Police News – SI

2022.08.02 දින (වසර 03කට පෙර)  මුල්ලේරියාව රෝහල අසල සිදුවූ වෙඩිතැබීමකින් මුල්ලේරියාව ප්‍රාදේශීය සභාවේ හිටපු උප සභාපතිවරයෙකු ඝාතනයට ලක්විය.  බස්නාහිර පළාත දකුණ දිසා අපරාධ කොට්ඨාසය විසින් එම අපරාධයේ  යතුරුපැදිකරු ලෙස ක්‍රියා කළ සැකකරු 2025.12.25 වන දින උදෑසන මාලඹේ පොලිස් වසමේ තලාහේන ප්‍රදේශයේදී අත්ඩංගුවට ගෙන ඇත. අත්අඩංගුවට ගන්නා අවස්ථාවේ සැකකරු සන්තකයේ අයිස් මත්ද්‍රව්‍ය ග්‍රෑම් 05 මිලිග්‍රෑම් 430 ක් හා ව්‍යාජ විදේශ ගුවන් ගමන් බලපත්‍රයක් තිබී පොලිස් භාරයට ගෙන ඇති අතර වයස අවුරුදු 32 ක් වන ඔහු තලාහේන ප්‍රදේශයේ පදිංචිකරුවෙකු බව අනාවරණය කර ඇත. වැඩිදුර විමර්ශනයේදී ඔහුට කොළඹ ගරු මහාධිකරණයේ විභාග වන නඩු 02 ක් සඳහා විවෘත වරෙන්තු නිකුත්ව ඇති බවද අනාවරණය වී ඇත. බස්නාහිර පළාත දකුණ දිසා අපරාධ කොට්ඨාසය සැකකරු සම්බන්ධව තවදුරටත් විමර්ශන සිදුකරයි.

අයිස් මත්ද්‍රව්‍ය ග්‍රෑම් 110 මිලිග්‍රෑම් 80 ක ප්‍රමාණයක් සන්තකයේ තබාගෙන කොම්පඤ්ඥවීදිය, ගැලනි පැසේජ් නව ගුවන් පාලම යට සිටි පුද්ගලයෙක්ව කොළඹ මධ්‍යම කොට්ඨාස අපරාධ විමර්ශන කාර්යංශයේ නිලධාරීන් 2025.12.19 වන දින රාත්‍රී 08.00 ට පමණ අත්අඩංගුවට ගත්හ.  49 හැවිරිදි කොළඹ 02 ප්‍රදේශයේ පදංචිකරුවෙකු වන ඔහුව රඳවාගෙන ප්‍රශ්න කිරීමේදී අනවාරණය වූ තොරතුරු අනුව කොළඹ මධ්‍යම කොට්ඨාස අපරාධ විමර්ශන කාර්යංශයේ නිලධාරීන් 2025.12.22 වන දින මත්ද්‍රව්‍ය සමඟ තවත් සැකකරුවන් දෙදෙනෙක් අත්අඩංගුවට ගෙන ඇත. එක් සැකකරුවෙක් අයිස් මත්ද්‍රව්‍ය ග්‍රෑම් 114 ක් සමඟ වැල්ලවත්ත ඩබ්. සිල්වා මාවත ප්‍රදේශයේදී අත්අඩංගුවට ගෙන ඇත. එම සැකකරු මොරටුව මොරටුවැල්ල ප්‍රදේශයේ පදිංචිකරුවෙකි. අනෙක් සැකකරු අත්අඩංගුවට ගෙන තිබෙන්නේ කඩවත දළුවපිටිය ප්‍රදෙශයේ හෝටලයක් තුලදී කොකේන් මත්ද්‍රව්‍ය ග්‍රෑම් 1056 ක්, හෙරොයින් මත්ද්‍රව්‍ය ග්‍රෑම් 1098 ක්, අයිස් මත්ද්‍රව්‍ය ග්‍රෑම් 4116 ක් සමඟය. ඔහු රාජගිරිය කඩුවෙල පාර, සමගි මාවත ප්‍රදේශයේ පදිංචිකරුවෙකි.  කොළඹ මධ්‍යම කොට්ඨාසය භාර නිලධාරී ජ්‍යෙෂ්ඨ පොලිස් අධිතාරී මහේෂ් කුමාරසිංහ මහතාගේ සෘජු අධීක්ෂණය යටතේ මෙම මත්ද්‍රව්‍ය ජාලයේ තවත් සැකකරුවන් අත්අඩංගුවට ගැනීම සඳහා කොළඹ මධ්‍යම කොට්ඨාස අපරාධ විමර්ශන කාර්යංශය වැඩිදුර විමර්ශන සිදුකරයි.

