Police News – SI

2026 ජාතික කරාතේ දෝ සංචිතය තෝරාගැනීම සඳහා ශ්‍රී කරාතේ දෝ ක්‍රීයාකාරී කාර්‍ය බලකාය මගින් සංවිධානය කරනු ලබන 2026 විවෘත කරාතේ ශුරතාවලිය 2026.06.13 වන දින සුගතදාස ගෘහස්ථ ක්‍රීඩාංගණයේදි පැවැත්වුනි. පොලිස් කරාතේ සංචිතය නියොජනය කරමින් එම තරඟාවලිය සඳහා සහභාගී වූ ක්‍රීඩක ක්‍රීඩිකාවන් 11 දෙනා අතරින් කුමිතේ +84KG ඉසවුව සඟවා තරඟවැදුනු උ.පො .ප. ජේ.එම්.ආර්.සී. අප්පුහාමි නිලධාරියා එම ඉසව්වේ තෙවන ස්ථානය ජයග්‍රහණය කරමින් ජාතික කරාතේ සංචිතවය තේරී පත්වූ අතර කුමිතේ -67 KG ඉසවුව යටතේ තරඟ කළ පොලිස් කොස්තාපල් 107216 බණ්ඩාර එම ඉස්ව්වේ තෙවන ස්ථානය දිනාගනිමින් ජාතික සංචිතයට තේරී පත්විය. පහත නම් සදහන් නිලධාරීන් 09 දෙනා එදින තරඟාවලියේ හොදම 08 දෙනාගේ වටයට සුදුසකම් ලැබීමට අවස්ථාව හිමිකරගනිමින් දක්ෂතා දක්වා ඇත. 1. පොලිස් කොස්තාපල් 28912 කාරියවසම්, කුමිතේ -84 KG ඉසවුව2. පොලිස් කොස්තාපල් 25497 විජේරත්න,‍ කුමිතේ +84 KG ඉසවුව3. පොලිස් කොස්තාපල් 25889 ගුණසිංහ, කුමිතේ -67 KG ඉසවුව4. පොලිස් කොස්තාපල් 24593 බුද්ධික, කුමිතේ -84 KG ඉසවුව5. පොලිස් කොස්තාපල් 27149 චතුරංග, කුමිතේ -75 KG ඉසවුව6. පොලිස් කොස්තාපල් 40540 රෝහිත, කුමිතේ -60 KG ඉසවුව7. පොලිස් කොස්තාපල් 98437 ගයාන්, කුමිතේ -55 KG ඉසවුව8. පොලිස් කොස්තාපල් 99585 කවිඳු, කුමිතේ -55 KG ඉසවුව9. පොලිස් කොස්තාපල් 107222 ගෝබිහන්, කුමිතේ -55 KG ඉසවුව එදින මෙම තරගාවලියට ක්‍රීඩා සමාජ හා සංගම් 450 ක් නියෝජනය කරමින් ක්‍රීඩක ක්‍රීඩිකාවන් 1800කට ආසන්න සංඛ්‍යාවක් සහභාගී වී ඇත. පොලිස් කරාතේ සංගමයේ සභාපති ලෙස නියොජ්‍ය පොලිසපති සිසිර කුමාර මහතා කටයුතු කරනු ලබන අතර ලේකම් ලෙස ජෙෂ්ඨ පොලිස් අධිකාරී සරත්චන්ද්‍ර ගුණතිලක මහතා, කණ්ඩායම් නායක ලෙස පොලිස් පරික්ෂක රජිවී ප්‍රසන්න මහතා,කණ්ඩායම් කලමණාකරු ලෙස පොලිස් පරික්ෂක පුබුදු චතුරංග මහතා, පුහුනුකරු ලෙස ජුරම්පති මහතා කටයුතු කරයි.

