Police News – SI

කැනඩාවට යවන බව පවසා රුපියල් ලක්ෂ 1,705,000/= ක් වංචාකළ වයස අවුරුදු 48 ක් වන මන්නාරම, එළුත්තුර් ප්‍රදේශයේ පදිංචි සැකකරුවෙක් මීගමුව විශේෂ අපරාධ කොට්ඨාසය විසින් 2026.01.24 දින අත්අඩංගුවට ගෙන ඇත. සැකකරු මීගමුව මහේස්ත්‍රාත් අධිකරණයට ඉදිරිපත් කිරීමෙන් අනතුරුව 2026.02.03 වන දින දක්වා රක්ෂිත බන්ධනාගාරගත කර ඇත.  එමෙන්ම රුමේනියා දේශයේ රැකියාවක් ලබාදෙන බව පවසා රුපියල් 915,000.00 ක් වංචා කළ සැකකරුවෙකු පිළිබඳවද වාරතාවී ඇත. අනුරාධපුර ප්‍රදේශයේ කාන්තාවක් දැන හඳුනාගැනීමෙන් මෙලෙස රැවටීමට ලක්කර ඇති අතර මූලික වැඩකටයුතු සඳහා පළමුව රු හාර ලක්ෂ හැත්තෑදහසක් ලබාගෙන ඇත. අනතුරුව ඉතිරි ක්‍රියාමාර්ග ගැනීම සඳහා ලක්ෂ 16 ක මුදලක් වැයවන බවත් ඉන් අඩක් ලබාදෙන මෙන් පැවසුවද කාන්තාව විසින් රුපියල් ලක්ෂ 4 ක මුදලක් සැකකරු විසින් ලබාදුන් ගිණුමකට බැර කර තිබේ. කල් යත්ම විදෙස්ගතවීම කල්යාමත් සමඟ අවස්ථා කිහිපයකදී නැවත මුදල් ලබාදෙන ලෙස පැවසුවත් සැකකරු විසින් මුදල් ලබාදී නොමැති බැවින් කාන්තාව මුදල් තැන්පත් කළ පත්වල ඡායා පිටපත් සමඟ පැමිණිලි කර ඇත. “විදෙස් රැකියා සඳහා යොමුවීම සඳහා පුද්ගලික ආයතනයක් තෝරාගන්නේ නම් නිසි පරීක්ෂාවකින් සුදුසු ආයනයක් තොරාගන්නා ලෙස දැනුම් දෙන්නෙමු. කූඨ අරමුණු අනුව ක්‍රියාත්මකවන වංචාකරුවන්ගේ බලාපොරොත්තුවලට රැවටී මුදල් අහිමිකර නොගන්න. සේවා දායකයා සැක සහිත නම් නොපමාව ලඟම ඇති පොලිස් ස්ථානය වෙත පැමිණ පැමිණිල්ලක් ඉදිරිපත් කරන්න. ඒ් සඳහා මුදල් ගෙවූ රිසිට්පත්, සෝවා දායකයාගේ තොරතුරු අඩංගු ලේඛන ප්‍රවේසම් කර ලඟ තබාගන්න.”    

