Notable Services – SI

රාජ්‍ය සේවාවන්හි කාර්යක්ෂමතාවය වර්ධනය කිරීමේ අරමුණින් ඩිජිටල් ආර්ථික අමාත්‍යංශය, ශ්‍රී ලංකා තොරතුරු හා සන්නිවේදන තාක්ෂණ ආයතනය (ICTA) සහ LankaPay ආයතනය එක්ව හඳුන්වා දුන් “GovPay” ඩිජිටල් ගෙවීම් ක්‍රමය ඔස්සේ රථවාහන දඩ ගෙවීමේ පහසුකම උතුරු පළාත තුල නිල වශයෙන් ක්‍රියාත්මක කිරීමේ සමාරම්භක අස්ථාව මහජන ආරක්ෂාව හා පාර්ලිමේන්තු කටයුතු අමාත්‍ය ආනන්ද විජේපාල මහතාගේ ප්‍රධානත්වයෙන් 2025.10.28 වන දින කිලිනොච්චිය දිස්ත්‍රික් ලේකම් කාර්යාලයේදී පැවැත්වුනි. මෙම අවස්ථාව සඳහා උතුරු පළාත භාර ජ්‍යෙෂ්ඨ නියෝජ්‍ය පොලිස්පති  තිලක් සී.ඒ් ධනපාල මහතා, වවුනියාව දිසාව නියෝජ්‍ය පොලිස්පති ඉන්දික හපුගොඩ මහතා , කිලිනොච්චි සහ මුලතිව් නියෝජ්‍ය පොලිස්පති ජේ. ඒ. චන්ද්‍රසේන මහතා, යාපනය සහ කංකසන්තුරය නියෝජ්‍ය පොලිස්පති ජී. එච්. මාරපන මහතා සමඟ උතුරු පළාතේ පොලිස් කොට්ඨාශ 6 නියෝජනය කරමින් එම කොට්ඨාස භාර අධ්‍යක්ෂකවරුන්, රථවාහන හැසිරවීමේ රාජකාරි සඳහා අනුයුක්ත පොලිස් නිලධාරීන් 150කට වැඩි සංඛ්‍යාවක් සහභාගී විය. මෙම අවස්ථාවද ඇතුලුව GovPay භාවිතාකිරීමේ තාක්ෂණික දැනුම ලබාදීම සඳහා පොලිස් නිලධාරීන් 400කට අධික සංඛ්‍යාවක් සහභාගී කරගනිමින් පසුගිය තෙදින තුල  වවුනියාව සහ කිලිනොච්චිය පොලිස් කොට්ඨාස තුල වැඩමුළු පැවැත්වුනු අතර අවශ්‍ය දුරකථන නිලධාරීන් වෙත ලබාදීමද සිදුවිය. උතුරු පළාත ශ්‍රී ලංකාවේ GovPay මගින් රථවාහන දඩ ගෙවිය හැකි තෙවන පළාතයි. බස්නාහිර සහ දකුණු පළාත තුල මේ වන විටත් Govpay හරහා රථවාහන දඩ මුදල් ගෙවීමේ සාර්ථකව ක්‍රියාත්මකය. එමගින් GovPay පහසුකම ආරම්භකළ 2025 වසරේ අප්‍රේල් මාසයේ සිට මේ දක්වා රථ වාහන දඩ මුදල් අයකරගැනීමේ වාර 23,539 ක් වාර්තා වී ඇති අතර එහි වටිනාකම රුපියල් මිලියන 31කට ආසන්න බව LankaPay ආයතනයේ ප්‍රධාන විධායක නිලධාරී චන්නද ද සිල්වා මහතා ප්‍රකාශ කළේය. මේ අනුව උතුරු පළාත තුලදීද Govpay හරහා දඩ මුදල් ගෙවීම සඳහා ඔබට දඩ පත්‍රිකාව ලබාදෙන පොලිස් නිලධාරියාගෙන් උපදෙස් ඉල්ලා සිටි හැකිය. ගෙවූ පසු එම අවස්ථාවේදීම ඔබේ රියදුරු බලපත්‍රය ලබාගත හැකිය. අවශ්‍යනම් පසුව අවස්ථාවක ගෙවීම සඳහා https://govpay.lk/si/spot-fine උපදෙස් පරිශීලනය කරමින් කටයුතු කළ හැකි බවත් දැනුම්දෙන්නෙමු.