2026.06.19 වන දින සිට ක්‍රියාත්මක වන පරිදි මෙරට අධිවේගී මාර්ගයේ ගමන් ගන්නා සියළුම රථවාහනවල ගමන්ගන්නා රියදුරන් සහ මගීන් ආරක්ෂිත ආසන පටි පැලඳසිටීම අනිවාර්ය කර ඇත. ප්‍රවාහන,මහාමාර්ග සහ නාගරික සංවර්ධන අමාත්‍යංශය විසින් ක්‍රියාත්මක මාර්ග ආරක්ෂණ ජාතික වැඩපිළිවෙල යටතේ බලාත්මකවන මෙම නීතියට මහජනතාවට අවනත වන්නේද යන්න ශ්‍රී ලංකා පොලිසියේ අධිවේගී මාර්ග කොට්ඨාසය දැඩි සුපරීක්ෂාවෙන් සිටීමට නියමිතයි. මේ පිළිබඳ පූර්ව දැනුවන් කිරීමේ වැඩසටහනක් ජාත්‍යන්තර මෝටර් රථ ධාවන ශූර ඩිලන්ත මාලගමුව මහතාගේද සහභාගීත්වයෙන් 2026.06.16 සහ 17 යන දෙදින කොට්ටාව අධිවේගී මාර්ග හුවමාරු මධ්‍යස්ථානයේදී පැවැත්විණි.  එහිදී අධිවේගී මාර්ගයේ ගමන් කරන ලද වාහන වල රියදුරන් සහ මගී ජනතාව වෙත අමාත්‍යංශය මගින් මුද්‍රිත “ආදරණීයයන් වෙනුවෙන් Click එකක්” තේමාව සහිත අත් අත්පත්‍රිකා ලබා දෙමින් 19 වනදා සිට ආසන පටි පැලඳීම අනිවාර්ය බවත් තමන්ගේ හා ආදරණීයන්ගේ ආරක්ෂාව වෙනුවෙන් ආසන ආසනපටි පැළඳ ප්‍රවේසමෙන් රිය ධාවනය කරන ලෙසත් දැනුවත් කරන ලදී.  මේ අනුව ආසන පටි නීතියට හුරු වීම සඳහා රියදුරන් සහ මගී ජනතාවට ලබාදී තිබූ මාස 3ක සහන කාලය නිමාවන අතර 2026.09.19 වෙනිදායින් පසුව ආසන පටි පැලදීමේ නීතිය කඩ කරන්නන්ට එරෙහිව දඩ මුදල් පැනවීමට නියමිතය. දඩ මුදලේ ප්‍රමාණය රුපියල් දහසකි. නීතිමය ප්‍රතිපාදන අනුව ඉදිරියේදී වාහන හිමිකරු, රියදුරු, මගියා යන පාර්ශව ත්‍රිත්වය මෙම දඩමුදලට යටත්වේ.  සාමාන්‍ය මාර්ග වල ධාවනය වන වාහන වල රියදුරුන්ට සහ ඉදිරිපස අනෙක් ආසනයේ ගමන් ගන්නා මගියාට ආසන පටි පැලඳීම අනිවාර්ය වන අතර මේ අනුව අධිවේගී මාර්ගයේ ගමන් ගන්නා සියළුම වාහන වල රියදුරු සහ සියළු මගීන් ආසන පටි පැලඳිය යුතු ය. දැනුවත් කිරීමේ වැඩසටහන සඳහා ජාතික ජනබලවේගයේ කොළඹ දිස්ත්‍රික් පාර්ලිමේන්තු මන්ත්‍රී දේවානන්ද සුරවීර මහතා , මාර්ග සංවර්ධන අධිකාරියේ අධිවේගී මාර්ග මෙහෙයුම් හා නඩත්තු, කළමණාකරණ අංශයේ නියෝජ්‍ය අධ්‍යක්ෂ ජනරාල් R.A.D කහටපිටිය මහතා ඇතුළු පිරිසක් එක්ව සිටියහ.

දිවයින පුරා පිහිටි සියළුම පොලිස් ස්ථාන වල සේවා සම්බන්ධව මහජන අදහස්, පැමිණිලි, ප්‍රශංසා හෝ යෝජනා සෘජුවම ලබා ගැනීමට හැකි Online Digital Platform හරහා “ SriLanka Police Community Feedback Portal ” නමින් QR කේත පුවරු ක්‍රමවේදයක් මහජනතාවට හඳුන්වා දීමට කටයුතු සිදු කර ඇත. මෙම සේවාව මඟින් පුරවැසියන්ට පහසුවෙන් අදහස් හා ප්‍රතිචාර ලබාදීමට අවස්ථාව සැලසෙන අතර එම දත්ත විශ්ලේෂණ උපයෝගී කර ගනිමින් ජනතාව කේන්ද්‍ර කරගත් වඩාත් කාර්යක්ෂමව පොලිස් සේවාවක් සැපයීම මෙහි මූලික පරමාර්ථය වේ. මෙම QR කේතය භාවිතා කරන ආකාරය පහත පරිදි වේ.  https://feedback.police.lk/ • අදහස / පැමිණිල්ල / ප්‍රශංසාව / යෝජනාව යන අංශයෙන් විකල්පය තෝරා ගැනිම.• අවශ්‍ය නම් පුද්ගලික තොරතුරු ඇතුලත් කල හැකිය. ( Needto add my personal details )• පොලිස් ස්ථානය වෙත පැමිණි කාරණය ( Add my visit information)• වෙනත් කරුණු ( Add more information )• සිද්ධිය හෝ අදහස පිළිබඳ විස්තර ඇතුලත් කිරීම. තවද, ශ්‍රී ලංකා පොලිසියේ police.lk web අඩවිය වෙත පිවිස එහි E – Services වෙත ගොස් Community Feedback Portal මඟින්ද මහජනතාවට පහසුවෙන් අදහස් හා ප්‍රතිචාර ලබාදීමට හැකියාව ඇත.