ගුවන් මගින් ශ්‍රී ලංකාවට රැගෙන එන ලද කුෂ් සහ හෂීස් මත්ද්‍රව්‍ය තොගයක් සමඟ සැකකරුවන් දෙදෙනෙකු අත්අඩංගුවට ගැනීමට පොලිස් මත්ද්‍රව්‍ය කාර්යංශයේ ගුවන්තොටුපල ඒකකය සමත්ව තිබේ. ඊයේ (25) උදෑසන කටුනායක ගුවන්තොටුපල පැමිණීමේ පර්යන්තයේදී සිදුකළ විශේෂ වැටලීමකදී මෙම මත්ද්‍රව්‍ය තොගය සොයාගෙන ඇත. පොලිස් මත්ද්‍රව්‍ය කාර්යංශයේ නිලධාරීන්ට ලැබුණු බුද්ධි තොරතුරකට අනුව සිදුකළ මෙම මෙහෙයුමේදී පහත මත්ද්‍රව්‍ය ප්‍රමාණයන් සොයාගෙන ඇත. • පළමු සැකකරු: කුෂ් මත්ද්‍රව්‍ය කිලෝග්‍රෑම් 04 ග්‍රෑම් 162 ක් සහ හෂීස් මත්ද්‍රව්‍ය කිලෝග්‍රෑම් 01 ග්‍රෑම් 912 ක් සන්තකයේ තිබී ඇත. • දෙවන සැකකරු: කුෂ් මත්ද්‍රව්‍ය කිලෝග්‍රෑම් 06 ග්‍රෑම් 230 ක් සන්තකයේ තිබී ඇත. සමස්ත මත්ද්‍රව්‍ය ප්‍රමාණය: කුෂ් මත්ද්‍රව්‍ය කිලෝග්‍රෑම් 10 ග්‍රෑම් 392 ක් සහ හෂීස් කිලෝග්‍රෑම් 1 ග්‍රෑම් 912 කි. අත්අඩංගුවට ගත් සැකකරුවන් දෙදෙනාම අවුරුදු 30ක් වයසැති කොට්ටාරමුල්ල ප්‍රදේශයේ පදිංචිකරුවන් බව පොලිසිය තහවුරු කර ඇත. මොවුන් විදේශයක සිට මෙම මත්ද්‍රව්‍ය තොගය මෙරටට රැගෙන එන්නට ඇති බවට සැක කෙරේ. පොලිස් මත්ද්‍රව්‍ය කාර්යංශයේ ගුවන්තොටුපොල ඒකකය මඟින් සිද්ධිය සම්බන්ධයෙන් වැඩිදුර විමර්ශන මෙහෙයවනු ලබයි.  

ගුවන් මගින් මෙරටට රැගෙන එන ලද රුපියල් කෝටි ගණනක් වටිනා කුෂ් මත්ද්‍රව්‍ය තොගයක් සමඟ සැකකරුවෙකු අත්අඩංගුවට ගැනීමට පොලිස් මත්ද්‍රව්‍ය කාර්යංශයේ කටුනායක ගුවන්තොටුපල ඒකකය 2026.01.25 අලුයම සමත් විය. පොලිස් මත්ද්‍රව්‍ය කාර්යංශයේ නිලධාරීන්ට ලැබුණු විශේෂ බුද්ධි තොරතුරකට අනුව කටුනායක බණ්ඩාරනායක ජාත්‍යන්තර ගුවන්තොටුපලේ පැමිණීමේ පර්යන්තයේදී සිදුකළ සෝදිසි මෙහෙයුමකදී මෙම මත්ද්‍රව්‍ය තොගය සොයාගෙන ඇත. සැකකරු විසින් සිය ගමන් මලු තුළ සූක්ෂම ලෙස සඟවා මෙරටට රැගෙන ඒමට උත්සාහ කළ කුෂ් මත්ද්‍රව්‍ය කිලෝග්‍රෑම් 08යි ග්‍රෑම් 220ක් මෙලෙස පොලිස් බාරයට ගෙන තිබේ. අත්අඩංගුවට ගත් සැකකරු වයස අවුරුදු 37ක් වන දෙල්ගොඩ ප්‍රදේශයේ පදිංචිකරුවෙකි. මෙම මත්ද්‍රව්‍ය ජාලය මෙහෙයවනු ලබන ප්‍රධාන ජාවාරම්කරුවන් සහ මීට සම්බන්ධ සෙසු පුද්ගලයින් අනාවරණය කර ගැනීම සඳහා පොලිස් මත්ද්‍රව්‍ය කාර්යංශයේ ගුවන්තොටුපල ඒකකය මඟින් වැඩිදුර විමර්ශන ක්‍රියාත්මක කරනු ලබයි.  

විශේෂ කාර්ය බලකා අක්මීමණ කඳවුරේ නිලධාරීන් කණ්ඩායමක් විසින් 2026.01.24 වන දින සවස සිදුකළ  වැටලීමකදී නීති විරෝධී ගිනිඅවියක් සහ ජීව පතොරොමක් සමඟ සැකකරුවෙකු අත්අඩංගුවට ගැනීමට සමත්ව තිබේ. ලද බුද්ධි තොරතුරක් මත ක්‍රියාත්මක වූ විශේෂ කාර්ය බලකා නිලධාරීන් විසින් අම්බලන්ගොඩ පොලිස් වසමේ, වතුගෙදර ප්‍රදේශයේ පිහිටි නිවසක් පරීක්ෂාවට ලක් කර ඇත. එම සෝදිසි මෙහෙයුමේදී නිවසේ කාමරයක් තුළ ඉතා සූක්ෂම ලෙස සඟවා තිබූ මයික්‍රෝ වර්ගයේ පිස්තෝලයක් සහ ඊට යොදන ජීව පතොරොමක් සොයා ගැනීමට නිලධාරීන් සමත්ව ඇත. අත්අඩංගුවට ගත් සැකකරු වයස අවුරුදු 33ක් වන වතුගෙදර ප්‍රදේශයේ පදිංචිකරුවෙකි. දැනට සිදුකර ඇති මූලික විමර්ශනවලදී අනාවරණය වී ඇත්තේ සැකකරු විසින් මෙම ගිනිඅවිය වෙනත් පාර්ශවයකට විකිණීම සඳහා සූදානම් කර තිබූ බවයි. අත්අඩංගුවට ගත් සැකකරු සහ නඩු භාණ්ඩ වැඩිදුර විමර්ශන කටයුතු සඳහා අම්බලන්ගොඩ පොලිස් ස්ථානය වෙත ඉදිරිපත් කර ඇති අතර, අම්බලන්ගොඩ පොලිසිය විසින් වැඩිදුර පරීක්ෂණ සිදු කරනු ලබයි.

 පොලිස් විශේෂ කාර්ය බලකායේ අක්මීමන කඳවුර –  පොලිස් විශේෂ කාර්ය බලකායේ අක්මීමන කඳවුරේ නිලධාරීන් 2026.01.23 වන දින රාත්‍රියේ අහංගම දික්කුඹුර ප්‍රදේශයේ විද්‍යාචන්ද්‍ර මාවතේදී අයිස් මත්ද්‍රව්‍ය ග්‍රෑම් 50 ක් සන්තකයේ තබාගෙන සිටි පුද්ගලයෙකු අත්අඩංගුවට ගෙන ඇත. සැකකරු වයස අවුරුදු 26 ක් වන මිරිස්ස බණ්ඩරමුල් ප්‍රදේශයේ පදිංචිකරුවෙකි. යුධ හමුදා බුද්ධි අංශයේ තොරතුරක් සැකකරු අත්අඩංගුවට ගැනීම සඳහා උපකාරී වී ඇති අතර මේ වනවිට වැඩිදුර විමර්ශන සඳහා ඔහු අහංගම පොලිස් ස්ථානය භාරයේ පසුවේ.  බස්නාහිර පළාත් දකුණ දිසා අපරාධ කොට්ඨාසය – හෙරොයින් ග්‍රෑම් 400 ක් හා මත්ද්‍රව්‍ය ජාවාරමෙන් උපයාගත් බවට සැකකරන මුදල් රුපියල් 320,000/= ක් (තුන් ලක්ෂ විසිදහසක්) සන්තකයේ තබාගෙන තලංගම පොලිස් වසමේ පුස්සැල්ල ප්‍රදේශයේදී සිටි සැකකරුවෙකු බස්නාහිර පළාත් දකුණ දිසා අපරාධ කොට්ඨාසයේ නිලධාරීන් 2026.01.23 දින සවස අත්අඩංගුවට ගෙන ඇත. සැකකරු වයස අවුරුදු 42 ක් වන කඩුවෙල ප්‍රදේශයේ පදිංචිකරුවෙකි.  බස්නාහිර පළාත් දකුණ දිසා අපරාධ කොට්ඨාසය මගින් සැකකරු සම්බන්ධව වැඩිදුර විමර්ශන ක්‍රියාත්මකයි.  මඩකලපුව කොට්ඨාස අපරාධ විමර්ශන කාර්යංශය – මඩකලපුව කොට්ඨාස අපරාධ විමර්ශන නිලධාරීන් කණ්ඩායමක් 2026.01.23 දින රාත්‍රියේ එරාවුර් ප්‍රදේශයේදී වැටලීමක් සිදුකර අයිස් මත්ද්‍රව්‍ය ග්‍රෑම් 113 මිලිග්‍රෑම් 600 ක් හා මත්ද්‍රව්‍ය ජාවාරමෙන් උපයාගත් බවට සැකකරන මුදල් රුපියල් 207,200/= ක (දෙලක්ෂ හත්දහස් දෙසීයක්) සමඟ සැකකරුවෙකු අත්අඩංගුවට ගෙන එරාවුර් පොලිස් ස්ථානයට ඉදිරිපත් කර ඇත.  සැකකරු වයස අවුරුදු 42 ක් වන එරාවුර් 03 ප්‍රදේශයේ පදිංචිකරුවෙකි.  එරාවුර් පොලිසිය විසින් සැකකරු සම්බන්ධව වැඩිදුර විමර්ශන සිදු කරයි.  