මෙරට සංචාරක ව්‍යාපාරය ආශ්‍රිතව නියැලෙන දේශීය ශ්‍රමිකයන්, ඔවුන්ගේ ආරක්ෂාව පිළිබඳව සැලකිලිමත් විය යුතු අවස්ථා පිළිබඳව මෙන්ම සේවය ලබන සංචාරකයින් හට යම් අවස්ථාවක ආරක්ෂාව පිළිබඳ ගැටළුකාරී අවස්ථාවක් පැන නැගුනහොත් ඔවුන් විසින් ක්‍රියා කළ යුතු ආකාරය පිළිබඳව දැනුවත් කෙරෙන වැඩමුළු සඳහා පොලිස් නිලධාරීන්ගේ සම්පත් දායකත්වය හිමි වේ. Jetwing Travels පුද්ගලික ආයතනයේ ඇරයුමක් පරිදි පොලිස්පතිතුමාගේ උපදෙස් අනුව පොලිස් මාධ්‍ය කොට්ඨාසයේ අධ්‍යක්ෂ පොලිස් මාධ්‍ය ප්‍රකාශක නීතිවේදී එෆ්.යූ වුට්ලර් මහතා සහභාගී වූ එවැනි දැනුවත් කිරීමේ වැඩමුළුවක් 2025.10.28 දින උදෑසන Jetwing Travels පුද්ගලික ආයතනයේදී පැවත්වුනි.  සංචාරක ක්ෂේත්‍රය ආශ්‍රිතව ආරක්ෂාව සම්බන්ධව මෑත කාලයේ වාර්තා වූ සිදුවීම් ඇසුරින් පැහැදිලිකිරීම් සිදුකරමින් ගත හැකි නීතිමය ක්‍රියාමාර්ග පිළිබඳව හරවත් දේශනයක් මාධ්‍ය ප්‍රකාශකතුමා විසින් එහිදී පැවැත්වූ අතර එම ආයතනය යටතේ සේවය සපයන මඟ පෙන්වන්නන්, වාහන සැපයුම් කරුවන්, රියදුරන්, හෝටල් හිමියන්, ආපන ශාලා පවත්වාගෙන යන්නන්, සන්නිවේදකයින් වැනි සංචාරක ක්ෂේත්‍රයේ රැකියාවන්හි නියුතු වෘත්තිකයින් හා ශ්‍රමිකයන් පූර්ණ දැනුවත්භාවයක් එමගින් ලබාගත්හ.