ඩුබායි රාජ්‍යයේදී එරට ආරක්ෂක අංශ මඟින් අත්අඩංගුවට ගෙන ශ්‍රී ලංකාවට පිටුවහල් කරන ලද සංවිධානාත්මක අපරාධවලට සම්බන්ධ ප්‍රබල සැකකරුවන් දෙදෙනෙකු, 2026 ජූනි මස 13 වන දින රාත්‍රී කටුනායක බණ්ඩාරනායක ජාත්‍යන්තර ගුවන්තොටුපළේදී අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගෙන තිබේ. මෙලෙස අත්අඩංගුවට ගත් සැකකරුවන් දෙදෙනා ඉදිරි දීර්ඝ විමර්ශන කටයුතු සඳහා මධ්‍යම අපරාධ විමර්ශන කාර්යාංශය සහ කොළඹ මධ්‍යම අපරාධ විමර්ශන කොට්ඨාසය වෙත භාර දීමට පියවර ගෙන ඇත. මධ්‍යම අපරාධ විමර්ශන කාර්යාංශය වෙත භාරදුන් පළමු සැකකරු කොළඹ 15 ප්‍රදේශයේ පදිංචි 25 හැවිරිදි තරුණයෙකි. මෙම සැකකරුගේ ඡායාරූපය කටුනායක ගුවන්තොටුපළ පර්යන්තයේ පිහිටුවා ඇති නවීන ස්වයංක්‍රීය මුහුණු හඳුනාගැනීමේ පද්ධතිය වෙත 2025 වර්ෂයේ මාර්තු මස සිට ඇතුළත් කර තිබීම විශේෂත්වයකි. මොහු විදේශගතව සිටින සංවිධානාත්මක අපරාධ සහ මත්ද්‍රව්‍ය ජාවාරම්කරුවෙකු වන ‘මෝදර නිපුණ’ නැමැත්තාගේ සෘජු සහෝදරයෙකු බවට විමර්ශනවලදී හඳුනාගෙන ඇත. මෙම සැකකරු මීට පෙර 2019 වර්ෂයේදී පමුණුගම පොලිසිය මඟින් ගංජා ළඟ තබා ගැනීමේ වරදටත්, 2020 වර්ෂයේදී මෝදර පොලිස් වසමේදී පුද්ගලයෙකුට පොල්ලකින් හා උල් ආයුධයකින් පහර දී තුවාල සිදු කිරීමේ අපරාධයටත් අත්අඩංගුවට පත්ව ඇති අතර, 2022 නොවැම්බර් මාසයේ සිට කොළඹ ප්‍රධාන අංක 04 මහේස්ත්‍රාත් අධිකරණය මඟින් වරෙන්තු නිකුත් කර සිටි අයෙකි. කොළඹ මධ්‍යම අපරාධ විමර්ශන කොට්ඨාසය වෙත භාරදුන් දෙවන සැකකරු කොළඹ 14 ප්‍රදේශයේ පදිංචි 40 හැවිරිදි වියේ පසුවන්නෙකි. මොහු දීර්ඝ කාලයක සිට මනුෂ්‍ය ඝාතන සහ මත්ද්‍රව්‍ය ජාවාරම්වලට සම්බන්ධ බරපතල ගණයේ අපරාධකරුවෙකු බව අනාවරණය වී ඇත. මෙම සැකකරුට එරෙහිව 2010 වර්ෂයේ ගණේමුල්ල ප්‍රදේශයේදී පුද්ගලයෙකුට පහරදීම සම්බන්ධයෙන් සහ කැලණිය ප්‍රදේශයේදී හෙරොයින් මත්ද්‍රව්‍ය සමඟ අත්අඩංගුවට ගැනීම සම්බන්ධයෙන් අධිකරණයේ නඩු පවරා තිබේ. එලෙසම මොහු 2015 වර්ෂයේ කොළඹ ප්‍රදේශයේදී සිදු වූ වෙඩි තබා මනුෂ්‍ය ඝාතනයක ප්‍රධාන සැකකරුවෙකු වන අතර, 2016 වර්ෂයේ මාළිගාවත්ත ප්‍රදේශයේදී බන්ධනාගාර බස් රථයකට වෙඩි තැබීමේ සිද්ධියට ආධාර අනුබල දීම සම්බන්ධයෙන් ද කොළඹ ප්‍රධාන මහේස්ත්‍රාත් අධිකරණයේ නඩු පවරා ඇති අයෙකි. මීට අමතරව 2016 වර්ෂයේදී ගිනි අවියක් සහ පතරොම් සමඟ නීතිඥයෙකු මාර්ගයෙන් ත්‍රස්ත විමර්ශන කොට්ඨාසය වෙත භාර වීමෙන් පසු රක්ෂිත බන්ධනාගාර ගතව සිට ඇප මත මුදාහැර සිටි මෙම සැකකරු, 2018 වර්ෂයේදී ග්‍රෑන්ඩ්පාස් පොලිස් වසමේදී පිස්තෝල අවියකින් වෙඩි තබා පුද්ගලයෙකු ඝාතනය කර තවත් තිදෙනෙකුට බරපතල තුවාල සිදු කිරීමේ දරුණු අපරාධයකට ද සෘජුවම සම්බන්ධ වී තිබේ. මෙම සැකකරුවන් දෙදෙනා සම්බන්ධයෙන් මධ්‍යම අපරාධ විමර්ශන කාර්යාංශය සහ කොළඹ උතුර අපරාධ විමර්ශන කොට්ඨාසය එක්ව වැඩිදුර විමර්ශන අඛණ්ඩව සිදුකරනු ලබයි.

පුද්ගලයෙකු සන්තකයේ තිබී ව්‍යාජ ඩොලර් නෝට්ටු හමුවූ සිද්ධියක් සම්බන්ධව විමර්ශන ආරම්භකළ මධ්‍යම අපරාධ විමර්ශන කාර්යාංශයේ නිලධාරින් කණ්ඩායමක් විසින් 2026.06.08 වන දින මුල්ලේරියාව පොලිස් වසමේ කොටිකාවත්ත ප්‍රදේශයේ නිවසක් වටලා ව්‍යාජ ඩොලර් 100 නෝට්ටු 6300ක් සමඟ කාන්තාවක් අත්අඩංගුවට ගෙන ඇත. දීර්ඝ විමර්ශනයකින් අනතුරුව වයස අවුරුදු 53 ක් වන මෙම සැකකාරිය සම්බන්ධව අනාවරණය කරගැනීමට හැකි වී ඇති අතර  සැකකාරිය  විසින් වර්තමානයේ පවතින ඩොලර් මුදල් අගයට සාපේක්ෂව අඩු මුදලකට දිවයිනේ සුප්‍රසිද්ධ හෝටල් පරිශ්‍රයන් තුලදී විවිධ පුද්ගලයින් වෙත මෙම මුදල් නෝට්ටු අළෙවි කිරීමට තැත්කර ඇති බව විමර්ශනයේදී අනාවරණය වී තිබේ.  මුල් අවස්ථාවේදී ව්‍යාජ නොවන ඩොලර් නෝට්ටු කිහිපයක් ගැණුම්කරුවන්ට ලබා දී ගැණුම්කරුවන්ගේ විශ්වාසය දිනාගත් පසු ව්‍යාජ ඩොලර් නෝට්ටු ලබාදීම ආරම්භකර මෙම මුදල් වංචාව සිදුකරගෙන ගොස් ඇත.  සැකකාරිය වයස අවුරුදු 53 ක් වන කොටිකාවත්ත ප්‍රදේශයෙහිම පදිංචිකාරියකි.  මෙම මුදල් වංචාව සම්බන්ධව මධ්‍යම අපරාධ විමර්ශන කාර්යාංශය විසින් තවදුරටත් විමර්ශන සිදුකරයි.