බස්නාහිර පළාත් දකුණ දිසා අපරාධ කොට්ඨාසය මඟින් සිදුකළ විශේෂ මෙහෙයුමකදී, දෙහිවල ප්‍රදේශයේ සිදුවූ මනුෂ්‍ය ඝාතනයකට සහ තවත් වෙඩි තැබීමකට සම්බන්ධ ප්‍රධාන සැකකරු විදේශීය රටක නිෂ්පාදිත රිවෝල්වර් අවියක් ද සමඟ අත්අඩංගුවට ගෙන ඇත. 2026.01.23 වන දින දහවල් කොට්ටාව පොලිස් වසමේදී මෙම අත්අඩංගුවට ගැනීම සිදුකර තිබේ. අත්අඩංගුවට ගත් සැකකරු 35 හැවිරිදි දෙහිවල ප්‍රදේශයේ පදිංචිකරුවෙකි. මොහු මීට පෙර යුධ හමුදාවේ සේවය කර 2013 වර්ෂයේදී නීත්‍යානුකූලව සේවයෙන් ඉවත්වූ අයෙකු බව අනාවරණය වී ඇත. සැකකරුගෙන් සිදුකළ ප්‍රශ්න කිරීම්වලදී හෙළි වූ තොරතුරු මත, දෙහිවල පොලිස් වසමේ පාළු නිවසක සඟවා තිබූ අපරාධයට යොදාගත් විදේශීය රිවෝල්වර් අවිය සොයා ගැනීමට පොලිසිය සමත්ව තිබේ. මෙම සැකකරු පසුගිය 2025 දෙසැම්බර් 06 වන දින දෙහිවල වනරත්න පාරේදී පුද්ගලයෙකු වෙඩි තබා ඝාතනය කර තවත් අයෙකුට තුවාල සිදුකිරීමේ සිද්ධියේ දෙවන වෙඩික්කරු ලෙස හඳුනාගෙන ඇත. එම අපරාධයට සම්බන්ධ අනෙක් සැකකරු මීට පෙර බෝර 16 අවියක් සමඟ අත්අඩංගුවට ගෙන රක්ෂිත බන්ධනාගාර ගත කර තිබුණි. ඊට අමතරව, 2025 දෙසැම්බර් 30 වන දින කොහුවල, බෝධිවත්ත ප්‍රදේශයේදී 16 හැවිරිදි දැරියකට වෙඩි තබා තුවාල සිදුකිරීමේ සිද්ධියේ ප්‍රධාන වෙඩික්කරු ලෙස ක්‍රියා කර ඇත්තේද මොහු බව විමර්ශනවලදී තහවුරු වී ඇත. පොලිස් විමර්ශනවලට අනුව මෙම වෙඩි තැබීම් ද්විත්වයම දැනට විදේශගතව සිටින සංවිධානාත්මක අපරාධකරුවෙකු සහ මත්ද්‍රව්‍ය ජාවාරම්කරුවෙකුගේ මෙහෙයවීම මත සිදුකර තිබේ. අත්අඩංගුවට ගත් සැකකරු අද (2026.01.24) දින ගල්කිස්ස මහේස්ත්‍රාත් අධිකරණයට ඉදිරිපත් කිරීමට නියමිත අතර බස්නාහිර පළාත් දකුණ දිසා අපරාධ කොට්ඨාසය වැඩිදුර විමර්ශන මෙහෙයවයි.