අගමැති ආරක්ෂක කොට්ඨාසයට අනුයුක්ත කාන්තා පොලිස් පරීක්ෂක යමුනා ධම්මිකා කුමාරි එදිරිසිංහ සහ කාන්තා පොලිස් කොස්තාපල් 12093 සමන්මලී යන නිලධාරිනියන්, 2025.10.23 වන දින නාරාහේන්පිට තිඹිරිගස්යාය මාර්ගයේ තිබී ඔවුන්ට හමුවූ මුදල් පසුම්බියක් එහි හිමිකාරිය වන බ්‍රිතාන්‍ය ජාතික සබ්‍රිනා කැමරන් මහත්මියට හරි ආකාරාව භාර දීමට ක්‍රියාකළහ. නිලිධාරිනියන් මුදල් පසුම්බිය හමුවූ අවස්ථාවේදීම අගමැති ආරක්ෂක කොට්ඨාසයේ ස්ථානාධිපතිවරයා මගින් එම කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි සුමිත්‍ර ද සිල්වා මහතා දැනුවත් කිරීමට පියවර ගෙන ඇති අතර අධ්‍යක්ෂකවරයා විසින් පසුම්බියේ තිබූ තොරතුරු අනුව බස්නාහිර උතුර අපරාධ කොට්ඨාසය දැනුවත් කර සබ්‍රිනා කැමරන් මහත්මිය පදිංචි නිවස සොයාගෙන ඇත. ඒ් අනුව අගමැති ආරක්ෂක කොට්ඨාසයේ අධ්‍යක්ෂ කාර්යාලයට පැමිණි සබ්‍රිනා කැමරන් මහත්මියට අධ්‍යක්ෂකවරයා ඉදිරියේ පසුම්බිය සොයාගත් පොලිස් පරීක්ෂක යමුනා ධම්මිකා කුමාරි එදිරිසිංහ නිලධාරිනිය විසින්ම මුදල් පසුම්බිය භාරදී තිබේ. පසුම්බිය හමුවූ අවස්ථාවේදී එය තුල රුපියල් 6000.00 ක්, ඩොලර් සහ ස්ටාර්ලින් පවුම් යන විදේශ මුදල් තිබී ඇති අතර එම මුළු මුදල් ප්‍රමාණයේ වටිනාකම රුපියල් ලක්ෂ හයකට ආසන්න වේ. අමතරව දේශීය සහ විදේශීය ක්‍රෙඩිට් කාඩ්පත් කිහිපයක්, ජ්‍යාතන්තර රියදුරු බලපත්‍රය හා හැදුනුම්පත, අත්‍යවශ්‍ය ලියකියවිලි කිහිපයක් තිබී ඇත. ශ්‍රී ලාංකිකයන්ගේ අවංක ක්‍රියා කලාපය සම්බන්ධව සහ පොලිස් නිලධාරීන් වශයෙන් මෙලෙස ක්‍රියාත්මක වීම සම්බන්ධව සබ්‍රිනා කැමරන් මහත්මිය එම අවස්ථාවේ ප්‍රශංසනීයව අදහස් පළකර ඇති අතර බෙහෙවින් ස්තූතිවන්ත වී ඇත.

දකුණු පළාත තුලදී ඔබ සිදුකරන රථවාහන වැරද්දක් වෙනුවෙන් ලැබෙන දඩ පත්‍රිකාව ගෙවීම සඳහා රාජ්‍ය ගෙවීම් පද්ධතිය (GOV PAY) භාවිතා කිරීමේ හැකියාව ලබාදී ඇත. කුරුණෑගල, අනුරාධපුරය ඇතුලු වයඹ පළාතට සහ උතුරුමැද පළාතට අයත් පොලිස් ස්ථාන 14 ක නියමු ව්‍යාපෘතියක් ලෙස ආරම්භකළ මෙම පහසුකම ඉන් අනතුරුව බස්නහිර පළාත සහ අධිවේගී මාර්ගය ආශ්‍රිතවද සාර්ථකව ක්‍රියාත්මක කිරීමට හැකියාව ලැබීමෙන් දකුණු පළාත තුල පොලිස් ස්ථාන සඳහාද ලබාදීමට කටයුතු කර ඇත. ඩිජිටල් ආර්ථික අමාත්‍යංශය, ICTA ආයතනය සහ Lanka pay ආයතනය එක්ව එළිදැක්වූ Gov pay මාර්ගගත ගෙවීමේ පහසුකම ඔස්සේ මේ වන විට රුපියල් මිලියන 30 ක පමණ දඩ මුදල් අයකරගනීමට හැකිවී ඇති බව 2025.10.20 වන දින රජයේ ප්‍රවෘත්ති දෙපාර්තමේන්තුවේ පැවති ප්‍රවෘත්ති සාකච්ඡාවක් අතරතුර ප්‍රවාහන මහාමාරග හා නාගරික සංවර්ධන අමාත්‍යංශයේ ඩිජිටර් කාර්යසාධන බලකායේ සභාපති හර්ෂ පුරසිංහ මහතා පැවසීය. ඒ් අනුව එම දඩ මුදල් අයකරගැනීම වාර 20000කදී පමණ සිදුකර ඇති බවද වැඩිදුරටත් ප්‍රකාශ කළේය. දකුණු පළාත තුල රථවාහන පාලන හා මාර්ග ආරක්ෂාව දිසාව සහ බස්නාහිර පළාත් රථවාහන දිසාව භාර නියෝජ්‍ය පොලිස්පති W.P.J සේනාධීර මහතා විසින් එහිදී මෙම පහසුකම මහජනතාවට ලබාදීම සඳහා අවශ්‍ය පහසුකම්, දුරකථන සහ දැනුම පොලිස් ස්ථාන වෙත ලබාදීමට ක්‍රියාකර ඇති බවත් තවදුරටත් ක්‍රියාකරමින් පවතින බවත් ප්‍රකාශකරන ලදී. කාලය හා ශ්‍රමය අවම කරගැනීම සඳහා නොපැකිලිව මෙම ක්‍රමවේදය භාවිතාකරන ලෙසත් වඩාත් වැදගත් වනුයේ දඩපත්‍රිකා නොලැබෙන පරිදි ආරක්ෂිතව රිය පැදවීම බවත් නියෝජ්‍ය පොලිස්පති W.P.J සේනාධීර මහතා එහිදි ප්‍රකාශ කරන ලදී. මෙම ක්‍රමය ඔස්සේ දඩ මුදල් ගෙවීම සඳහා ඔබට දඩ පත්‍රිකාව ලබාදෙන පොලිස් නිලධාරියාගෙන් උපදෙස් ඉල්ලා සිටි හැකි අතර ගෙවූ පසු එම අවස්ථාවේදීම ඔබේ රියදුරු බලපත්‍රය ලබාගත හැකිය. අවශ්‍යනම් පසුව අවස්ථාවක ගෙවීම සඳහා https://govpay.lk/si/spot-fine උපදෙස් පරිශීලනය කරමින් කටයුතු කළ හැකි බවත් දැනුම්දෙන්නෙමු. GOV pay හරහා දඩපත්‍රිකා ගෙවීමේ පහසුකම මීළඟට උතුරු පළාත තුල ක්‍රියාත්මක කිරීමට නියමිතය.

මනා චිත්ත ධෛර්යක් ගොඩනගාගනිමින් ආත්ම විශ්වාසයෙන් යුතුව වගකීම් දැරීමට සුදුසු, කාර්යයශූර, රටට වැඩදායී පුද්ගලයින් වීම සඳහා මෙරට නව යොවුන් වියේ පසුවන්නන් පුරුදු පුහුණු කෙරෙන ශ්‍රී ලංකා පොලිසියේ තෝතැන්න පොලිස් ශිෂ්‍ය භට කොට්ඨාසයයි.   පොලිස් ශිෂ්‍යභට කණ්ඩය තෝරාගන්නා සෑම පාසල් සිසු සිසුවියක්ම අභිමානවත් පුරවැසියෙකු ලෙස මෙරට නීතිය පිළීබඳ දැනුමෙන් අනාගත ලෝකයට සන්නද්ධ කිරීම සඳහාත්, විශේෂඥ ක්‍රම උපායන් මගින් ධරාගැනීමේ හැකියාව ප්‍රගුණකරවමින් සාර්ථක ජීවිතයකට ඔවුන්ගේ මනස පුහුණු කිරීම සඳහාත් ක්‍රියාත්මක ක්‍රියාදාමයේ සුවිශේෂ අවස්ථාව පොලිස්පති අභියෝගතා කුසලාන ජාතික පොලිස් ශිෂ්‍යභට කඳවුරට ඔවුන්ව යොමුකිරීමයි.   මෙම ඡායාරූප පෙළින් දිස්වන්නේ කළුතර ශ්‍රි ලංකා පොලිස් විද්‍යාලය කේන්ද්‍ර කර ගනිමින් 2025.10.10 වන හෙට දින දක්වා පැවැත්වෙන 2025 පොලිස්පති අභියෝගතා කුසලාන ජාතික පොලිස් ශිෂ්‍යභට කඳවුරේ මනා ලෙස පුහුණු වූ සිසු සිසුවියන් සිය දරාගැනීමේ සහ අභියෝග ජයගැනීමේ පරීක්ෂණ සඳහා සාර්ථකව පෙනී සිටිමින් හැකියාවන් ප්‍රදර්ශනය කරන අයුරුයි.