2026.06.05 වන අද දින උදෑසන කාලයේදී අපරාධ පරික්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන අංශයේ නිලධාරීන් කණ්ඩායමක් විසින් සිදු කරන ලද විමර්ශනයකට අදාලව බොරැල්ල පොලිස් වසමේ එන්.එම්.පෙරේරා මාවත ප්‍රදේශයේ නිවසක් පරික්ෂා කර ඇත. එහිදී ඉඩම් රෙජිස්ට්‍රාර් කාර්යාලයේ ඔප්පු පිටපත් ඇති මුල් ගොනු 02ක්, ඉඩම් වලට අදාලව සකස් කරන ලද ව්‍යාජ ලිපි ලේඛණ, ව්‍යාජ ජාතික හැඳුනුම්පත් 04 ක්, ව්‍යාජව සකස් කරන ලද නිල මුද්‍රා 600 ක්, ව්‍යාජ ලේඛණ සකස් කිරීම සඳහා යොදා ගත් විද්‍යුත් උපකරණ සමඟ සැකකරුවන් දෙදෙනෙකු අත්අඩංගුවට ගෙන ඇත. තවද මෙම අපරාධයන් සඳහා යොදා ගත් බවට සැකකරන  කාර් රථයක්, යතුරුපැදියක් හා මුදල් රුපියල් ලක්ෂ 15ක් ඇතුළු දේපල රැසක් පොලිස් භාරයට ගෙන ඇත. සැකකරුවන්ගෙන් අනාවරණය වූ තොරතුරු මත දෙල්කඳ ප්‍රදේශයේදී මෙම සිද්ධියට සම්බන්ධ තවත් සැකකරුවෙකු අත්අඩංගුවට ගෙන ඇත. සැකකරුවන් අවුරුදු 54, 55 හා 59 වයස්වල පසුවන බොරැල්ල, දික්වැල්ල හා හොරණ ප්‍රදේශවල පදිංචිකරුවන් වේ. අපරාධ පරික්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන අංශය විසින් වැඩිදුර විමර්ශන සිදු කරනු ලබයි.

බස්නාහිර පළාත උතුර අපරාධ කොට්ඨාසයේ නිලධාරීන් පසුගිය සති දෙකක පමණ කාලයක්  කොළඹ නගරය අවට සිදුකළ දීර්ඝ උපායශීලී විමර්ශනයක් මගින් 2026.06.03 වන දින දෙමටගොඩ ප්‍රදේශයේ නිවසක සඟවා තිබූ ටී-කටස් ගිනි අවි 19 ක්, ටී-56 උණ්ඩ 19 ක්, අයිස් ග්‍රෑම් 15 මිලිග්‍රෑම් 200 ක්, ප්‍රිගැබ්ලින් මත්පෙති 100400 ක් සොයාගෙන පොලිස් භාරයට ගත්හ. මෙම තොගය සොයාගැනීම සඳහා 2026.05.12 වන දින අයිස් මත්ද්‍රව්‍ය ග්‍රෑම් 50 මිලිග්‍රෑම් 150 ක් හා හෙරොයින් ග්‍රෑම් 25 මිලිග්‍රෑම් 200 ක් සමඟ රාගම ප්‍රදේශයේ පදංචි සැකකරුවෙකු අත්අඩංගුවට ගැනීමට හැකිවීම  සහ 2026.05.18 දින අයිස් මත්ද්‍රව්‍ය කිලෝග්‍රෑම් 01 ග්‍රෑම් 568 මිලිග්‍රෑම් 100 ක ප්‍රමාණයක් සමඟ පෑලියගොඩ ප්‍රදේශයේ පදිංචි සැකකරුවෙකු අත්අඩංගුවට ගැනීමට හැකිවීම පාදක වී ඇත. එම