිරීමට සැලසුම් කර ඇත. * ගාලු මැද පාර ඔස්සේ කොළඹින් පිටවීම – එන් එස් ඒ වටරවුම,ගාලු මැද පාර, බාලදක්ෂ මාවත හන්දියෙන් වමට (එම්ඕඩී හන්දිය) බාලදක්ෂ මාවත,අලියානාන වටරවුම, මාකන් මාකර් මාවත, ගාලු මුවදොර වටරවුම ඔස්සේ කොල්ලුපිටිය දෙසට ගමන් කිරීම. * ගාලු මැද පාර,ගාලුමුවදොර වටරවුම සිට කොළඹට ඇතුළු වන රථවාහන බාලදක්ෂ මාවත හන්දිය දක්වා සහ ඉන් ඉදිරියට ගමන් කිරීම. * ගාලු මුවදොර වටරවුමේ සිට මාකන් මාකර් මාවත ඔස්සේ අලියානාන වටරවුම දෙසට හෝ අලියානාන වටරවුම දෙස සිට බාලක්ෂ මාවත ඔස්සේ ගාලු මැද පාරට ගමන් කල නොහැක. * බාලදක්ෂ මාවතේ අතුරු මාර්ග වලින් පැමිණෙන සියලු වාහන දකුණට හරවා අලියානාන වටරවුම ඔස්සේ කොළඹින් පිටවිය හැකි අතර ගාලු මැද පාරට අතුරු මාර්ග වලින් ඇතුළු වන සියලුම වාහන දකුණට හරවා එන්එස්ඒ වටරවුම දෙසට ගමන් කිරීම. ඉහත රථවාහන සැලැස්ම ක්‍රියාත්මක කිරීමේදි කොළඹ නගරයේ පදිකවේදිකා මත සහ ප්‍රධාන මාර්ගයන් අවහිර වන ලෙස කිසිදු රථවාහනයක් නවතා තැබීමට ඉඩ ලබා නොදෙන අතර එවැනි ආකාරයට රථවාහන නීති උල්ලංඝණය කරනු ලබන රියදුරන්ට විරුද්ධව නීතිය ක්‍රියාත්මක කිරීමට කටයුතු කරනු ලැබේ.  කොළඹ නගරයට පැමිණෙන රථවාහන පහත සඳහන් රථගාල් වල ගාල් කර තැබීමේ පහසුකම් සලසා ඇති බවද වැඩිදුරටත් සඳහන් කර ඇත * පහත සඳහන් නිදහස් රථගාල් හා මාර්ග දෙපස මුදල් අයකර ගැනීමකින් තොරව රථවාහන අවහිරතා ඇති නොවන පරිදි ගාල්කිරීම සඳහා අවස්ථාව ලබා දී ඇත. * කොටුව පොලිස් වසමේ බාලක්ෂ මාවත – එම්ඕඩී රථගාල (බේරේවැව දෙසට)  * කොල්ලුපිටිය/බම්බලපිටිය/වැල්ලවත්ත මුහුදුබඩ මාර්ග  * කොටුව හා මරදාන පොලිස් වසම් වල ඩීආර් විජේවර්ධන මාවත * කොම්පඥ්ඤවීදිය පොලිස් වසමේ පාසන්ට් පාර පිටවීමේ තීරුව පමණක්  * ගාලු පාර වැල්ලවත්ත සැවෝයි අසල සිට ගාලු පාර බගතලේ පාර හන්දිය දක්වා රථනැවතුම් ස්ථාන වල (Parking Bays)පමණක්  * කුරුඳුවත්ත පොලිස් වසමේ ආනන්ද කුමාරස්වාමි මාවත නෙළුම් පොකුණ වටරවුමේ සිට පුස්තකාල වටරවුම දෙසට ඇතුළු වීමේ තිරුව (වම්පස) * කුරුඳුවත්ත පොලිස් වසමේ එෆ් ආර් සේනානායක මාවත * කුරුඳුවත්ත පොලිස් වසමේ රීඩ් මාවත රීඩ් රාජකාරී හන්දියේ සිට රීඩ් මාවත රීඩ් තර්ස්ටන් හන්දිය දක්වා මාර්ගයේ දකුණු පස  * කුරුඳු වත්ත පොලිස් වසමේ නිදහස් මාවත නිදහස් වටරවුමේ සිට නිදහස් චතුරස්‍රය දක්වා මාර්ගයේ දකුණු පස  * කුරුඳුවත්ත පොලිස් වසමේ මෙට්ලන්ඩ් පෙදෙස  * කුරුඳුවත්ත පොලිස් වසමේ පදනම් ආයතන පාර  • පහත සඳහන් රථගාල් සහ මුදල් අයකිරීමේ පදනම මත රථගාල් කිරීම සඳහා අවස්ථාව සලසා ඇත. * පිටකොටුව පොලිස් වසමේ බැස්ටියන් මාවත පරණ මැනිං වෙළඳ සංකිර්ණ රථගාල * කොටුව පොලිස් වසමේ විමලධර්ම සූරිය ඔර්ලෝසු කණුව අසල රථගාල * කොටුව පොලිස් වසමේ රාසික් ෆරීඩ් මාවත හේමාස් රථගාල  * ඩීආර් විජේවර්ධන මාවත ලේක් හවුස් රථගාල * කොටුව පොලිස් වසමේ ලේඩ්න් බැස්ටියන් මාවත  * කොටුව පොලිස් වසමේ බ්‍රිස්ටල් වීදීය * කොටුව පොලිස් වසමේ ඩියුක් වීදිය * කොම්පඤ්ඤ්වීදිය පොලිස් වසමේ යුනියන් පෙදෙස ඩෝසන් වීදිය  හන්දිය ඇක්සර් ටවර් රථගාල * මරදාන පොලිස් වසමේ ගාමිණි වටරවුම (St’ Clement)    

119 ක්ෂණික දුරකථන ඇමතුම් සේවාව වෙත වාර්තා වන ඇමතුම් පිළිබඳව විශ්ලේෂනයේදී පොලිසිය ක්ෂණිකව ක්‍රියාත්මක වීමට අවශ්‍ය පැමිණිලි වලට අමතරව අසත්‍ය පැමිණිලි හා වෙනත් සේවාවන් ලබාගැනීම සඳහා යොමු කළ යුතු පැමිණිලි ලැබී ඇති බව නිරීක්ෂණය වේ.  119 සේවාව සඳහා ඇමතුමක් ලබාගැනීමට අත්‍යවශ්‍ය වන අයකුට හදිසි අවස්ථාවක පොලිස් 119 හදිසි ඇමතුම් මධ්‍යස්ථානය හා සම්බන්ධ වීමට තිබෙන හැකියාව එවැනි අසත්‍ය පැමිණිලි ලැබීම අතරතුර අහිමිවන බැවින් අත්‍යවශ්‍ය හදිසි පැමිණිල්ලකට ක්‍රියාත්මක වීමේ හැකියාව නොලැබෙනු ඇත. එවැනි ව්‍යාජ තොරතුරු ලබා දෙන පුද්ගලයන්ට එරෙහිව නෛතික ක්‍රියාමාර්ග ගැනීමට කටයුතු කරන අතර, රජයේ සේවකයෙකු වෙත දැනුවත්ව අසත්‍ය තොරතුරු සැපයීම ලංකා දණ්ඩ නීති සංග්‍රහය යටතේද දඩුවම් ලැබිය හැකි වරදකි.  එබැවින් 119 සහය සෘජුවම අවශ්‍ය නොවන අවස්ථාවක එම සහය ඉල්ලා සිටිය හැකි, අදාළ වෙන වෙනත් ආයතන හා සම්බන්ධ වීමට පහත සඳහන් කෙටි දුරකථන අංක භාවිතා කරන්න.  119 කෙටි දුරකථන අංකය අවභාවිතා නොකරන්න. * Police Emergency   Service – 119 * Ministry Of Child Development and Women’s Affairs (Women Help Line)  – 1938 *  Ministry Of Child Development and Women’s Affairs ( Child Help Line) – 1929 *  Fire and Rescue Service – 110 *  National Transport Commission – 1955 *  Drug Organized  Crime Issues Emergency Notification unit  – 1997 *  The  Bureau  for the Prevention and Investigation of Abuse of Children and women – 109 *  Emergency Call Center ( Tamil Medium )  – 107 * Commission to Investigate Allegations of Bribery or Corruption  – 1954 * Expressway