කොල්ලකරුවන් පිරිසක් 2025.12.07 වන දින රාත්‍රියේ ගල්නෑව පොලිස් වසමේ බුල්නෑව ප්‍රදේශයේ නිවසකට අයුතු ලෙස ඇතුල් වී ව්‍යාපාරික කටයුතුවල නියැලෙන එම නිවසේ සැමියා සහ බිරිඳට මරණ බිය ගෙන දෙමින් තර්ජනය කර මුදලින් රුපියල් කෝටි දෙකක පමණ මුදලක්, රන් භාණ්ඩ, රුපියල් පන්කෝටි හැත්තැදෙලක්ෂ හැට අටදහාක් (57,268,000/-) පමණ වටිනා ප්‍රාඩෝ වර්ගයේ ජීප් රථයක් කොල්ලකා පළා ගියහ. විමර්ශන සිදුකළ ගල්නෑව පොලිස් ස්ථානයේ නිලධාරීන් 2025.12.14 වන දින සැකකරුවන් සය දෙනෙකු අත්අඩංගුවට ගෙන ඇත. කුරුණෑගල, මාතවතගම හා විල්ගමුව ප්‍රදේශවලදී හෙරොයින්  ග්‍රෑම් 10 මිලිග්‍රෑම් 300 ක්, අයිස් මත්ද්‍රව්‍ය ග්‍රෑම් 10 මිලිග්‍රෑම් 250 ක්, අපරාධයට යොදාගත් අත්වැසුම් ජෝඩු 04 ක්, උල් පිහි 04 ක්, අපරාධයට යොදා ගත් යතුරුපැදියක්, වෑන් රථයක් හා ලොරි රථයක ඔවුන සමඟ  අත්අඩංගුවට ගෙන ඇති අතර කොල්ලකන ලද මුදලින් රුපියල් පනස්නමලක්ෂ තිස්නමදාහක (5,939,000/-) මුදලක් හා කොල්ලකන ලද මුදල් වලින් උපයාගන්නා ලද දේපළ රැසක් විමර්ශන නිලධාරීන් භාරයට ගෙන ඇත. කොල්ලකන ලද ප්‍රාඩෝ වර්ගයේ ජීප් රථය මීගලෑව ප්‍රදේශයේ දමා ගොස් තිබියදී සොයාගෙන ඇත. අවුරුදු 34, 36, 38, 40, 43 හා 48 වයස්වල පසුවන කුරුණෑගල, නුගගොල්ල, මාවතගම, මැල්සිරිපුර හා මහනුවර ප්‍රදේශවල පදිංචිකරුවන් ලෙස හඳුනාගෙන ඇති සැකකරුවන් සය දෙනා 2025.12.15 වන දින කැකිරාව ගරු මහේස්ත්‍රාත් අධිකරණයට ඉදිරිපත් කර වැඩිදුර විමර්ශන සඳහා 2025.12.18 වන දින දක්වා රැඳවුම් නියෝග ලබාගෙන ඇත. ගල්නෑව පොලිසිය සැකකරුවන් හා අපරාධය සම්බන්ධව වැඩිදුර විමර්ශන සිදුකරයි.

පොලිස් මත්ද්‍රව්‍ය කාර්යංශයේ ගුවන් තොටුපල ඒ්කකයේ නිලධාරීන් කණ්ඩායමක් 2025.12.14 දින සවස වත්තල පොලිස් වසමේ කොන්වන්ට් පාර ප්‍රදේශයේදී සිදුකල වැටලීමකින් කුෂ් මත්ද්‍රව්‍ය කිලෝග්‍රෑම් 21 ග්‍රෑම් 668 ක් සමඟ සැකකරුවෙකු අත්අඩංගුවට ගෙන ඇත. වයස අවුරුදු 34 ක් වන කොළඹ 14 ප්‍රදේශයේ පදිංචිකරුවෙකු වන සැකකරු සම්බන්ධව පොලිස් මත්ද්‍රව්‍ය කාර්යංශව විමර්ශන ආරම්භකර ඇත.