වැටලීම් මගින් සිදුකළ වැඩිදුර විමර්ශනයේදී 2026.05.22 වන දින සැකකරුවෙකු නොමැතිව දෙමටගොඩ ශ්‍රී ධර්මාරාම මාවතේදී අයිස් කිලෝග්‍රෑම් 45 ග්‍රෑම් 867 ක් හා කේරල ගංජා කිලෝග්‍රෑම් 07 ග්‍රෑම් 325ක් පොලිස් පොලිස් භාරයට ගැනීමට හැකිවිය. අනතුරුව මෙම ‌තොගය සමඟ ජාවාරමේ යෙදී සිටි සැකකරුද අඛන්ඩ පොලිස් විමර්ශන මගින් අනාවරණය කරගැනීමටත් සැකකරු කාන්තාව සමඟ නෙලුව ප්‍රදේශයේ නිවසක් කුලියට ගෙන රැදී සිටියදී අත්අඩංගුවට ගැනීමටත් බස්නාහිර පළාත් උතුර අපරාධ කොට්ඨාසය සමත් විය.  එම සැකකරු මගින් මත්ද්‍රව්‍ය තොගය කොළඹ ප්‍රදේශයට රැගෙන ආවේ මාතර ප්‍රදේශයෙන් බව අනාවරණය කරගත් පසු බස්නාහිර පළාත් උතුර අපරාධ කොට්ඨාසයේ නිලධාරීන් මාතර සුල්තානාගොඩ ප්‍රදේශයට ගොස් මත්ද්‍රව්‍ය ජාවාරමට ආධාර අනුබල දුන් සැකකාරියක් අත්අඩංගුවට ගත්හ. සැකකාරිය මගින් මාතර ප්‍රදේශයට මත්ද්‍රව්‍ය තොගය රැගෙන ආ සැකකරු අයිස් මත්ද්‍රව්‍ය ග්‍රෑම් 100 මිලිග්‍රෑම් 300ක ප්‍රමාණයක්  සන්තකයේ තබාගැනීමේ වරදට මත්ද්‍රව්‍ය නාශක කාර්යංශය-මාතර ඒ්කකයේ අත්අඩංගුවට පත්වී බන්ධනාගාරගතව සිටින බව අනාවරණය වී තිබේ. අවසන් වශයෙන් නැවතත් මාතර ප්‍රදේශයෙන් කොළඹට රැගෙන ආ මත්ද්‍රව්‍ය තොගය සඟවා තැබූ ස්ථාන පිළිබඳව නෙලුව ප්‍රදේශයේදී අත්අඩංගුවට ගත් සැකකරුගෙන් විමසීමේදී අනාවරණය වූ තොරතුරක් අනුවයි විමර්ශක නිලධාරීන්ට මෙම  ටීටී-කටස් ගිනි අවි 19 ක්, ටී-56 උණ්ඩ 19 ක්, අයිස් ග්‍රෑම් 15 මිලිග්‍රෑම් 200 ක්, ප්‍රිගැබ්ලින් මත්පෙති 100400 ක් සොයාගැනීමට හැකිවී තිබේ.  බස්නාහිර පළාත උතුර අපරාධ කොට්ඨාසයේ නිලධාරීන් දින 14කට ආසන්න කාලයක්  සූක්ෂමව අනාවරණය කරගත් තොරතුරු විශ්ලේෂණයට ලක්කිරීමෙන් හා විමර්ශනය සඳහා රෑ දිවා සිදුකළ කැපකිරීමේ ප්‍රතිඵලයක් ලෙස මෙම සැකකාර මත්ද්‍රව්‍ය ජාවාරම්කරුවන් සහ අවි තොගය අත්අඩංගුවට ගැනීමට හැකි වී ඇති බව සඳහන් කළ යුතු අතර අවි සහ මත්ද්‍රව්‍ය තොග වශයෙන් සඟවාතබන, ප්‍රවාහනය කරන මෙම සැකකරුවන් හා සම්බන්ධ අයවළුන් සොයා තවදුරටත් විමර්ශනය ක්‍රීයාත්මකයි.