Emergency  – 1969 * Department of Immigration and Emigration – 1962 * National Dangerous Drug Control Board – 1984 * Sri Lanka Bureau Of  foreign Employment  –  1989 * National Help Desk ( Ministry of Defance) – 118 * Disaster Management Call Center  – 117 * Sri Lanka Tourism  – 1912 * Government Information Center – 1919 press conference (Click here)

ශ්‍රී ලංකා පොලිසියේ ඩිජිටල්කරණ ක්‍රියාවලියේ තවත් එක් පියවරක් ලෙස, රථවාහන වැරදි සඳහා වන දඩ මුදල් එම ස්ථානයේදීම ගෙවීමට පහසුකම් සලසන ‘GovPay’ වැඩසටහන ඌව පළාතේ බදුල්ල සහ බණ්ඩාරවෙල පොලිස් කොට්ඨාස සඳහා හඳුන්වා දීම අද (2025 දෙසැම්බර් 18) දින සිදු කෙරිණි. බණ්ඩාරවෙල ‘Kanmark’ හෝටල් පරිශ්‍රයේදී පෙරවරු 10.00 සිට පස්වරු 1.00 දක්වා පැවැත්වුණු මෙම සමාරම්භක උත්සවයේදී, රථවාහන රාජකාරි කටයුතු කාර්යක්ෂම කිරීම වෙනුවෙන් අවශ්‍ය නවීන තාක්ෂණික උපාංග සහ ජංගම දුරකථන කොට්ඨාස මට්ටමින් බෙදා දීම සිදු විය. පිරිනැමූ ස්මාර්ට් දුරකථන ප්‍රමාණය • බණ්ඩාරවෙල කොට්ඨාසය සඳහා ජංගම දුරකථන 82 ක්. • බදුල්ල කොට්ඨාසය සඳහා ජංගම දුරකථන 90 ක්. මෙම අවස්ථාවට මොනරාගල දිශාව භාර නියෝජ්‍ය පොලිස්පති නීතිඥ නිහාල් තල්දුව මහතා, රථවාහන හා මාර්ග ආරක්ෂාව භාර නියෝජ්‍ය පොලිස්පති ඩබ්ලිව්.පී.ජේ. සේනාධීර මහතා, බදුල්ල කොට්ඨාස භාර ජ්‍යෙෂ්ඨ පොලිස් අධිකාරී කේ.ඩබ්ලිව්.ආර්. ජගත් රෝහණ මහතා. බණ්ඩාරවෙල කොට්ඨාස භාර ජ්‍යෙෂ්ඨ පොලිස් අධිකාරී රොෂාන් අමරසිංහ මහතා. ඇතුළු  පොලිස් දෙපාර්තමේන්තුවේ ජ්‍යෙෂ්ඨ නිලධාරීන් මෙන්ම තාක්ෂණික අංශ නියෝජනය කරමින් නිලධාරීන් රැසක් සහභාගී වූහ. මීට අමතරව ICTA ආයතනය වෙනුවෙන් ව්‍යාපෘති කළමණාකාර උදාරි විතානගේ මහත්මිය සහ තාක්ෂණික අංශයේ ඉනුක මායාකඩුව මහතා ද, ලංකා ගෙවීම් (Lanka Pay) ආයතනය වෙනුවෙන් සහකාර කළමණාකාර මිගාර සිල්වා මහතා ද මෙම අවස්ථාවට එක්ව සිටියහ. බදුල්ල සහ බණ්ඩාරවෙල මූලස්ථාන ප්‍රධාන පොලිස් පරීක්ෂකවරුන්, ස්ථානාධිපතිවරුන් සහ සියලුම රථවාහන අංශ ස්ථානාධිපතිවරුන් ද මෙම පුහුණු හා සමාරම්භක වැඩසටහනට සහභාගී වූහ. මෙම ‘GovPay’ පද්ධතිය හරහා රථවාහන වැරදි සිදුකරන රියදුරන්ට තම දඩ මුදල් ගෙවීමේදී පවතින අපහසුතා මගහැරී යන අතර, පොලිස් නිලධාරීන්ට ද වඩාත් විනිවිදභාවයකින් යුතුව හා කඩිනමින් දත්ත පද්ධති සමඟ සම්බන්ධ වෙමින් රාජකාරි කිරීමට මෙයින් අවස්ථාව සැලසේ.