අයිස් මත්ද්‍රව්‍ය කිලෝග්‍රෑම් 01කට අධික මත්ද්‍රව්‍ය ප්‍රමාණයක් සමඟ මහා පරිමාණ මත්ද්‍රවය වැටලීම් 06 ක් සැකකරුවන් 08 දෙනෙකු අත්අඩංගුවට (01) කොළඹ උතුර කොට්ඨාස අපරාධ විමර්ශන කාර්යංශය – කොළඹ උතුර කොට්ඨාස අපරාධ විමර්ශන කාර්යංශයේ නිලධාරීන් කණ්ඩායමක් විසින් ලද තොරතුරක් මත 2026.01.21 දින සවස ග්‍රෑන්ඩ්පාස්, ස්ටේස්පුර ප්‍රදේශයේ සිදුකළ වැටලීමක් මගින් හෙරොයින් ග්‍රෑම් 213 ක් සමඟ සැකකාරියක් අත්අඩංගුවට ගෙන ග්‍රෑන්ඩ්පාස් පොලිස් ස්ථානය වෙත ඉදිරිපත් කර ඇත.  සැකකාරිය වයස අවුරුදු 42 ක් වන කොළඹ 14 ප්‍රදේශයේ පදිංචිකාරියකි.  (02) මාදම්පිටිය පොලිස් ස්ථානය – 2026.01.22 දින මාදම්පිටිය, සත්හිරු සෙවණ මහල් නිවාසය අසලදී නවතා තිබූ ත්‍රීරෝද රථයක සිටි සැකකටයුතු පුද්ගලයින් තිදෙනෙකු පරීක්ෂාවට ලක් කර ඇති මාදම්පිටිය පොලිස් ස්ථානයේ නිලධාරීන් කණ්ඩායමක් පුද්ගලයින් තිදෙනෙකු සන්තකයේ අයිස් මත්ද්‍රව්‍ය තිබී අත්අඩංගුවට ගෙන ඇත. එක් සැකකරුවෙකු සන්තකයේ තිබූ බෑගයක් තුළ අයිස් මත්ද්‍රව්‍ය කිලෝ 01 ග්‍රෑම් 300 ක්, විද්‍යුත් තරාදියක් හා හෙරොයින් ජාවාරමෙන් උපයා ගන්නා ලද බවට සැකකරන මුදල් රුපියල් 18,000/- ක් (දහ අටදාහක්), දෙවන සැකකරු සන්තකයේ අයිස් මත්ද්‍රව්‍ය ග්‍රෑම් 100 ක් මිලිග්‍රෑම් 150 ක්, තෙවන සැකකරු සන්තකයේ අයිස් මත්ද්‍රව්‍ය ග්‍රෑම් 201 ක් පොලිස් භාරයට ගෙන ඇත. සැකකරුවන් අවුරුදු 24,32 හා 29 වයස්වල පසුවන වැල්ලම්පිටිය, මට්ටක්කුලිය සහ කොළඹ 15 ප්‍රදේශවල පදිංචිකරුවන්ය. මාදම්පිටිය පොලිස් ස්ථානය විසින් සැකකරුවන් දෙදෙනා සම්බන්ධව වැඩිදුර විමර්ශන සිදු කරයි.  (03) ගල්කිස්ස කොට්ඨාස අපරාධ විමර්ශන කාර්යංශය – 2026.01.22 දින සවස එගොඩඋයන පොලිස් වසමේ ඉසුරුසිරි මාවතට හැරෙන හන්දියේදී හශීෂ් ග්‍රෑම් 154 මිලිග්‍රෑම් 300 ක්, අයිස් මත්ද්‍රව්‍ය ග්‍රෑම් 15 මිලිග්‍රෑම් 300 ක් සන්තකයේ තබා‌ගෙන සිටි පුද්ගලයෙකු අත්අඩංගුවට ගැනීමටගල්කිස්ස කොට්ඨාස අපරාධ විමර්ශන කාර්යංශයේ නිලධාරීන් කණ්ඩායමකට හැකිව තිබේ. අත්අඩංගුවට ගන්නා අවස්ථාවේ රුපියල් 105100/= ක (එක්ලක්ෂ පනස් දහසක්) මුදලක් සැකකරු සන්තකයේ තිබී ඇති අතර මත්ද්‍රව්‍ය ජාවාරමෙන් උපයාගත් බවට සැකකර එම මුදල පොලිස් භාරයට ගෙව තිබේ.  