2025.02.19 දින කොළඹ අංක 05 ගරු මහේස්ත්‍රාත් අධිකරණ ශාලාවක් තුලදී නීතිඥවරයෙකු ලෙස පෙනී සිටි පුද්ගලයෙකු විසින් බන්ධනාගාරය මගින් ඉදිරිපත් කර සිටි සංජීව කුමාර සමරරත්න නොහොත් ගණේමුල්ල සංජීව නැමැත්තා වෙඩිතබා ඝාතනය කළ අපරාධය සම්බන්ධව විමර්ශන පවත්වන කොළඹ දිසා අපරාධ කොට්ඨාසය, එම සිද්ධියට අධාර අනුබල දුන් සැකකරුවෙකු ලෙස ගම්පහ ඔස්මන් නම් තැනැත්තා 2026.05.13 වන දින රාත්‍රියේ ගම්පහ පොලිස් වසමේ ශ්‍රී බෝධි පාර ප්‍රදේශයේදී අත්අඩංගුවට ගෙන ඇත. ගණේමුල්ල සංජීව නැමැත්තා ඝාතනය කිරීමට අදාලව අත්අඩංගුවට ගෙන රැඳවුම් නියෝග මත සිටින සැකකරුවන්ගෙන් අනාවරණය වූ තොරතුරු අනුව ගම්පහ ඔස්මන් නැමැති සැකකරු විදේශ ගතව සිටින සංවිධානාත්මක අපරාධකරුවන් සමඟ එක්ව එම ඝාතනය සැලසුම් කර තිබේ. එමෙන්ම ඝාතනය සඳහා කුමන්ත්‍රණය කිරීම හා අපරාධය සිදුකිරීම සඳහා අවශ්‍ය ගිනි අවිය ලබා දීම, මනුෂ්‍ය ඝාතනයට ආධාර අනුබල දීම යන වැරදි සිදුකර ඇති බව අනාවරණය වී ඇති අතර අත්අඩංගුවට ගන්නා අවස්ථාවේ බලපත්‍රයක් නොමැතිව විදේශ රටක නිෂ්පාදිත රීපීටර් වර්ගයේ ගිනි අවියක්, එම ජීව පතරොම් 10 ක් හා පතරොම් ගැබ් 02 ක්ද සැකකරු සන්තකයේ තිබී ඇත. කොළඹ දිසා අපරාධ කොට්ඨාසය සිද්ධීය සම්බන්ධව හා ආධාර අනුබලදුන් සැකකරුවන් සොයා තවදුරටත් විමර්ශන සිදුකරයි.

2026.05.11 වන දින රාත්‍රියේ නාදුනන පුද්ගලයින් තිදෙනෙක විසින් අම්බලන්තොට මාමඩල හංදිය ප්‍රදේශයේ නිවසක පදිංචිව සිටි පුද්ගලයෙකු වෙඩිතබා, කපාකොටා ඝාතනය කර හිස දේහයේ හිස කොටස මාමඩල හංදියේ පිළිරුවක තබා පළා ගිය සාහසික අපරාධය සම්බන්ධව විමර්ශන සිදුකළ අම්බලන්තොට පොලිස් ස්ථානයේ නිලධාරීන් හා තංගල්ල කොට්ඨාස අපරාධ විර්ශන ඒ්කකය සැකකරුවන් තිදෙනා අත්අඩංගුවට ගෙන ඇත. එක් සැකකරුවෙකු අම්බලන්තොට පොලිස් ස්ථානය විසින් 2026.05.12 වන දින අත්අඩංගුවට ගෙන ඇති අතර සැකකරුවන් දෙදෙනා තංගල්ල කොට්ඨාස අපරාධ විර්ශන ඒ්කකය විසින් 2026.05.12 වන දින අත්අඩංගුවට ගෙන ඇත. ඔවුන් අම්බලන්තොට් ප්‍රදේශයේ පදිංචිකරුවන්ය. 2025.02.02 වන දින ඇලේගොඩ මාමඩල ප්‍රදේශයෙන් වාර්තා වූ ත්‍රිත්ව මනුෂ්‍ය ඝාතනයට පලිගැනීමක් ලෙස මෙම මනුෂ්‍ය ඝාතනය සිදුකර ඇති බව විමර්ශනයේදී අනාවරණය වී තිබේ. සැකකරුවන්ගේ පහරකෑමට ලක්වූ මරණකරුගේ බිරිඳගේ පියා හම්බන්තොට රෝහලේ නේවාසිකව ප්‍රතිකාර ලබමින් පසුවේ.