මාතලේ කොට්ඨාස ප්‍රජා පොලිස් සම්බන්ධීකරණ ඒ්කකය එම ප්‍රදේශයේ පදිංචි දනහිසෙන් පහල පාද අහිමිව අසරණ තත්වයෙන් පසුවූ පුද්ගලයින් 11 දෙනෙකු සම්බන්ධයෙන් සොයාබලා ඔවුනට කෘතිම පාද පරිත්‍යාග කරන ලදී. මාතලේ පොලිස් කොට්ඨාසය භාර ජ්‍යෙෂ්ඨ පොලිස් අධිකාරී එම්.එස්.කේ වික්‍රමනායක මහතාගේ අධීක්ෂණය යටතේ 159 වන පොලිස් දිනයට සමගාමීව මෙම සත්ක්‍රියාව සංවිධානය කර ඇති අතර 2025.09.24 වන දින මාතලේ පොලිස් ස්ථානයේ ශ්‍රවනාගාරයේ පැවති කෘතිම පාද බෙදා දීමේ අවස්ථාව සඳහා මාතලේ දිස්ත්‍රික් II සහකාර පොලිස් අධිකාරී පි.එම්.සි.ආර් තෙන්නකෝන් මහතා, ප්‍රජා පොලිස් සම්බන්ධීකරණ ඒකකයේ ස්ථානාධිපති පොලිස් පරීක්ෂක හේමන්ත විජේබණ්ඩාර මහතා ඇතුලුව එම ඒ්කකයේ සෙසු නිලධාරීන් සහභාගී විය. රුපියල් ලක්ෂ 6 කට ආසන්න මුදලක් මෙම පරිත්‍යාගය සඳහා ලබාදෙමින් අනුග්‍රහය සපයන ලද මහනුවර ෆෝ හැන්ඩිකැප් ආයනය නියෝජනය කරමින් ආයතනයේ ප්‍රධාන විධායක නිලධාරී එස්.එස්. අත්තනායක, ප්‍රධාන තාක්ෂණ නිලධාරී සිසිර කුමාර යන මහත්වරුන්ද මෙම අවස්ථාවට එක්විය.

දිවයිනේ නන් දෙසින් අනුරාධපුරට පැමිණෙන බැතිමතුන් තිසා වැව නැරඹීමට මෙන්ම ඉන් ස්නානය කිරීමට මහත් ප්‍රියතාවයක් දක්වයි. කෙතරම් දැනුවත් කිරීම් සිදුකළඳ දැනුවත්ව හෝ නොදැනුවත්ව කසළ ස්වල්පයක් හෝ අවිධිමත් ලෙස වැව පරිශ්‍රයට බැහැර කිරීම හේතුවෙන් කල්යත්ම කසළ සැලකියයුතු ප්‍රමාණයක් අවට එක් රැස් වී තිබෙනු දැකිය හැකියි. එලෙස එක්රැස් වූ කසළ Clean Srilanka ජාතික වැඩසටහන යටතේ ක්‍රමවත්ව වැව පරිශ්‍රයෙන් ඉවත්කරීමේ ශ්‍රමදානයක් අනුරාධපුර පොලිස් කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී තිළිණ හේවා පතිරණ මහතාගේ මෙහෙයවීමෙන් 2025.09.20 වන දින පැවැත්වුනි. අනුරාධපුර කොට්ඨාස පොලිස් ජිවිතාරක්ෂක ඒකකයේ නිලධාරින් විසින් මෙහි සියලු සංවිධාන කටයුතු සිදුකර ඇති අතර එම ජිවිතාරක්ෂක ඒකකය යටතේ පුහුණුව ලබන පාසල් ළමුන්, තිසාවැව අවට ජංගම වෙළදුන් සිය කැමැත්තෙන් සහයෝගය ලබාදී ඇත. අවුකන සිංහ සමාජය විසින් මෙම වැඩසටහනට ලබාදුන් සාධර අනුග්‍රහය යටතේ වැව ආසන්නයේ අවවාදාත්මක දැන්වීම් පුවරු සවිකිරීමට කටයුතු කර ඇත.