ශ්‍රී ලංකා පොලිසිය පොලිස් වෛද්‍ය සේවා කොට්ඨාසය යටතේ කුණ්ඩසාලය ප්‍රදේශයේ පවත්වාගෙන යන පොලිස් රෝහලට අනුයුක්ත පොලිස් නිලධරයන් හා වෛද්‍ය නිලධාරීන් විසින්,  “දිට්වා” සුලි කුනාටුවෙන් විපතට පත්ව සිටින මහජනතාව වෙනුවෙන් සති දෙකක කාලයක් පුරා වෛද්‍ය කඳවුරු 21 ක් පවත්වන ලදී. එමගින් පොලිස් වසම් 09 ක් ආවරණය වන පරිදි රෝගීන් 2554 ක් පරීක්ෂාකර සුවසෙත සැලසීමට හැකි වී ඇති අතර පළමු වෛද්‍ය කඳවුර ලෙස 2025.12.03 වන දින මහනුවර මූලස්ථාන පොලිසියේදී රෝගීන් 678 දෙනෙකු සඳහා වෛද්‍ය උපදෙස් හා ප්‍රතිකාර ලබාදීමට හැකිවී තිබේ. පසු දින 13 තුලදී මාතලේ,ගම්පොල,උඩුදුම්බර,හසලක,යටියන්තොට,ගලහා,රාගල යන පොලිස් ස්ථාන කේනද්‍ර කරගනිමින් වෛද්‍ය කඳවුරු පවත්වා ඇති අතර 2025.12.16 වන දින අවසන් කඳවුර ලෙස උඩුපුස්සැල්ලෑව පොලිස් ස්ථානයේ වෛද්‍ය කඳවුර පවත්වා මෙහෙවර සාර්ථකව අවසන් කර ඇත.  දකුණු පළාත් ජ්‍යෙෂ්ඨ නියොජ්‍ය පොලිස්පතිතුමා මගින් ඖෂධ සහ රෙදි විශාල ප්‍රමාණයක් පරිත්‍යාග වශයෙන් ලැබීම  මෙම කර්තව්‍යයද අතිශයින්ම සාර්ථක කරගැනීමට ඉවහල් වී ඇත. තවද, කුණ්ඩසාලය පොලිස් රෝහලෙන් රෝහලෙන් ස්ථානමාරුවිම් ලැබ පිටව ගිය වෛද්‍ය ගැමුණු විජේසුන්දර මහතා සියලුම අවතැන් කඳවුරුවලට සහභාගී වෙමින් දැක්වූ සහය කුණ්ඩසාලය පොලිස් රෝහල ගෞරවයෙන් සිහිපත්කරයි. සුළි කුනාටුවෙන් පසු එක් වෛද්‍ය කණ්ඩායමක් විසින් පරික්ෂාවට ලක්කළ වැඩිම රෝගීන් සංඛ්‍යාව මෙය විය හැකි බවට උපකල්පනය කෙරේ. එවැනි සමාජ සත්කාරයක් සාර්ථකව ක්‍රියාවේ යෙදවීම සඳහා නන් අයුරින් සහය දුන් පොලිස් වෛද්‍යසේවා කොට්ඨාශයේ ජ්‍යෙෂ්ඨ නිලධාරීන් ඇතුලු කුණ්ඩසාලේ පොලිස් රෝහලේ වෛද්‍ය නිළධාරී මහත්ම මහත්මීන්ට සහ කාර්ය මණ්ඩලයට මහජනතාවගේ සුභ සිද්ධිය ප්‍රථම රාජකාරිය වන්නාවූ පොලිස් නිලධාරීන් වන අපගේ කෘතඥ පුර්වක ස්තූතිය පුද කරන්නෙමු.