01)මිදිගම පොලිස් ස්ථානය – විදෙස් ජාතික සැකකරුවන් 33 දෙනෙකු  අත්අඩංගුවට  මිදිගම පොලිස් ස්ථානයේ  නිලධාරීන් කණ්ඩායමක්  2026.05.11 වන දින රාත්‍රියේ මිදිගම පොලිස් වසමේ පිංවත්ත  ප්‍රදේශය සංචාරක හෝටලයක් තුල ලැගුම්ගෙන සිටි ඉන්දීය ජාතිකයින් 28 දෙනෙකු හා නේපාල ජාතිකයින් 05 දෙනෙකු  අත්අඩංගුවට ගෙන ඇත.  සැකකරුවන් අවුරුදු 25 ත් 35 අතර පසුවන්නන් වේ. මෙම සැකකරුවන් වීසා නොමැතිව මෙරට රැඳී සිටීම, සංචාරක වීසා මත පැමිණ රැකියාවල යෙදීම, තීරුබදු රහිතව ගෙන්වන ලද සිගරට් සන්තකයේ තබාගැනීම හා පරිගණක අපරාධ පනතේ ගැනෙන අපරාධයන් සිදු කිරීම යන වැරදි සම්බන්ධයෙන් සැකපිට අත්අඩංගුවට ගෙන ඇත.  මිදිගම පොලිසිය මගින්  වැඩිදුර විමර්ශන ක්‍රියාත්මකයි 02) පොලිස් විශේෂ කාර්ය බලකා අක්මීමණ කඳවුර –  විදෙස් ජාතික සැකකරුවන් 55 දෙනෙකු අත්අඩංගුවට 2026.05.11 වන දින හික්කඩුව පොලිස් වසමේ දොඩන්දූව ප්‍රදේශයේ නවාතැන්පලක් තුලදී පරිගණක අපරාධ පනතේ ගැනෙන වැරදි සිදු කිරීමට සැකපිට ඉන්දීය ජාතිකයින් 35 දෙනෙකු හා නේපාල ජාතිකයින් 20 දෙනෙකු හා ඔවුන්ට නවාතැන් පහසුකම් ලබාදුන් හෝටල් හිමිකරුවෙකු අත්අඩංගුවට ගැනීමට පොලිස් විශේෂ කාර්ය බලකා අක්මීමන කඳවුරේ නිලධාරීන් කටයුතු කර ඇත. සැකකරුවන් සතුව තිබූ පරිගනක යන්ත්‍ර 25 ක්, ජංගම දුරකථන 119 ක්, මුදල් රුපියල් 750,000/- (හත්ලක්ෂ පනස් දහසක්) ක්, කාර් රථයක් හා ජීප් රථයක් හික්කඩුව පොලිස් ස්ථානයට ඉදිරිපත් කර ඇත.  විදෙස් ජාතිකයින් පිරිස වයස අවුරුදු 20 ත් 48 ත් අතර පසුවන්නන්ය. අත්අඩංගුවට ගත් ලැගුම්හල් හිමිකරු වයස අවුරුදු 43 ක් වන දොඩම්දූව ප්‍රදේශයේ පදිංචිකරුවෙකි. හික්කඩුව පොලිසිය මගින්  වැඩිදුර විමර්ශන සිදුකරයි. 03) ගාල්ල පොලිස් ස්ථානය – විදෙස් ජාතික සැකකරුවන් 110 දෙනෙකු අත්අඩංගුවට  ගාල්ල පොලිස් ස්ථානයේ නිලධාරීන් 2026.05.11 වන දින ගාල්ල පොලිස් වසමේ ගල්වඩුගොඩ හා ශ්‍රී සුමේධ මාවත  ප්‍රදේශවල වැටලීම් දෙකක් සිදුකර ලැගුම්හල් දෙකක් තුල නවාතැන් ගෙන සිටි ඉන්දීය ජාතිකයින් 110 දෙනෙකු පරිඝණක අපරාධ පනතේ ගැනෙන වැරදි සිදු කිරීමට සැකපිට අත්අඩංගුවට ගෙන ඇත.  සැකකරුවන් අවුරුදු 19  ත් 35  ත් අතර වයස්වල පසුවන්නන්ය. සැකකරුවන් සන්තකයේ තිබී පරිඝනක යන්ත්‍ර 58 ක්, ජංගම දුරකථන 79 ක්, පොලිස් භාරයට ගෙන ඇති අතර ගාල්ල පොලිස් ස්ථානය විසින් වැඩිදුර විමර්ශන සිදුකරයි. 04)ගාල්ල වරාය පොලිස් ස්ථානය –  විදෙස් ජාතික සැකකරුවන් 23 දෙනෙකු අත්අඩංගුවට 2026.05.11 වන දින ගාල්ල වරාය පොලිස් වසමේ මාගල්ල හා සම්බෝධි හන්දිය අසල ප්‍රදේශවලදී පරිගණක අපරාධ සිදුකිරීමට සැකපිට ඉන්දීය ජාතිකයින් 19 දෙනෙකු හා නේපාල ජාතිකයින් 04 දෙනෙකු අත්අඩංගුවට ගෙන ඇත. සැකකරුවන් වයස අවුරුදු 21ත් 47ත් අතර පසුවන්නන්ය. සැකකරුවන් සතුව තිබූ පරිගනක යන්ත්‍ර 10 ක්, ජංගම දුරකථන 32 ක්, ගාල්ල වරාය පොලිස් ස්ථානයට ඉදිරිපත් කර ඇත.  හික්කඩුව පොලිසිය මගින්  වැඩිදුර විමර්ශන සිදුකරයි.