එගොඩඋයන පොලිස් ස්ථානය විසින් වැඩිදුර විමර්ශන සිදුකරයි.  (04) හල්දුම්මුල්ල පොලිස් ස්ථානය – හල්දුම්මුල්ල පොලිස් ස්ථානයේ නිලධාරීන් කණ්ඩායමක් 2026.01.22 දින උදෑසන හල්දුම්මුල්ල, ඉළුක්පැළැස්ස රක්ෂිත ප්‍රදේශයේදී ගංජා කිලෝග්‍රෑම් 32 ක් සමඟ සැකකරුවෙකු අත්අඩංගුවට ගෙන ඇත.  සැකකරු වයස අවරුදු 45 ක් වන කල්තොට ප්‍රදේශයේ පදිංචිකරුවෙකි.  හල්දුම්මුල්ල පොලිස් ස්ථානය විසින් වැඩිදුර විමර්ශන ක්‍රියාත්මකයි. (05) කැලණිය කොට්ඨාස අපරාධ විමර්ශන කාර්යංශය – 2026.01.22 දින උදෑසන කඳාන ප්‍රදේශයේදී කැලණිය කොට්ඨාස අපරාධ විමර්ශන කාර්යංශයේ නිලධාරීන් කණ්ඩායමක් සිදුකළ වැටලීමක් මගින් අයිස් මත්ද්‍රව්‍ය ග්‍රෑම් 30 මිලිග්‍රෑම් 120 ක්, විද්‍යුත් තරාදියක් සහ මත්ද්‍රව්‍ය ජාවාරමෙන් උපයාගත් බවට සැක කෙරෙන රුපියල් 51,000/= ක (පනස් එක් දහසක්) මුදලක් අත්අඩංගුවට ගෙන ඇත. සැකකරු වයස අවරුදු 42 ක් වන වැල්ලම්පිටිය ප්‍රදේශයේ පදිංචිකරුවෙකි.  (06) හම්බෙගමුව පොලිස් ස්ථානය – හම්බෙගමුව, සිරිපුර රක්ෂිත ප්‍රදේශයේ පවත්වාගෙන ගොස් ඇති අක්කරයක පමණ භූමි ප්‍රමාණයක වගා කරන ලද ගංජා පැළ 12580 ක් (දොළොස් දහස් පන්සිය අසූවක්) සහිත ගංජා හේනක් සහ අක්කරයක පමණ භූමි ප්‍රමාණයක වගා කරන ලද ගංජා පැළ 11700 ක් (එකොළොස් දහස් හත්සියයක්) සහිත ගංජා හේනක් හම්බෙගමුව පොලිස් ස්ථානයේ නිලධාරීන් කණ්ඩායමක් විසින් 2026.01.22 දින සොයාගෙන විනාශ කර ඇත.  එමෙන්ම හම්බේගමුව 17 ජනපදය ප්‍රදේශයේදී ගංජා කිලෝ 21 ග්‍රෑම් 300 ක් සහ ගංජා කිලෝග්‍රෑම් 17 ග්‍රෑම් 300 ක් සමඟ සැකකරුවන් දෙදෙනෙකු අත්අඩංගුවට ගෙන ඇත.  සැකකරුවන් අවුරුදු 51 හා 63 වයස්වල පසු වන හම්බෙගමුව ප්‍රදේශයේ පදිංචිකරුවෙකි.