මාධ්‍ය හමුව ( Click here )

පොලිස් සේවා වනිතා ඒකකයයේ ගරු සභාපතිණි නීතිඥ නිල්මිී නීටා සමරතුංග මැතිණියගේ සංකල්පයකට අනුව එම ඒකකය දිවයිනේ දුෂ්කර පාසල් පිළිබඳව තොරතුරු ලබාගෙන සිසු සිසුවියන් හට පරිත්‍යාගයන් ලබාදීමේ වැඩසටහන් මාලාවක් සාර්ථකව පවත්වනු ලබයි. දිවයිනට බලපෑ අයහපත් කළගුණ තත්වයද සැලකිල්ලට ගෙන සංවිධානය කළ එහි තවත් එක්  වැඩසටහනක් නීතිඥ නිල්මිණි නීටා සමරතුංග මැතිණියගේ ප්‍රධානත්වයෙන් 2025.12.15 වන දින රිදීමාලියද්ද, අරාව හා කන්දකැටිය යන පොලිස් වසමේදී පවත්වා ඇත. එහිදී සුරක්ෂිත මධ්‍යස්ථාන කිහිපයක රැදී සිටින පාසැල් දරුවන් 555 දෙනෙකු උදෙසා වියළි ආහාර ,පානීය ජලය, අත්‍යවශ්‍ය භාණ්ඩ, හා පාසැල් දරුවන් සදහා පාසැල් පොත් හා උපකරණ තොගයක් පරිත්‍යාග කිරීමට කටයුතු කර ඇති අතර ශ්‍රේෂ්ඨාධිකරණ විනිසුරු, ජනාධිපති නීතිඥ යසන්ත කෝදාගොඩ මහතා ප්‍රමුඛ ”මහාචාර්ය නන්දදාස කෝදාගොඩ අනුස්මරණ භාරය” මෙම සමාජ මෙහෙවර වඩාත් සාර්ථකව ඉටුකිරීම සඳහා අනුග්‍රහය දක්වා ඇත.  බදුල්ල දිසාව භාර නියෝජ්‍ය පොලිස්පති ලක්සිරි විජේසේන, බදුල්ල කොට්ඨාස භාර ජ්‍යෙෂ්ඨ පොලිස් අධිකාරී ජගත් රෝහණ, පොලිස් සේවා වනිතා ඒකකයේ ස්ථානාධිපති කාන්තා ප්‍රධාන පොලිස් පරීක්ෂක පද්මිණි ජයවීර, කන්දකැටිය පොලිස් ස්ථානාධිපති පොලිස් පරීක්ෂක දීපාල් ජයතුංග,අරාව පොලිස් ස්ථානාධිපති පොලිස් පරීක්ෂක සමන්කුමාර යන මහත්ම මහත්මීන් ඇතුලුව පොලිස් සේවා වනිතා ඒකකයේ සහ කන්දකැටිය හා අරාව යන පොලිස් ස්ථානයන්හි නිලධාරීන්ගේ සහයෝගය හා සහභාගීත්වය වැඩසටහන සඳහා හිමිව ඇත.