අම්පාර කොට්ඨාස අපරාධ විමර්ශන කාර්යංශයේ නිලධාරීන් කණ්ඩායමක් ඇල්පිටිය කොට්ඨාසයේ බටපොල සාදමුල්ල ප්‍රදේශයේදී මැගසින් දෙකක් සමඟ ටී-56 ගිනි අවියක්, එම පතරොම් 45 ක් සමඟ සැකකරුවෙකු අත්අඩංගුවට ගෙන ඇත. නැගෙනහිර පළාත් භාර ජ්‍යෙෂ්ඨ නියෝජ්‍ය පොලිස්පති වරුණ ජයසුන්දර මහතා වෙත ලැබුණු තොරතුරක් අනුව  2025.12.14  දින අත්අඩංගුවට ගැනීම සිදුකර ඇති අතර සැකකරු සංවිධානාත්මක අපරාධකරුවෙකුගේ සමීපතමයෙකු බවත් ගිනි අවිය මනුෂ්‍ය ඝාතන කිහිපයක් සිදුකිරීම සඳහා යොදාගැනීමේ සූදානමින් තබාගෙන ඇති බවත් මූලික විමර්ශන මගින් අනාරවණය කර ඇත. වයස අවුරුදු 64 ක් වන නාමල් සෙවණ, සාදමුල්ල ප්‍රදේශයේ පදිංචිකරුවෙකු වන සැකකරු මේ වන විට බටපොල පොලිස් ස්ථානය භාරයට පත්කර ඇත.  වැඩිදුර විමර්ශන ක්‍රියත්මකයි.

දිවයිනට බලපෑ දිට්වා සුළි කුණාටුව හේතුවෙන් ඇතිවුනු අපාදාවන්ට ලක්ව දෙමව්පියන් මිය ගොස් අනාරක්ෂිත භාවයට පත්ව ජීවත්වන දරුවන් පිළිබඳව තොරතුරු ලබාදෙන මෙන් ඉල්ලමින් සමාජ මාධ්‍ය තුල පණිවිඩ සංසරණය වන අයුරු නිරීක්ෂණය වේ. මෙහි භයානක පැතිකඩ නම්, යටි අරමුනක් හිතැතිව සහන සපයන මුවාවෙන් ඉදිරිපත් වන පුද්ගලයෙකුගේ  අපයෝජනයට දරුවෙකු ලක්වීමේ හැකියාව පවතී. ළමුන් භාරගෙන මෙහෙකාර සේවයේ යෙදවීම, කෘරත්වයට පත් කිරීම, නීති විරෝධී කටයුතු සඳහා යෙදවීම සිදුවිය හැකියි. සත්භාවයෙන් දරුවෙකු නිසි භාරකාරත්වයට ගෙන සුරක්ෂිතව පෝෂණය කරමින් හදා වඩා ගැනීමේ අවශ්‍යතාවය යම් අයෙකුට තිබේද, ඔහු හෝ ඇය ශ්‍රී ලංකාවේ බලපැවැත්වෙන සාමාන්‍ය පොදු නීතිය අනුව ගරු දිසා අධිකරණයේ නඩු කටයුත්තක් ආරම්භ කිරීමෙන් එය ඉටුකර ගැනීමේ හැකියාව පවතී. අනාරක්ෂිත වූ, අසරණභාවයට පත්වූ දරුවෙකු සම්බන්ධව තොරතුරු ලබාදීමට මෙන්ම ලබාගැනීමට ජාතික ළමා අරක්ෂක අධිකාරිය හෝ පොලිසියේ ළමා හා කාන්තා අපයෝජන නිවාරණ හා විමර්ශන කාර්යංශය පමණක් දැනුවත්කරන මෙන් ඉල්ලා සිටින්නෙමු. එමෙන්ම සමාජ මාධ්‍යයේ දුරකථන අංක පළ කරන නොහදුනන තැනැත්තන් වෙත දරුවන් සිටින ස්ථාන හෝ තොරතුරු ලබාදීමෙන් වැළකී සිටින ලෙස ඉල්ලා සිටින්නෙමු.