අගනුවර අවට විවිධ වූ භාර්යදූර රාජකාරි ඉටුකරන පොලිස් නිලධාරීන්ගේ ධනාත්මක ආකල්ප තවදුරටත් දියුණු කිරීම අතිශය වැදගත් බැවින් පොලිස් මාධ්‍ය කොට්ඨාසය වරින් වර ඔවුන්ව වීශිෂ්ඨ කලා නිර්මාණ රසවින්දනය සඳහා යොමුකරයි. පොලිස්පතිතුමාගේ පූර්ණ අනුමැතියට යටත්ව පොලිස් මාධ්‍ය ප්‍රකාශක සහකාර පොලිස් අධීකාරී නීතිවේදී එෆ්. යූ වුට්ලර් මහතා විසින් මෙවර ප්‍රවීන වේදිකා නාට්‍ය නිෂ්පාදක කිත්සිරි හේවාගමගේ මහතාගේ “නෙයිනගෙ සූදුව” නාට්‍ය රසවින්දනය සඳහා කොළඹ නගරය අවට රාජකාරි නියුතු පොලිස් නිලධාරීන්, 2025.09.16 දින සවස කොළඹ පොලිස් අපරාධ කොට්ඨාසය වෙත කැඳවීය. අනීතික සමාජ විරෝධී ප්‍රචන්ඩ මැරයින්ගෙන් පීඩිතවූ ජන කොට්ඨාසයක් ඉතා උපක්‍රමශීලීව ඉන් මුදා ගනිමින් මැරයන් නීතිය රැහැනට හසුහසුකර ගන්නට අපූරු වික්‍රමාණවිත වැටලීමක් සිදුකළ අපේ අතීත පොලිස් විරුවෙකු පිළිබඳව  කියන ආදර්ශමත් වේදිකා රංගනයක් වන “නෙයිනගෙ සූදුව” නාට්‍ය රසාස්වාදය උදෙසා ජ්‍යෙෂ්ඨ පොලිස් නිලධාරීන් ඇතුලුව සියලු නිලතල නියෝජනය කරමින් පොලිස් නිලධාරීන් රැසක් ඒ් අනුව අපරාධ වාර්තා කොට්ඨාසයට එක්විය. කිසිදු අයකිරීමකින් තොරව මෙම ප්‍රදර්ශන වාරය පොලිස් නිලධාරීන් වෙනුවෙන් ලබාදුන් ප්‍රවීන වේදිකා නාට්‍ය නිෂ්පාදක කිත්සිරි හේවාාගමගේ මහතා ඇතුලු රන්ගන මඩුල්ලට ශ්‍රී ලංකා පොලිසියේ ගෞරවපූර්වක ස්තූතිය !