මාදම්පිටිය, සත්හිරු සෙවණ මහල් නිවාසය අසල 2026.01.22 දින නවතා තිබූ ත්‍රීරෝද රථයක සිටි සැකකටයුතු පුද්ගලයින් දෙදෙනෙකු මාදම්පිටිය පොලිස් ස්ථානයේ නිලධාරීන් කණ්ඩායමක් විසින් පරීක්ෂා කිරීමේදී ඔවුන් සන්තකයේ අයිස් මත්ද්‍රව්‍ය තිබී ත්‍රීරෝද රථයද සමඟින් සැකකරුවන් දෙදෙනා අත්අඩංගුවට ගෙන ඇත.  සැකකරුවන් අවුරුදු 24 හා 29 වයස්වල පසුවන වැල්ලම්පිටිය හා කොළඹ 15 ප්‍රදේශවල පදිංචිකරුවන් වේ.  එක් සැකකරුවෙකු සන්තකයේ තිබූ බෑගයක් තුළ අයිස් මත්ද්‍රව්‍ය කිලෝ 01 ග්‍රෑම් 300 ක්, විද්‍යුත් තරාදියක් හා හෙරොයින් ජාවාරමෙන් උපයා ගන්නා ලද බවට සැකකරන මුදල් රුපියල් 18,000/- ක් (දහ අටදාහක්) හා අනෙක් සැකකරු සන්තකයේ තිබී අයිස් මත්ද්‍රව්‍ය ග්‍රෑම් 201 ක් පොලිස් භාරයට ගෙන ඇත. සිද්ධිය සම්බන්ධයෙන් මාදම්පිටිය පොලිස් ස්ථානයෙන් වැඩිදුර විමර්ශන සිදුකරයි.  

පසුගිය දිනයන් තුළ සමාජ මාධ්‍ය ඔස්සේ ප්‍රචාරය වූ පිරිමියෙකු විසින් කාන්තාවක් නිරුවත් කරන ආකාරය දැක්වෙන වීඩියෝව සම්බන්ධයෙන් විමර්ශනය කළ ළමා හා කාන්තා අපයෝජන නිවාරණ කාර්යංශයේ නිලධරයන් වින්දිත පාර්ශවය හඳුනාගෙන ප්‍රධාන සැකකරු 2026.01.18 වන දින හික්කඩුව ප්‍රදේශයේ පිහිටි ප්‍රසිද්ධ හෝටලයක සැඟවී සිටියදී අත්අඩංගුවට ගත්හ. අනතුරුව වැඩිදුර විමර්ශනයේදී ප්‍රධාන සැකකරුට ආධාර අනුබල ලබාදුන් හා පොලිසියට සාක්ෂි වසන් කරන ලද අවුරුදු 44 ක් හා 55 ක් වන ඇහැළියගොඩ ප්‍රදේශයේ පදිංචි පුද්ගලයන් දෙදෙනෙකු ද අත්අඩංගුවට ගත් අතර ප්‍රධාන සැකකරු සම්බන්ධව අළුත්කඩේ ගරු මහේස්ත්‍රාත් අධිකරණය වෙත කරුණු වාර්තා කර විදේශ ගමන් තහනම් නියෝගයක්ද ලබාගැනීමට ළමා හා කාන්තා අපයෝජන නිවාරණ කාර්යංශය ක්‍රියා කර ඇත. අනාවරණය වූ කරුණු අනුව සැකකරු තම නිවසේ සේවිකාවක් වශයෙන් කටයුතු කළ කාන්තාවක් මෙලෙස පිරිසක් ඉදිරියේ නිරුවත් කර වීඩියෝ කර වට්ස්ඇප් සමූහයක් ඔස්සේ සමාජ මාධ්‍ය වෙත මුදා හැර තිබේ.  සැකකරු සිද්ධියෙන් පසුව පොලිසිය මඟහරිමින් ප්‍රසිද්ධ හෝටල් කිහිපයක නවාතැන් ගෙන ඇති බවද අනාවරණය වී ඇත. අත්අඩංගුවට ගත් සැකකරුවන් සම්බන්ධයෙන් ඉදිරි විමර්ශන කටයුතු ළමා හා කාන්තා අපයෝජන නිවාරණ හා විමර්ශන කාර්යංශය විසින් සිදුකරයි.