පොලිස් විශේෂ කාර්යය බලකායේ සෙට්ටිකුලම් කඳවුරේ නිලධාරීන් විසින් මත්කරල් 800 ක් වෛද්‍ය නිර්දේශයක් හෝ ප්‍රවාහනය සඳහා නිසි බලපත්‍රයක් නොමැතිව සන්තතකයේ තබාගෙන අනුරාධපුර පොලිස් වසමේ පුල්ලෙයාර් කෝවිල අසල රැදී සිටි පුද්ගලයෙකු 2025.12.14 වන දින රාත්‍රියේ අත්අඩංගුවට ගෙන ඇත. සැකකරු 25 හැවිරිදි අනුරාධපුර මාතලේ හංදිය ප්‍රදේශයේ පදිංචිකරුවෙකු ලෙස හඳුනාගෙන ඇති අතර වැඩිදුර විමර්ශන සඳහා අනුරාධපුර පොලිස් ස්ථානය වෙත භාරදී ඇත. මත්පෙති 48 ක ප්‍රමාණයක් සන්තකයේ තබාගෙන සිටි පුද්ගලයෙකුද පොලිස් විශේෂ කාර්ය බලකායේ පානදුර උප කඳවුරේ නිලධාරීන් විසින් එදින දවටගහවත්ත, මාදුපිටිය ප්‍රදේශයේදී අත්අඩංගුවට ගෙන ඇත. වයස අවුරුදු 50 ක් වන එම සැකකරු වස්කඩුව, මහවස්කඩුව ප්‍රදේශයේ පදිංචිකරුවෙකි. වැඩිදුර විමර්ශන සඳහා පිංවත්ත පොලිස් ස්ථානය වෙත භාර දී ඇත. කළුබෝවිල කඳවුරට අනුයුක්ත නිලධාරීන් කණ්ඩායමක් 2025.12.14 දින රාත්‍රී 10.00 ට පමණ මහරගම නාවින්න ප්‍රදේශයේ සිදුකළ වැටලීමක් මගින් කුෂ් ග්‍රෑම් 01 මිලිග්‍රෑම් 940 ක්, මත්කරල් 09 ක් සන්තකයේ තබාගෙන සිටි  පුද්ගලයෙකු අත්අඩංගුවට ගෙන ඇත. සැකකරු එම ප්‍රදේශයේම පදිංචි 37 හැවිරිදි පුද්ගලයෙකි. වැඩිදුර විමර්ශන සඳහා මහරගම පොලිස් ස්ථානය වෙත භාර දී ඇත.

හෙරොයින් කිලෝග්‍රෑම් 02 ග්‍රෑම් 308 ක් සන්තකයේ තබාගැනීම හා ජාවාරම් කිරීම සම්බන්ධයෙන් පුද්ගලයෙකු 2025.12.14 වන අද දින අළුයම කටුනායක බණ්ඩාරනායක ජාත්‍යන්තර ගුවන්තොටුපලේ පැමිණීමේ පර්යන්තයේදී අත්අඩංගුවට පත්විය. පොලිස් මත්ද්‍රව්‍ය කාර්යංශය ගුවන්තොටුපල ඒකකයේ නිලධාරීන් විසින් අනාවරණය කරගත් තොරතුරක් මත පරීක්ෂාකිරීම සිදුකර අත්අඩංගුවට ගැනීම සිදුකර ඇති අතර සැකකරු වයස අවුරුදු 28 ක් වන රඹුක්කන ප්‍රදේශයේ පදිංචිකරුවෙකු බව හඳුනාගෙන ඇත. සැකකරු 2025.12.14 වන අද දින මීගමුව ගරු මහේස්ත්‍රාත් අධිකරණයට ඉදිරිපත් කර රැඳවුම් නියෝග ලබා ගැනීමට නියමිතය.  පොලිස් මත්ද්‍රව්‍ය කාර්යංශය ගුවන්තොටුපල ඒකකය මගින් වැඩිදුර විමර්ශන ක්‍රියාත්මකයි.