මාරක අනතුරකට ලක්ව බරපතල තුවාල ලබා රෝහල්ගතවන පුද්ගලයින් උදෙසා මෙන්ම විවිධ ශල්‍යකර්ම සඳහා ලක් කෙරෙන රෝගීන් වෙනුවෙන්, දරුවෙකු මෙලොවට බිහි කරන මවක් වෙනුවෙන් භාහිරින් රුධිරය අවශ්‍ය වන අවස්ථා සුලභ බව අප සැවොම හොදින් දන්නා කරුණකි. රෝහලත් සමඟ සමීපව රාජකාරි ඉටුකිරීමට සිදුවන පොලිසිය රෝහලේ රුධිර සංචිතවල ප්‍රමාණවත් බවේ වටිනාකම හොදින්ම දන්නා නිසාවෙන් ලේ දන් දීමේ කඳවුරු නිරන්තරයෙන් සංවිධානය කිරීමට පෙළඹේ.  පොතුහැර පොලිස් ස්ථානය 2025.09.03 වන දිනට යෙදුනු 159 වන පොලිස් සංවත්සර දිනයට සමගාමීව සංවිධානය කළ තවත් එක් ලේ දන් දීමේ කඳවුරක් 2025.09.09 වන දිනය පුරා එම පොලිස් ස්ථානය පරිශ්‍රයේ සාර්ථකව පැවැත්වීය මෙම වැඩසටහනට ප්‍රදේශයේ මහජන ආරක්ෂක කමිටුව සහ කුරුණෑගල රෝහලේ ලේ බැංකුව පූර්ණ දායකත්වය ලබාදී ඇති අතර රුධිරය පරිත්‍යාගකිරීම සඳහා එහිදී එක්වූ පුද්ගලයින් 178 දෙනෙකුගෙන් පුද්ගලයින් 128 දෙනෙකුට එහිදී රුධිරය පරිත්‍යාග කිරීමේ අවස්ථාව හිමි වී ඇත.

පොලිස් සේවා වනිතා ඒකකය සහ පොලිස් පවුල් සුබ සාධක සංගමයේ ගරු සභාපතිනී නිතිඥ නිල්මිණි නීටා සමරතුංග මැතිණියගේ සංකල්පයකට අනුව ක්‍රියාත්මක පූර්ණ ආබාධිත / ආබාධිත පොලිස් නිළධරයන් හා ඔවුන්ගේ පවුල්වල සාමාජිකයින් උදෙසා වෛද්‍ය උපකරණ පරිත්‍යාග කිරීමේ වැඩසටහන් මාලාවේ නැගෙනහිර පළාත තුල ක්‍රියාත්මක කළ පළමු වැඩසටහන 2025.09.01 දින මඩකලපුව පොලිස් අධිකාරි කාර්‍යාල සංකිර්ණයේදී පැවැත්විය. එහිදී පුර්ණ ආබාධිත / ආබාධිත නිළදරයන් 38 දෙනෙකු සදහා අත්‍යවශ්‍ය රෝදපුටු,කෘතිම අත්වාරු ,වෝකර් උපකරණ, කිහිලිකරු, මෙට්ට, වැසිකිලි උපකරණ උපකරණද ස්වයං රැකියාවක් සදහා ඉල්ලුම්කර තිබු උපකරණ පරිත්‍යාගයක් සිදුකරන ලදී. මෙම පරිත්‍යාග සදහා මුළ්‍ය ආධාර සැපයිම SLOGAN ජ්‍යාත්‍යන්තර සංවිධානය විසින් සිදුකරන ලද අතර එම සංවිධානයේ සභාපති ආචාර්ය A.M.I සාදික් මහතා ඇතුලුව නැගෙනහිර පළාත භාර ජ්‍යෙෂ්ඨ නියෝජ්‍ය පොලිස්පති නිතිඥ වරුණ ජයසුන්දර මහතා, මඩකලපුව දිසාව භාර නියොජ්‍ය පොලිස්පති M.N.S මෙන්ඩිස් මහතා, ‍පොලිස් සේවා වනිතා ඒකකයේ උප සභාපති නියෝජ්‍ය පොලිස්පති නිශානි සෙනවිරත්න මහත්මිය, මඩකලපුව අම්පාර ත්‍රීකුණාමලය කොට්ඨාස භාර නිලධාරී මහත්වරුන්, පොලිස් සේවා වනිතා ඒකකයේ උප ලේකම් ප්‍රධාන පොලිස් පරීක්ෂක නිමාලි ෆොන්සේකා මහත්මිය ඇතුලු  පොලිස් නිළධරයන්  සහභාගි විය.