வடக்கு மாகாணத்தில் GovPay மூலம் போக்குவரத்து அபராதம் செலுத்தும் வசதி ஆரம்பம்

அரச சேவையின் திறன்களை மேம்படுத்தும் நோக்கில், டிஜிட்டல் பொருளாதார அமைச்சு, இலங்கை தகவல் மற்றும் தொடர்பாடல் தொழிநுட்ப நிறுவனம் (ICTA) மற்றும் LankaPay நிறுவனம் இணைந்து அறிமுகப்படுத்திய “GovPay” எனும் டிஜிட்டல் பணப்பரிவர்த்தனை முறைமை ஊடாக போக்குவரத்து தண்டப் பணத்தை செலுத்தும் வசதி வடக்கு மாகாணத்தில் உத்தியோகப்பூர்வமாக அறிமுகப்படுத்தப்பட்டது.

இந்நிகழ்வு 2025.10.28 அன்று கிளிநொச்சி மாவட்ட செயலகத்தில், பொதுமக்கள் பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால அவர்களின் தலைமையில் நடைபெற்றது.

நிகழ்வில் வடக்கு மாகாணத்திற்குப் பொறுப்பான சிரேஷ்டப் பிரதி பொலிஸ்மா அதிபர் திலக் சி.ஏ. தணபால, வவுனியா பிராந்திய பிரதிப் பொலிஸ்மா அதிபர் இந்திக ஹப்புகொட, கிளிநொச்சி மற்றும் முல்லைத்தீவு பிராந்திய பிரதிப் பொலிஸ்மா அதிபர் ஜெ.ஏ. சந்திரசேன, யாழ்ப்பாணம் மற்றும் காங்கேசன்துறை பிராந்திய பிரதிப் பொலிஸ்மா அதிபர் ஜீ.எச். மாறப்பன, மேலும் வடக்கு மாகாண சிரேஷ்டப் பொலிஸ் அத்தியட்சகர் பிரிவுகளுக்குப் பொறுப்பான ஆறு சிரேஷ்டப் பொலிஸ் அத்தியட்சகர்கள் மற்றும் 150க்கும் மேற்பட்ட போக்குவரத்து பொலிஸ் அதிகாரிகள் கலந்து கொண்டனர்.

இதனுடன் இணைந்து, கடந்த மூன்று நாட்களில் வவுனியா மற்றும் கிளிநொச்சி பொலிஸ் பிரிவுகளில், 400க்கும் மேற்பட்ட பொலிஸ் அதிகாரிகளுக்கு GovPay பயன்பாடு குறித்த தொழில்நுட்ப பயிற்சிப் பட்டறைகள் நடத்தப்பட்டன. பயிற்சியில் கலந்து கொண்ட அதிகாரிகளுக்கு தேவையான மொபைல் சாதனங்களும் வழங்கப்பட்டன.

GovPay மூலம் போக்குவரத்து அபராதங்களைச் செலுத்தக்கூடிய மூன்றாவது மாகாணம் தற்போது வடக்கு மாகாணம் ஆகும். இதற்கு முன் மேற்கு மற்றும் தெற்கு மாகாணங்கள் GovPay வழியாக அபராதப் பணத்தை வெற்றிகரமாக வசூலித்து வருகின்றன.

LankaPay நிறுவனத்தின் தலைமை நிர்வாக அதிகாரி சன்னத டி சில்வா அவர்கள் தெரிவித்ததாவது:

“GovPay வசதி ஏப்ரல் 2025 இல் தொடங்கப்பட்டதிலிருந்து இதுவரை சுமார் 31 மில்லியன் ரூபாய் மதிப்பிலான அபராதங்கள் GovPay மூலம் செலுத்தப்பட்டுள்ளன.”

இதன் படி, வடக்கு மாகாணத்தில் தற்போது, அபராதச் சீட்டை வழங்கும் பொலிஸ் அதிகாரியிடமிருந்து GovPay வழியாக பணம் செலுத்தும் வழிமுறைகள் குறித்து நேரடியாக தகவல் பெறலாம்.

பணம் செலுத்திய உடனேயே ஓட்டுநர் உரிமத்தை மீண்டும் பெறும் வசதியும் ஏற்படுத்தப்பட்டுள்ளது.

மேலும் தகவல்களுக்கு அல்லது ஆன்லைனில் அபராதம் செலுத்துவதற்காக, https://govpay.lk/si/spot-fine  என்ற முகவரியில் வழிமுறைகளைப் பார்க்கலாம்.