නාදුනන පුද්ගලයෙකු හෝ ආයතනයක් ආකාරයෙන් සමාජ මාධ්‍ය පණිවුඩයක් මගින් හෝ දුරකථන ඇමතුම් ලබා දෙමින් ඔබට රැකියා අවස්ථාවක් ලබා දෙන බැව පැවසුවොත්, ත්‍යාග දිනුම් ඇදී ඇති බව පැවැසුවොත්, අසත්‍ය චෝදනා ඉදිරිපත්කර නීතිය ක්‍රියාත්මක නොකර සිටීමට ගිණුමකට මුදල් බැර කරන මෙන් පැවසුවොත් මුදල් තැන්පත්කිරීමට ඉක්මන් නොවී සුපරීක්ෂාකාරීව සොයාබලන්න.  යම් හෙයකින් ඔබට මෙවන් රැවටීමකට ලක්ව මුදල් අහිමිකරගත් බව වැටහුනොත් පහත දුරකථන අංකයක් අමතා පැමිණිලි කරන්න.  නියෝජ්‍ය අධ්‍යක්‍ෂ / පරිඝණක අපරාධ විමර්ශන අංශය :- 011  2300638පුද්ගලික සහකාර / පරිඝණක අපරාධ විමර්ශන අංශය :- 011  2381375ස්ථානාධිපති / පරිඝණක අපරාධ විමර්ශන අංශය :- 011  2381058 අවස්ථානුකූලව විවිධ උපක්‍රම භාවිතා කරමින් පුද්ගලයින් සතු ගිණුම් අංක, මුරපද (OTP), හා QR කේත ආදී රහස්‍ය තොරතුරු ලබා ගෙන අත්තර්ජාල දිගු හා ස්කෑන් කේත ඔස්සේද මෙම වංචාවන් සිදු කරන බව දිවයිනේ විවිධ පොලිස් ස්ථානවෙත ලැබෙන පැමිණිලි අනුව නීරක්ෂණය වී තිබේ. ඇතැම් විට බැංකු සේවකයින් ලෙස පෙනී සිටිමින් ඔබට දුරකථන ඇමතුමක් ලබා දී බැංකු ගිණුම් පිළිබඳව තොරතුරු ලබා ගෙන එම ගිණුම් වෙත මත්ද්‍රව්‍ය ජාවාරම්කරුවන් විසින් මුදල් තැන්පත් කර ඇති බව පවසා බිය ගන්වා මුදල් තැන්පත් කරවා ගනියි.  එවැනි සිදිධීන් ගණනාවක් පසුගිය දිනවල මිරිහාන විශේෂ අපරාධ විමර්ශන අංශය වෙතද,  පොලිස් නිලධාරින් ලෙස පවසා දුරකථන ඇමතුම් ලබාදී ගිණුම් විස්තර හා මුදල් ලබා ගැනීමට උත්සාහ කිරීම සම්බන්ධව පාදුක්ක පොලිස් ස්ථානය වෙත ද පැමිණිළි ලැබී ඇත. පහත ආරක්ෂිත ක්‍රියාමාර්ග අනුගමනය කර ඔබට ලැබුනු ඇමතුම පිළිබඳව අනුගමනය කරන්න. *  official pages පරීක්ෂා කිරීම.*  දෙවනි පාර්ශවයට Bank details, NIC Number, login details, *  OTP, Password, PIN, Photos ලබා නොදීම.* සැකසහිත links පරිශීලනය නොකිරීම.* විශ්වසනීය / Verified ගිණුම් පමණක් භාවිතා කිරීම.* මුදල් තැන්පත් කිරීමට පෙර අනන්‍යතාවය සනාථ කර ගැනීම. මේ වනවිට මෙවැනි වංචා සම්බන්ධයෙන් පැමිණිලි රැසක් ලැබී ඇති මිරිහාන පොලිස් විශේෂ අපරාධ විමර්ශන අංශයේ දුරකථන අංකයන්ද පහතින් දක්වා ඇත. මිරිහාන විශේෂ අපරාධ විමර්ශන අංශය :- 011 – 2852556ස්ථානාධිපති / මිරිහාන විශේෂ අපරාධ විමර්ශන අංශය :- 075 – 3994214